TITUS 3 - PANO WENE YABUNGGA ERIGIN YIRIGE MENDE

Ir akuni Kristen mende nen eku dogorak wene

¹ Kakburi ir jemaat nen, ap o endoma wene onde mende inom, inarige werek mende inom, inalon palogo inapma dogolir, pano mende mban erir lagu dogowak nen yiluk yoraga dogono o.

² Ir nen, akuni inabok mbalkwi, ndugi bugwi eku dogorok dek o. Ir nen inoba tagin dogolir, akuni obogar inom pano dogowak nen yiluk, yoraga dogon o.

³ O pagane etoma niniliti apir paga, nuk agwi dogolir pano ekikdek, niniliti nen nengga kalok ayedoman dogolir, maduk mban nanini kanini erir nugu lagagumo o.

⁴ Ogwe, Ar Allah Akbur pano nen, nir ninakba karigemo o.

⁵ Nir pano mende erir lagunem, ndil ninakige dek o. Ar Roh Allah nen ninomaduk tobalogo, ninebe ngger endak ninarkige o.

⁶ Nir ninewe Raja Ndilninakwa mende, Ar Yesus Kristus paga, Ar Allah Agorengge ninoba wurabi wagage o.

⁷ Ar Yesus obabur pano nen, nir Ar Allah ninom dambul ninaka, nir ninebe niniluk ninaitok dogorak mende, oba eberek welagagu mende eti wokneraga erigin o.

⁸ Wene yi ebebar mende wene o. Ir akuni Ar Allah Ane ebebar pago mende nen, ye yabu nde yabu pano mende mban mutok matok ekwi, ir akuni obok inake ekwi, eku dogowak nen yiluk, kane obarne togo yoraga dogono o.

⁹ Wene agarak kunggwa mende, akuni inedo kindir kwa mende, inaruan nggano edo kwaka mende kinom agade kunugup o. Etoma obogar, ugun elamatak enggen dek mende eti, yir nugu dogorak dek o.

¹⁰ Ir akuni nen ir jemaat agorik agorek erinakwi dalok, kinggi mbere ambi paga inaruk waka dogoluk; tuguluk nen ar kimbirak agade kunugup mondok arar o.

¹¹ Ir akuni maduk ekwa mende inomaduk eti, ir nen ekama o yiluk kenam agage mende, obogar kar kulu o.

Wene irep paga inaruk wakige wene

¹² O Nikopolis etoma miyo ande kurik paga ma, an etoma dogu nakla andagi o. Ma ar dak Artemis, endaga ambi Tikhikus yoritagwi enogo, ar koba lakbi wagi endi o. Ar waga kalok, kar ibar noba nggwe warno o.

¹³ Kar nen ap Zenas wene edo kindiru ilu mende enogo inom, ap Apolos inom, lagu dogolir ndugur tagikdek lagunem, kar nen ir pik pak ndugurogo lakbano o.

¹⁴ Ir akuni nir mende nen, akuni ininggi dek mende talek etagunem, ir nen ye mende nde mende eku dogorak mende emerbiluk, inoba pano erinaka dogorak mende mban eku dogorak o.

¹⁵ Ir kogari an ninom yoma werek mende nen, keyagi warkaka o, aelak. Kar nen nir keyagi wakinako mende eti, ir ninogari obogar keyagi wakinaka o, yiluk yoran o. Ar Tuhan adeknggen mende, nogari obogar kinoba binagaga dogowak o. An Paulus nen, Keyagi wakinaki o, waanelak.