Impendwa 1 - WAKALATA WANO WALI

Ukupendwa kwa wa Israeli pamwamba Sinai

¹ Imfumu e Leza alangasa kwe Musa mumavunje yakwe Sinai, mumutanda wakuwunganila kweneko, pawanda wakutalika wamwezi wachitiwili, mumwaka wachitiwili ukufumilila pano wafumizile munsi ya Ijeputi, ati.

² Penda ukuvula kwiwumba lyonsi ilyawantu wakwe Israeli, uwapende muviwanza vyawo, mung’anda zyakwe wayisi, uwapende ukulingana nimpendwa zyamazina, awonsi wonsi, wengawenga,

³ ukutalichila pamyaka amukumi yawili nawano walutilizya papo, upende wonsinye mwe Israeli wane wali namaka yakulwa isumo, wewenye nu Eroni muwapende, mumawumba mumawumba.

⁴ Swinya mwalanga muli numuntu wenga-wenga ukufuma mumwiko wonga-wonga, wilamuntu wino wesongo mung’anda yakwe yisi.

⁵ Yaa amazina yakwe wano wandi wawavwa. Ukufuma kwe Rubeni, we Elizuri umwanakwe Shedeuri;

⁶ ukufuma kwe Simeoni, we Shelumieli umwanakwe Zurishadai;

⁷ ukufuma kwe Yuda, we Nashoni umwanakwe Aminadabu;

⁸ ukufuma kwe Isakari, we Nataneli umwanakwe Zuara;

⁹ ukufuma kwe Zebuloni, we Eliabu umwanakwe Heloni;

¹⁰ ukufuma kuwanakwe Jozefu, kwe Efulemu, we Elishama umwanakwe Amihudi, swinya ukufuma kwe Manase, we Gamalieli umwanakwe Pedazuri

¹¹ ukufuma kwe Benjemani, we Abidani umwanakwe Gideoni;

¹² ukufuma kwe Dani, we Ahiezeri umwanakwe Amishadai;

¹³ ukufuma kwe Asheri, we Pagieli umwanakwe Okirani;

¹⁴ ukufuma kwe Gadi, we Eliasafu umwanakwe Deueli;

¹⁵ ukufuma kwe Nafutali, we Ahira umwanakwe Enani.

¹⁶ Wanyewaa awano wasozilwe ukufuma mwiwumba, wanankolelo wamyiko yakwe wayisikulu, wasongo wamyiko ya wa Israeli.

¹⁷ E Musa nu Eroni awasenda awantunye waa wano amazina yawo yatakwa,

¹⁸ nga pawanda wakutalika wamwezi wachitiwili awawunganika iwumba lyonsi apaliponga, awawalikwa muviwanza vyawo, mung’anda zyakwe wayisi, ukulingana nuwinji wamazina yawamyaka amakumi yawili nukulusya papa umuntu wenga-wenga,

¹⁹ ndimuno Imfumu e Leza wakomelezezizye Musa. Achaleka Musa awapenda mumavunje yakwe Sinai.

²⁰ Iwuvi lyakwe Rubeni, ekatote wakwe Israeli, inkwatwa zyawo, muviwanza vyawo, mung’anda zyakwe wayisi, ukulingana nukuvula kwamazina, wenga-wenga, umonsi wensi uwamyaka amakumi yawili nukulusya papo, wonsi wano walinji namaka yakuya kwisumo:

²¹ ukuvula kwamwiko wakwe Rubeni walinji imyanda ikumi impindi amakumi yani namutanda nimyanda yisano (46,500).

²² Iwuvi lyakwe Simeoni, inkwatwa zyawo, muviwanza vyawo, mung’anda zyakwe wayisi, wonsi wane wapenzilwe, ukulingana nuwinji wamazina, wengawenga, umonsi wensi uwamyaka amakumi yawili nukulusya papo, wonsi wano walinji namaka yakuya kwisumo:

²³ ukuvula kwamwiko wakwe Simeoni walinji imyanda ikumi impindi amakumi yasano namufundikambali nimyanda yitatu (59,300).

²⁴ Iwuvi lyakwe Gadi, inkwatwa zyawo, muviwanza vyawo, mung’anda zyakwe wayisi, ukulingana nuwinji wamazina, ukufumilila kumyaka amakumi yawili nukulusya papo, wonsi wane walinji namaka yakuya kwisumo:

²⁵ ukuvula kwamwiko wakwe Gadi, walinji imyanda ikumi impindi amakumi yani nazisano nimyanda mutanda namakumi yasano (45,650).

²⁶ Iwuvi lyakwe Yuda, inkwatwa zyawo, muviwanza vyawo, mung’anda zyakwe wayisi, ukulingana nuwinji wamazina, ukufumilila kuwamyaka amakumi yawili nukulusya papo, wonsi wano walinji namaka yakuya kwisumo:

²⁷ ukuvula kwamwiko wakwe Yuda walinji imyanda ikumi impindi amakumi munenulambali nazini nimyanda mutanda (74,600).

²⁸ Iwuvi lyakwe Isakari, inkwatwa zyawo, muviwanza vyawo, mung’anda zyakwe wayisi, ukulingana nuwinji wamazina, ukufumilila kuwamyaka amakumi yawili nukulusya papo, wonsi wane walinji namaka yakuya kwisumo:

²⁹ ukuvula kwamwiko wakwe Isakari walinji imyanda ikumi impindi amakumi yasano nazini nimyanda yini (54,400).

