ROMA 3 - PANO WENE YABUNGGA ERIGIN YIRIGE MENDE

Ir Yahudi mende Ar Allah nen bagarek dogir taga wene

¹ Eta kalok, Yahudi mende akuni etarurak eti enggen mende nena? Nen sunat ekwi awene mutok ekwi kalok, wene enggen mende nena?

² Eta ake wene enggen mende ambigar werek o. Alep ir ap Yahudi inoba nggwe tu, Ar Allah Ane wurabi wagage o.

³ Ir ap Yahudi mende amberak nen wene inoba wurabi wagage eti, dambe kugwi dalok. Ar Allah nen ir inebe dambe dagin a?

⁴ Eterogon erigin dek o! Akuni obogar inenggal yogwa arar o. Nen Ar Allah ebebar mende arar o, ma Alkitab mbalek paga yegerogo yirige, “Kar kwak eti kane paga ebebar mende arar andagwi, nen Kar kuwak dolku dogolir kalok, ndak dek mende erogo bagagun mondok dek arar o.”

⁵ Ar Allah nen nir maduk ekugu paga ninuwak dolkanem, nir wene onggo nenggerogon yurak? Allah nir ugun ar anggin mende ninoba bigin a? Wene ya akuni nen kinok yumo, yu ndak-ndak ar o.

⁶ Eta ndak-ndak dek arar! Ar Allah wene ndak-ndak ar ma nggedok eritagodek kalok, nenggerogon Allah nen akuni yoma inuwak dolurak?

⁷ Inobabur maduk ekwi paga, Allah obabur ebe mende nggok wigak yega kalok, bi wakwi o. Nenaluk akuni wene maduk ekwi mende eti, kir maduk mende o yiluk inuwak denogo bagwi paga arar o.

⁸ “Wene pano mende kenam aruwak nen, nir maduk eruwok o,” yiluk nir nen yurak ndak dek a? Ir akuni amberak nen, an wene maduk noba buru dogolir, etegerogon yege o, yiluk yonugwi o. Ma ir akuni etegerogon yonugwi mende etoma, Allah nen inoba hukuman bigin kalok, ndak negen ar o.

Ir akuni obogar eti maduk ekwa arar o

⁹ Yogo, nir akuni Yahudi mende yi pano a, ir akuni yahudi dek mende pano a? Eta ndak-ndak dek o. An alep nen yokeraga dogolir, akuni Yahudi mende inom, akuni Yahudi dek mende inom, maduk nen tebelogo balok welagage o, yiluk yorkeragi o.

¹⁰ Alkitab mbalek paga nen yega dogolir, “Ap ambi nen ebebar mende dek arar o,

¹¹ Akuni ambi nen ogwe akla nggagalek dek ar o, Nen ir akuni Ar Allah apma tebe yiluk wogok bega dek ar o.

¹² Ir akuni nen Ar Allah monogo mbo biluk, tuan adik paga lagugwa mende, Ir obogar bulagugwama o, Ap ambi nen pano ebebar mende erudek ar o, ar ambi kwak nen ogwe dek ar o!

¹³ Ir inenggedobak kuburan ande kurik ndak-ndak, inakda paga wene inenggal tam warir nugwi, wado mende bisa kwak inandema nen akuni inabok mbalir nugwi.

¹⁴ Inandema nen akuni puduk padak yiluk, nggamo bagwi.

¹⁵ Akuni maduk erogo baurak paga inom, nen inebe inarurak paga inom, iniyok anggin dek ibar-ibar lagwi o.

¹⁶ Miyak denggak etaru paga inom nen anggin panggin kodau paga inom, ai ndulir nugwi.

¹⁷ Pano adeknggen dogorakma nggwe, ir inil mbuk aga,

¹⁸ nen Allah keyagwi waru inom inonggokdek agagemo o.”

¹⁹ Yogondak ir akuni agama Yahudi wene kindirik paga, ir inendaga mbalek werek mende, inebe obogar wene kindirik apma agarikma, Ar Allah nen wene yeganem, akuni amberak nen wene onggo yurak mondok dek o.

²⁰ Agama wene kindirik mende erir lagunem, Ar Allah inom pano dambulurak dek o. Ogwe wene kindirik eti nen, akuni kinebe maduk akuni mende arar yiluk yoraga agarik o.

Akuni ebebar andagwi paga, Ar Allah nen ebebar erogo bagin wene

²¹ Nen, yogondak Ar Allah nen akuni ninom pano dambulik dogowak nen yiluk, tuan kwarkige o. Tuan kwarkige eti agama Yahudi wene kindirik paga degar o. Buku Musa wene mbalek paga inom, nen nabi-nabi wene yirugwa paga inom, telekma erogo birugwa o.

²² Allah nen ir akuni Yesus Kristus oba ebebar andagwi paga, Allah inom pano dambulugun o. Allah nen akuni obogar Yesus oba ebebar andagwi mende inelokte medaligin dek o

²³ Akuni obogar maduk ekugwa paga, Ar Allah nen ndilinaburak paga, walegar ari lagage o.

²⁴ Ar Allah akuni ninakba nen, ninom pano dambuluwok nen yiluk, we onggo dek wedek ar wokninakige eti, ebe Ar Yesus Kristus nen, akuni kede warek mende pigalogo binagagin eti arar o.

²⁵ Ar Allah nen Kristus Yesus watarumo, ar amep paga, nen akuni ar oba ebebar yiluk andamo, inomaduk inoba nggorigin o. Ar Allah nen, wene arkma dirogon eka inilu eruwak yiluk ekige. O pagane etoma, akuni maduk ekwi dagik, warinakikdek, yanggorogo togorek welagage.

²⁶ Yogondak ar nen maduk nggarelka paga, arkma nggedok eka ninilu aruwak yiluk, erir taga o. Eta eka paga, ar ebe ebebar ekwa o yiluk, nir ninilu dega, akuni Yesus oba ebebar andagun mende, ir nen Ar Allah inom dambulkwi arar o.

²⁷ Ebe eta paga, nir nen an nggok kar nggok yurak ndak dek o. Eta nena ekoma? Nir nen agama Yahudi wene kindirik ekoma a? Dek o. Nir ebebar andago paga, Allah ninom dambulik dogogun o.

²⁸ Wene ebe odo mende yi o. Agama Yahudi inawene kindirik ekwi paga, Ar Allah ninom pano dambulugun dek o. Arte nir nen, Ar Yesus Kristus oba ebebar andagun paga, Ar Allah ninom pano dambulugun o.

²⁹ Ar Allah eti, ir Yahudi mende inadik inombae a? Nen ir akuni Yahudi dek mende inombae Allah inom ar dek a? Ebebar, ir akuni Yahudi dek mende inombae Ar Allah mban arar o.

³⁰ Ar Allah ebe ambi ar. Allah ambi nen ar, ir ap Yahudi mende ebebar andagwi paga, Ar Allah inom dambulugun o. Ir akuni Yahudi dek mende, ebebar andagwi paga, Ar Allah inom dambulinaka, eterogo erir taga o.

³¹ Eta nir Kristus oba panggolkwi dogolir, agama Yahudi inawene kindirik mbo dambe kuwok a? Dek o! Nir nen ebebar andago paga, agama wene kindirik eti alon palogo dogowok o.