TITUS 2 - PANO WENE YABUNGGA ERIGIN YIRIGE MENDE

Wene inedo yago eku dogorak wene

¹ Eta erir lagwi dagik, kar Titus yi, wene inedo yago mende wene endi mban dirogo emeriraga dogono o.

² Ir ap inanggok mende kalok inebe tebe yiluk, iniliti kode dogolir, inalon palek dogowak nen yiluk, inaruk waka dogono o. Ir nen wene inedo yago wene emedek mende pago welagwi, akuni inakba nggok ekwi, anggin panggin inoba wukanem yanggorogo waganggwi, eku dogowak nen yiluk inaruk waka dogono o.

³ Eta ndak-ndak, kumi inanggok mende inobabur Allah akburi denek mende nen eritagwi kwak, eku dogowak nen yiluk inaruk waka dogono ar o. Ir nen nabok kabok yir nugunem, i mabuk ekwa mende nunggunem, ir nen pano erurak mende mban eku dogowak nen yiluk, emeriraga dogono o.

⁴ Edo eta biluk, ir kumi ndugum mende nen inaguni inom, inagwi inakburi inom, nakba kakba dogowak nen yiluk, emeriraga dogono o.

⁵ Iniliti kode dogolir, pano mban ekwi, kwe uma oba ndegelek mende, nen agun alon palek dogolir eka paga, akuni amberak nen Allah wene tebelogo bugwi, Allah wene oba maduk erogo bugwi erugun mondok dek o.

⁶ Eta ndak-ndak ir wagidak komagidak mende, iniliti kode aruwak nen yiluk, inaruk waka dogono o.

⁷ Kar nen ye ekik nde ekik eka dogolir, kebe kobabur inowalkigik eku dogowak nen yiluk eka dogono o. Kar nen emeriraga dogolir kalok, mor-mor ebebar dirogo emerinaka dogono o

⁸ Kane wene pano iniliti aik warurak mende mban yega, nen maduk yegen yiluk yokiru dek mende etoma mban yega keyalok, ir akuni kar kinom agorek mende nen kabok mbalu mende inenggadi arugun o.

⁹ Ir yedoman nen, ap inombayelak inapma teberogo dogolir, iniliti adeknggen erinaku dogorak o. Ir nen enok mbenok yigikdek,

¹⁰ nen inilmudu kirakwi eku dogorak dek o. Nen ir nen inobabur pano, yanggorogo ekwi kalok, ir akuni nen wene Allah Ndilinakwa awane emedek ebebar o, yiluk yugu dogogun o.

¹¹ Ar Allah nen ye akuni nde akuni ninakba nen ndilninabik nen yiluk, telekma yoneragage o.

¹² Ar Allah ninakba nen emerniraga dogolir, kir nen Allah a'ir mende erir lagu dogogup o. Eta wene emeriragunem, nir nen agar taga yoma dogolir, erurak kigik, yanggo yiluk, mutok matok Ar Allah ake mban eku dogorak ninilu arigin o.

¹³ Yogondak, o menda nen ar wokninabigin yiluk, niniliti duktek werek ernogo, o arar ari waganem, akuni agar taga yoma obok nen Yesus Kristus Nggok mende Kar ar o, nen ebe Ar Allah Endaga Mbogor Raja Ndilninakwa o yiluk inilu arugun o.

¹⁴ Ar ebe nir ninake, nir maduk ekwi werekma nen, ndil ninabik nen yiluk watari wagage o. Nir ninebe maduk mo welagunem wagage nogo, ar akburi maduk agode yugu dogolir, pano erir lagu dogowak nen yiluk, erogo binani wagage o.

¹⁵ Wene etoma obogar emeriran o. Akuni nen kebe tebelogo bagagunem, kalon togo emeriraga dogolir, kinaruk kulini yiluk inaruk waka, dirogo mor-mor erinaka eka dogono o.