MATIUS 28 - PANO WENE YABUNGGA ERIGIN YIRIGE MENDE

Yesus iluk agage wene

¹ O hari Sabat arar eku lagugwarik, o keyalek mondok, hari Minggu paga, Maria Magdalena o, Maria ninggalok mende ambi o, ir kuburan inil kuwok nen yiluk, bika lagugwa.

² Lagugwarik paga, inagur bikbak lugur nggok mondok eka dogolir, ar malaikat mende ambi mbogor paga nen wura waga lagagerek, nggir tu anggin maduk larek enogo danggulogo lakbiluk, tu ebe paga korek tari wagage o.

³ Nen ar malaikat enogo eloktenggen mbogor tedak talek nen iyom eloktenggen putih yugu karugwa.

⁴ Ir ap tentara tuam barugwa mende yemenogo, ir inobade nggok mondok ertatuk, inaganak eku dogolir, akuni warek negen ertatuk welagwi darugwa o.

⁵ Nen ar malaikat enogo nen kumi nogo wene yoraga dogolir, “Kinobade arugup o! Kir nen Ar Yesus o kari karo paga warogo bega enogo, ebe kwarir wagop an nilu o.

⁶ Nen Ar ebe yoma dek o. Ar pagane yirige ndak-ndak, obok iluk aga o. Ar warek winogo begama kinil bika watni o.

⁷ Yogondak ya, kir ibar kinuma lani o, lalok Ar aworomi yorano o, ‘Ar obok iluk aga o, nen yogondak Ar alebagik Galilea paga laga o, nen Ar ebe etoma werekma kinil ka lugun o,’ An wene yorkeragi mende etoma kinakla mi arugup o.”

⁸ Ir kumi enogo, ibar-ibar kuburan dambe kalok arar lagugwa. Ir kumi enogo inakla adeknggen karugwarik ogwe inobade inom-inom ar, Ar Yesus aworomi enogo yorau ake paga, ir enogo mbu mondok arar lagugwa.

⁹ Lugu nanggugwa, Ar Yesus enogo, kumi yemenogo inoba kenam atuk yoraga dogolir, “Wanelak!” yiluk yoragagemo, ir kumi yemenogo Ar oba arar panggo yi wagu lagugwarik, Ar iyok kudik kambuk pago dogolir, Ar ebe wogok dirugwa.

¹⁰ Eku nanggugwa, Ar Yesus nen yoraga dogolir, “Kinobade dek o, An nogari ir o Galilea etoma ninom abuk atuk, inil neyawak nen, kir ibar-ibar etoma lowak nen yora lani o,” yiluk yoragage.

Ir ap tentara tuam welagugwa mende nen yirugwa wene

¹¹ Ir kumi enogo lagu nggodek, ir tentara kuburan tuam welagugwa mende yemenogo ambetak, ap imam-imam inewai inoba, wene etagage mende yemenogo mbililogo yora lagugwa.

¹² Yora lagugwama, ir imam-imam inewai enogo nen, ir ap Yahudi mende inewai yemenogo obogar inom, ir inane dambul dugu lagugwarik, ir ap tentara wene etagage mende enogo mondok mbililugup o, yiluk enggangga pakalok ar onggo wogoragugwa.

¹³ Wogoralok wene yoragu dogolir, “Kir nen yuwok nen yiluk kalok, Ar Yesus ebe, nir kukbagane nogo yugwi ninagik, Ar Aworomi nen kiratuk wulkama o, yiluk kinane obatne togo ar yurak o, yiluk inaruk wagugwa.”

¹⁴ Nen ar Gubernur wene yi aruk kolaligin kalok, kir kinoba maduk anggin ekinaka kau, nir nen iliti pano erugun o.

¹⁵ Yoragugwama, ir tentara kuburan tuam welagugwa mende yemenogo, enggangga yemenogo waganggu lagugwarik, wene ir eru mende yorarugwa ndak-ndak arar ekugwa. Eti paga ma, wene eti ir Yahudi mende nen, ar nin yogik yir wagwi dagik, yogondak kudi arar o.

Ar Yesus mutok lagwi mende inil kowak nen yiluk inoba kenam agage wene

¹⁶ Ar Yesus mutok lagwi mende enogo, Ar Yesus nen yirige ndak-ndak, o Galilea kur paga etoma arar lagugwa.

¹⁷ Lagugwa mende, Ar Yesus etoma werekma, ir inil ka lagu-lagugwarik, apma tebe yiluk, Ar pogorakugwa. Ogwe ir inom mende ambi, ar iliti ebebar mondok andalokdek welagage o.

¹⁸ Nen Ar Yesus inoba panggo yi laga lagagerek, wene yoraga dogolir, “Mbogor paga o, agar paga o, obatne werek inggi pago dogu werek, An arar noba begemo o.

¹⁹ Etiar ma, kir nen ye ap nde ap inuma, o ye ai nde ai etoma arar lani o, akuni etoma nen, An mutnarek lagu dogowak nen yiluk ekbano o. Ir etoma, An Nombae endaga paga, nen Akbur endaga paga, nen Roh Kudus endaga paga, ir inebe ima wukbano o.

²⁰ Wene An yokeragagi mende yemenogo obogar, dikbiluk eku dogowak nen yiluk, emerirano o. Nen kinakla eberek togo o, An kinaruam ninggi nanggi ninom nugwi kigik, o irep kudi ari ligin o,” yiluk yoragage.