రోమతుర్కున్ లిహి కీత చిటి 6 - ఆదిలాబాద్ గోండి పూన నియమ్

తన్వ పెర్మత-దయతె బగవంతల్ మావంగ్ పాప్కున్ మాపి కీంతొర్

¹ ‘బగవంతల్ మావంగ్ పాప్క్ మాపి కీసెర్, మా పొరొ తన్వ పెర్మత-దయ తొహ్చెరెన్ మందంతొర్. తె పాప్ కీసెరెన్ మంద్కట్’ ఇంజెర్ మరట్ ఇంద్కట్ కి?

² అహన్ అసలె ఇన్వ! బారితెకె, అదికార్ తాకుస్వల్ పాప్న సక్తి, మా రొపొడల్ సాసి సొడిత. తె మరట్ ఉండె గిర్ పాప్ కీసెర్ బహన్ పిసెర్ మంద్కట్? మన్వ!

³ ఉండె ఉంది గొస్టి, మరట్ యేసు కిరిస్తునగ బరొస ఇర్తతున్ తొహ్లె, బాప్తిస్‌మ యేత్‌తట్ అస్కె, వోన్ బరొబర్ మరన్ ఆతట్ ఇన్వల్ మీకున్ టావయ్ కి?

⁴ అని అద్ బాప్తిస్‌మ మరట్ యేత్వడున్ హిందల్, యేసున్ బరొబర్ మాతి ఆతపినయ్ మంతట్. అదెన్ సాటి, బాబొ బగవంతల్ తన్వ మయ్మత సక్తితె కిరిస్తున్ మరన్తల్ నేండుసీతపె, మరట్ గిర్ ఇంకె, పూన జిన్గనితె పిస పరంతట్.

⁵ మరట్ యేసున మరన్తగ ఉంది ఆతపె, వోర్ నేండ్త పూన జిన్గనితగ గిర్ తప్వక్ ఉంది ఆంతట్.

⁶ బతల్ ఇత్తెకె, మావ మేందొడగ పాప్ తన్వ అదికార్ తాకుస్వడున్ తోడ్-మోడ్ కియన్ సాటి, మావ పాప్న జిన్గనితున్ పియ్సి, యేసున్ బరొబర్ మొద్నగ మరన్ ఆతట్ ఇన్వల్ మాకున్ టావ.

⁷ బారితెకె బోరె ఆయి సాతెకె, వోర్ పాప్న అదికార్దల్ సుటె మాంతొర్.

⁸ తె మరట్ కిరిస్తున్ బరొబర్ మరన్ ఆతట్ అని వోన్ బరొబర్ పిసంతట్ గిర్ ఇంజెర్ నమంతట్.

⁹ బారితెకె, కిరిస్తు సాసి-నేండ్త పెజె, ఉండె ఉంది జోక మరన్ ఆయొర్ ఇంజెర్ మాకున్ టావ. వోన్ పొరొ మరన్తున్ అదికార్ సెలె.

¹⁰ బారితెకె, పాప్న సక్తితున్ పాసి వాటన్ సాటి, వోర్ ఉందియ్ జోక పరన్ సీతొర్. అని నేండ్సి, ఇంకె బగవంతన్ డగుర్-పాన్ సియ్లె, జీవతె మంతొర్.

¹¹ అద్ తీర్దె, ‘మమొట్ పాప్న గొస్టితున్ హిందల్ మరన్ ఆతొమ్. బతి బగవంతన్ సంగ మన్లె, మా యేసు కిరిస్తున్ హిందల్ నేండ్తొమ్’ ఇంజెర్ మిరట్ సమ్జె మామ్ట్.

¹² అదెన్ సాటినె, మరన్ ఆయ్వల్ మీవ మేందొడ్ పొరొ అదికార్ తాకుస్లె, పాపున్ వొప్మట్. తానంగ్ ఆసనగ కోండె మాయ్మట్.

¹³ పాప్ అని కరబ్ కియ్వలిక్ వస్తున్ దాత్ మీవంగ్ మేందొల్కున్ వాడకమ్ కియ్మట్. మీకున్ మరన్తల్ సుటి కియుసి, పూన జిన్గని సీత కాడ్కి, బగవంతనె మీవ మిరట్ బర్పుర్ హవ్లి కీమ్ట్. మిరట్ నియత్నంగ్ కామ్క్ కియ్లె, మీవ మేందొడ హర్ బాగమున్ బగవంతనె హవ్లి కీమ్ట్.