³⁰ Iwuvi lyakwe Zebuloni, inkwatwa zyawo, muviwanza vyawo, mung’anda zyakwe wayisi, ukulingana nuwinji wamazina, ukufumilila kuwamyaka amakumi yawili nukulusya papo; wonsi wane walinji namaka yakuya kwisumo:

³¹ ukuvula kwamwiko wakwe Zebuloni walinji imyanda ikumi impindi amakumi yasano namunenulambali nimyanda yini (57,400).

³² Iwuvi lyakwe Jozefu, akulikuti iwuvi lyakwe Efulemu, inkwatwa zyawo, muviwanza vyawo, mung’anda zyakwe wayisi, ukulingana nuwinji wamazina, ukufumilila kuwamyaka amakumi yawili nukulusya papo; wonsi wane walinji namaka yakuya kwisumo:

³³ ukuvula kwamwiko wakwe Efulemu walinji imyanda ikumi impindi amakumi yani nimyanda yisano (40,500),

³⁴ Iwuvi lyakwe Manase, inkwatwa zyawo, muviwanza vyawo, mung’anda zyakwe wayisi, ukulingana nuwinji wamazina, ukufumilila kuwamyaka amakumi yawili nukulusya papo; wonsi wano walinji namaka yakuya kwisumo:

³⁵ ukuvula kwamwiko wakwe Manase walinji imyanda ikumi impindi amakumi yatatu naziwili nimyanda yiwili (32,200).

³⁶ Iwuvi lyakwe Benjemani, inkwatwa zyawo, muviwanza vyawo, mung’anda zyakwe wayisi, ukulingana nuwinji wamazina, ukufumilila kuwamyaka amakumi yawili nukulusya papo; wonsi wane walinji namaka yakuya kwisumo:

³⁷ ukuvula kwamwiko wakwe Benjemani walinji imyanda ikumi impindi amakumi yatatu nazisano nimyanda yini (35,400).

³⁸ Iwuvi lyakwe Dani, inkwatwa zyawo, niuviwanza vyawo, mung’anda zyakwe wayisi, ukulingana nuwinji wamazina, ukufumilila kuwamyaka amakumi yawili nukulusya papo; wonsi wano walinji namaka yakuya kwisumo:

³⁹ ukuvula kwamwiko wakwe Dani walinji imyanda ikumi impindi amakumi mutanda naziwlli nimyanda munenulambali (62,700).

⁴⁰ Iwuvi lyakwe Asheri, inkwatwa zyawo, muviwanza vyawo, mung’anda zyakwe wayisi, ukulingana nuwinji wamazina, ukufumilila kuwamyaka amakumi yawili nukulusya papo; wonsi wano walinji namaka yakuya kwisumo:

⁴¹ ukuvula kwamwiko wakwe Asheri walinji imyanda ikumi impindi amakumi yani nayonga nimyanda yisano (41,500).

⁴² Iwuvi lyakwe Nafutali, inkwatwa zyawo, muviwanza vyawo, mung’anda zyakwe wayisi, ukulingana nuwinji wamazina, ukufumilila kuwamyaka amakumi yawili nukulusya papo; wonsi wano walinji namaka yakuya kwisumo:

⁴³ ukuvula kwamwiko wakwe Nafutali walinji imyanda ikumi impindi amakumi yasano nazitatu nimyanda yini (53,400).

⁴⁴ Wanye-waa awano wapenzilwe, wano Musa nu Eroni nukwavwilizwa kwakwe wanankolelo wawa Israeli wapenzile, awantu ikumi nawawili, wilamuntu ukwimilila ing’anda yakwe yisi.

⁴⁵ Achaleka impendwa ya wa Israeli wonsi, mung’anda zyakwe wayisi, ukufumilila kuwamyaka amakumi yawili nukulusya papo, wonsi wano walinji namaka yakuya kwisumo—mwe Israeli—

⁴⁶ impendwa yakuvula kwawo wonsi apaliponga walinji imyanda ikumi impindi imyanda mutanda nimyanda ikumi impindi zitatu nimyanda yisano namakumi yasano (603,550).

Awina Levi awalasikwa ukusunga isano

⁴⁷ Ukuwa awina Levi weni watapenzilwe mumyiko yakwe wayisikulu,

⁴⁸ Amuno Imfumu, e Leza wanenile Musa ati,

⁴⁹ Awina Levi weni watize wapendwe, utize uwapendele apaliponga nawantu wakwe Israeli;

⁵⁰ ukuwa yimika awina Levi wawe awasongo wisano lyilayano, apaliponga navyonsi ivyakuyemvya mwenemo, woliwonye awano wandi wasenda isano, swinya wakwikala awaliwilizya isano.

⁵¹ Ndi isano lyati aliwasimpulwa, awina Levi awano wandi walisimpula; naponsi pano lyati liwazengwa awina Levi-nye awano wandi walisimpa, Ukuwa ndiwinji wensi wiza wapalamila, alikomwa.

⁵² Awa Israeli wize wazenga imitanda yawo mumpuka zyawo, wilamuntu ninkambi yakwe nawilamuntu niwumba lyakwe;

⁵³ ukuwa awina Levi weni wize wazenga awaliwilizya isano lyilayano, alyakuti kutize kwize kuwe uwukali kwiwumba lyawantu wakwe Israeli; amulimo wawina Levi ukusunga isano lyilayano,

⁵⁴ Awantu wakwe Israeli wachisile wowortye; awachitila vyonsi ndimuno Imfumu e Leza wanenezile Musa.