WAHYU 1 - PANO WENE YABUNGGA ERIGIN YIRIGE MENDE

Wene edoma tu kukige wene

¹ Buku yi ebe Allah nen o yoma yabunggane etarigin mende, Ar Yesus Kristus nen bugalogo birige mende wene o. Ar Allah nen, ir ayedoman mende, wene tubuk togo nena etarigin yiluk, Ar Kristus nen kurumbi yorawak nen yiluk oba birigemo yirige wene o. Etama Ar Kristus nen, Ar ayedoman Yohanes oba, malaikat Ar mende wene o yoma etarir ligin mende yori lan yiluk lakbirigemo, yorige mende arar o.

² Ar Yohanes nen il karige mende mbililkige eti; Ar Allah nen yirige mende, Ar Yesus Kristus nen wene obatne erogo bagalkige mende o.

³ Wene mbalek yoma etarurak obok korok arar panggo yege o. Etama, ar ta nen wene mbalek yi endaga taligin mende inom, akuni wene erigin yirige mbalek yoma aruk kuligin mende inom, wene mbalek yi erir ligin mende inom, ir eti inadek nggen arar o.

Tujuh jemaat keyagi warinakige wene

⁴ Nawor nakbur kir jemaat tujuh paga, kinai o Asia yoma werek mende wae! An Yohanes nen wene yokerar taga o. Ma Ar Allah ebe yogondak werek, o pagane etoma welagage, nen yabungga etoma aitok mondok dogogin ar o. Nen ir inebe roh tujuh paga eti, Ar Allah mende takhta eloktekma werek eta inom,

⁵ nen Ar Yesus Kristus wene bagalkwa inom nen, Ir nen Ar Allah amende apir kado milogo wokeragwi, kinebe pano nggedorogo pakirek welagik, eku dogowak o. Ma Ar ebe kambiluk lektagama nen, alep iluk atuk wulkige mende nen, Ar ir agartaga yoma obarne pago inewe nen, Ar Yesus nir ninakba nen wartagage paga, nir maduk ekugumo agadela nen, pigal ninakige mende yi, ninakba kega dogowak o.

⁶ Nir waganogo woknerek ap imam-imam nen, Ar Ombae Allah eyabu eku dogowak nen yiluk binaninggige o. Ar Yesus Kristus eti, ar endaga mbogor, nggok mondok-mondok dogowak o! Amin.

⁷ Ar Ebe agagona akla warir taga eti kinil lakani o! Akuni obogar nen Ar Ebe waga inil kugun o. Akuni agar taga yoma inalebunu dombok, Ar nen ir inaru inobade nen, ir inadenggu maktagun o. Wene yi, ebebar erigin o. Amin!

⁸ “An eti alebagik nen yabungga kudi arar o.” Ar Tuhan Allah nen ane yega dogolir, An yogondak ya werek, alep welagagi, nen yabongga dogogin Nobatne werek mende eti An arar o.

Akbi ngganggo paga, Ar Kristus eka il karige wene

⁹ An Yohanes, kinogarak Kristus awene mutok nugunem, Kristus apma binanu paga, ane pago mondok neyalok, anggin panggin ndak-ndak ninoba waritaga o. An Allah wene yoraga paga, Yesus eka karigi mende yoraga neyalok, kede warogo o Pulau Patmos paga yoma mbo bani wagiyama, agarik o.

¹⁰ Ar Allah ao pulogo birige paga, Ar Roh Allah noba labornabi wagage o. Ma nambudik nggwe nen, ane nggok trompet ane ndak-ndak tedalkige o.

¹¹ Ane eti nen, yonega dogolir: “Yogondak kar kil kegen mende diru mbalin o, nen diru mbalek ir tujuh jemaat: ir jemaat Efesus inom, Smirna inom, Pergamus inom, Tiatira inom, Sardis inom, Filadelfia inom, Laodikia inom, yi inake inoba lakbino o,” yiluk yonirige o.

¹² An ta nen ane yoniritaga yiluk, nil bikak nen yiluk namborna dagarogo bikarigi mende, ane yegama etoma lampu emas tujuh paga erek werekma nil lakarigi o.

¹³ Lampu tujuh eti iniyok edoma etoma, akuni ar ambi mendek karigi o. Ar iyom jubah nggorak togo yugu nen iyokma inom taluk togo kigi o. Owalimo emas paga mendago, amik paga yugu kigi o.

¹⁴ Iri kelel eti domba iri talek ndadu yega, nen tiduk enggen akbinak men talek, tuguluk il akbinak indu akda kwak yibalka kigi o.

¹⁵ Iyok etoma tembaga kali werago akbinak kwak bigal-bigal yega. Ane etoma i tarin nggok mondok mbo wurakanem talek, ane anggurnggur yega kigi o.

¹⁶ Inggi ebema nggwe dadi tujuh paga inggi pago, nen andema nen mbirok aik penok-penok mago talek wulka kigi o. Ilka akbinak molinggin kunik akbinak talek yibalka kigi o.

¹⁷ Nil kega lagagirik, uwagam nelokte taguk, akuni watarir tagwi ndak-ndak wata lagagimo, Ar inggi ebe manggwe pak baniluk, ane yonega dogolir: “Abeak, nobade yugup o! An eti alebagik nen yabungga kudi arar o.

¹⁸ An eti niluk mende arar o! An arar wartagagi mende, ogwe kil bikneyan nda, An niluk mondok-mondok dogogin o. An kambiluk lektagama tu laka, erik nen yiluk tugurin obogar ninggim waganggi pago werek yoma, kil kan nda.

¹⁹ Eta etegerogo erigin ma, kar nen yogondak ya etaru kil kegen mende inom, yabongga etaru kil kegen mende inom, etoma obogar diru paga mbalin o.

²⁰ Yogo kar nen dadi tujuh paga ninggi ebemanggwe pago kegen enogo inom, lampu emas tujuh paga erek kegen etoma inom awene kimago mende ma, yogondak yokirik o. DadiTujuh paga eti, ir malaikat tujuh jemaat eti inaruwam werek mende, Nen pelita emas tujuh paga kegen eti, ir jemaat tujuh paga eti arar o,” yiluk yornirige o.