¹⁴ బారితెకె, మిరట్ దర్మత కానున్త అదికార్దున్ బూడ్ సెల్విట్. బతి బగవంతన పెర్మత-దయతున్ బూడ్ మంతిట్. అదెన్ సాటి, పాప్ మీ పొరొ అదికార్ తాకుసొ.

బగవంతన్ ఆనంద్ సియ్వలిర్ దాసిర్

¹⁵ తె మిరట్, ‘దర్మత కానున్త అదికార్దున్ బూడ్ సెలొమ్. బతి పెర్మత-దయతున్ బూడ్ మంతొమ్. ఇంగె పాప్ కీసెర్ మంద్కట్’ ఇంజెర్ ఇంద వచొ. అహన్ అసలె ఇన్వ!

¹⁶ వొరొర్ మాయ్నల్ ఉండె వొరొనగ దాసి ఆసి మంతొర్ ఇత్తెకె, వోర్ మాల్కల్ వెహ్త తీర్, చాకొర కియ లాగర్ ఇంజెర్ మీకున్ టావయ్. పాపున్ దాసిర్ ఆకిట్తె, మీకున్ మరన్త పండి పుటంత. బతి బగవంతనుర్ దాసిర్ ఆకిట్తె, వోర్ మీకున్ నియత్నుర్ ఇంజెర్ వొపంతొర్.

¹⁷ బగవంతన్ నన దనెవాద్ వెహ్చెర్ మంతొన్. బారితెకె, మొదొల్ మిరట్ పాపున్ దాసిర్ ఆసి మత్తిట్ బతి ఇంకె, మిరట్ కేంజ్తంగ్ బోదన్ పియ్సి, మీవ దిల్తగ బర్పుర్ వొప్సి, తాకంతిట్.

¹⁸ అద్ తీర్దె, మిరట్ పాప్న అదికార్దల్ సుటె మాసి, నియత్నంగ్ కామ్క్ కియ్లె, బగవంతనుర్ దాసిర్ ఆతిట్.

¹⁹ ఇవ్ సమ్దిన్ అర్తమ్ కీనల్ సక్తి మిహ్గ సెల్వ కాడ్కి, నన సాదరన్ నమునంగ్ యేచ్చి, వెహ్చెర్ మంతొన్. ఇదెన్ మునె దాసిర్ మోడి, మీవంగ్ మేందొల్కున్ పాప్న కెయ్దె హవ్లి కీత కాడ్కి, బే-సుదుడ్-పాన్దంగ్ అని కరెబలిక్ కామ్క్ వెలె బడె మాతంగ్. బతి ఇంకె బగవంతనుర్ దాసిర్ మోడి సుదుడ్-పాన్దంగ్ అని నియత్నంగ్ కామ్క్ కియ్లె, మీవంగ్ మేందొల్కున్ హవ్లి కీమ్ట్. అస్కె మిరట్ పవిత్ర ఆంతిట్.

²⁰ మిరట్ పాప్నగ దాసిర్ ఆసి మనెకె, బగవంతన్ ఆనంద్ సియ్వల్ జురత్ సెలె మత్త.

²¹ బతి ఆతంగ్ కామ్కున్ హిందల్, మీకున్ బతయ్ పాయ్ద పుట్త కి? బతయ్ పుట్మకి! అవ్ మొదొల్ కీతంగ్ కామ్కున్ బారెతె ఇంకె లజె మాసెర్ మంతిట్. ఆతంగ్ కామ్క్ ఆక్రిత్ మరన్తెకెనె వోంతంగ్.

²² బతి ఇంకె, మిరట్ పాప్న అదికార్దల్ సుటె మాసి, బగవంతనుర్ దాసిర్ ఆతిట్. ఇదెన్ హిందల్, మిరట్ సుదుడ్ ఆంతిట్. ఇదెన ఆక్రిత ఇనమ్ మీకున్ పుట్వల్ బస్కెట్ మన్వల్ జీవ ఆంద్.

²³ అని పాప్ కియ్వడ ఆక్రిత ఇనమ్ మరన్ ఆంద్. బతి మా యేసు కిరిస్తు పర్బున్ హిందల్, బగవంతన పెర్మత-దయత వరమ్ బస్కెట్ మన్వల్ జీవ మాకున్ పుటంత.