MATIUS 21 - PANO WENE YABUNGGA ERIGIN YIRIGE MENDE

Ar Yesus o Yerusalem onggega kigik pogorakugwa wene

¹ Ir kur Zaitun paga, o endaga Betfage eta, Yerusalem unggu paga panggo yi lagugwa. Eta ari lagugwarik, Ar Yesus mutok lagwi mende, inebe mbere inalep lakbarige.

² “Yogo kir kimbirak, o kinilka paga etomala, lani o,” yiluk yoragage. “Etoma lugun mende, keledai ambi ak imbirak, nggombi kunik etnaga dalok kalok, nggombi eti pigalogo nen, imbirak wogorek watno o.

³ Nen ir akuni etoma nen, kinok yokiragwi kalok, ‘Ar Tuhan eru negen werek agama o’, yiluk yorano. Nen etegerogo, yugwi kinalok, ir akuni etoma, arar lani o, yiluk yokeragun etnaga o.”

⁴ Wene eta ekugwa eti, ap nabi ambi nen, wene yirige ambi oba dik yuak nen, yiluk ekugwa o. Ma wene yirige mende ebe yegerogo,

⁵ “Raja kar mende koba waritaga endi o, yiluk ar Sion kinane yokni o. Ar ebe iliti tebelek mende ma, keledai ngge leraka mende paga dagaluk, waritaga endi o, yiluk yokni o.”

⁶ Yiluk yorarigemo, ir enogo imbirak arar lagugwarik, Ar Yesus nen yoragage enogo ndak-ndak arar ekugwa o.

⁷ Ir enogo arar keledai ernogo, ak imbirak wogonarek arar wagugwa. Nen ar keledai enogo amburuak paga, iniyom jubah nggorogo ndal dirugama, Ar Yesus korek tari dagarige o.

⁸ Nen ir akuni pakalok iniyom jubah yugu mende, nggoro nen tabul ndalir lagwi, ir amberak, o enggalokbak mbalogo tuan paga ndalir wagwi, ekugwa o.

⁹ Nen Ar Yesus eloktekma amborna lagu dogolir, “Daud Akbur waga o! Ar Tuhan endaga paga waga eti, adeknggen oba buak o, Ar Allah lektek mende ma, endaga wogokbuok o! yiluk yirugwa.”

¹⁰ Nen Ar Yesus o Yerusalem onggega kwakbiluk, akuni Yerusalem paga welagwi mende obogar, inilu atuk, “Yi ta waga?” yiluk kinok yadi ndadi ekugwa.

¹¹ Yugu nanggugwa, ir akuni ambetak inom lagwi mende yemenogo nen, “Nenaluk, yoma ar Nabi Yesus, ai Nazaret, o Galilea mende o,” yiluk yorarugwa.

Ar Yesus Tuhan Ai Palekma unggirige wene

¹² Tuguluk Ar Yesus Tuhan Ai Palekma, onggega lagagerek, ir akuni ye mende nde mende onggo mbaldigik, kundigik, ekwi werek ma, mugogo wuldaga dogolir, meja ndalek uang tukar ekwi mende a, bangku-bangku tewe merpati onggo kuninakwi mende a, abel dagak pagak enago mende inom, nggililogo wulinakige.

¹³ Ekbega lagagerek, akuni yemenogo yoraga dogolir, “Ar Allah nen yirige mende, Alkitab akla mbalek yegerogo werek o, ‘An Nai palekma etoma, tamban erir tagama, yiluk yugu dogogun o.’ Wene yirige eti werek kigik ar ogwe, kir o yoma, ye maduk nde maduk eku dogu amene palogo bogop kwak yi! yiluk wenemuk yirige o.”

¹⁴ Etanogo werek ma, ir akuni inil mbuk mende, inom, iniok tuan lakbuk mende inom, Ar Yesus oba Tuhan Ai Palekma wogonarek wagugwama, Ar Yesus nen inoba pano erogo barige.

¹⁵ Ogwe, ir ap imam-imam kepala inom, guru-guru agama inom, Ar Yesus erukbuk mende, ekige yemenogo inil kugu lagugwarik, ir wenemuk pakalok yirugwa. Itiar dek ogwe, Tuhan Ai Palekma yemenogo, ye elege nde elege pakalok, inane lambedagi waku dogolir, “Daud Akbur a!” yiluk amikmir yirugwa paga, ir ap enogo wenemuk pakalok ar yirugwa o.

¹⁶ Ir ap yemenogo nen Ar Yesus yogu dogolir, “Elege inane yitagwi etoma, karuk kolaken a?” “Ye o, An naruk kolali taga o,” yiluk yoraga dogolir, “Kir ayat Alkitab: ‘Elege bugudak ndak inom, auwan inagwelak inidak paga inom, ndai paga, keyagi pano mondok waku dogowak nen yiluk, An emeriragin? yirige etnogo, kir nen endaga talkikdek a’?”

¹⁷ Yega lagagerek, Ar Yesus ir dambe dalok, wulka lagagerek, o Betania etoma, nogo yigik mbo arar lagage.

Ar Yesus o ara pudu logo birige wene

¹⁸ Kubenengge o keyalek, Ar Yesus iyok paga kota nggwe laga dogolir, Ar erom abu agage.

¹⁹ Nen laga dogolir, tuan eragalu etoma, o ara edo ambi il karige. Kalok edoma lagage mende, enggaga kwak werek ogwe, enggen yugu kwak mondok dek arar ka lagage. Kega lagagerek, o ara enogo yoga dogolir, “Kar o yi kenggen yirigin mondok dek arar o!” eta nogo yega kigik, o ara enogo taber liyok togon arar ekige.

²⁰ Ar Yesus mutok lagwi mende yemenogo, o ekige enogo inil kugu lagugwarik, wee, yiluk, bi ambik wakugwa. Bi waku dogolir, “Ar o ara yi, wene yoga kigik, lok-lok ar mbuk aga yi, nenggerogon nda?” yiluk kinok yirugwa.

²¹ Yugu nanggugwa, Ar Yesus nen yoraga dogolir, “Ebebar mondok o, kir kiniliti ebebar andagwi eti, we yiduk mbere negen dek ar kalok, kir An o ara yi eki ndak-ndak, eru ndak ar o. Nen itiar dek ogwe, kir nen yogu dogolir, ‘Ado yi lek kalok nen, nggililogo laut ima etoma tebelari lan o,’ yiluk yugwi kinalok, mondok etarigin ar o.

²² Kir nen ye mende nde mende, tamban paga tu nggino yuwok nen yiluk kalok, kiniliti ebebar andalok nggino yugwi kinalok, kir nggino yugun mende eti, wokiragin o.”

Wene Ar Yesus obatne mende kinok yorugwa wene

²³ Tuguluk Ar Yesus, Tuhan Ai Palekma iyok paga wagagerek, akla unggi lalok wene emeriraga lagage. Yemetnogo wene emeriraganem, ir ap imam-imam kepala o, nen ap Yahudi mende inewai o, Ar oba wagugwarik, Ar kinok yogu dogolir, “Kar ye wene nde wene yoma, edo nggi panggo biluk erir tagan? Nen yoma, Kar ta obatne wokige paga, erir tagan?”

²⁴ Yiluk yorugwama Ar Yesus nen onggo yoraga dogolir, “Eti kalok An ogwe, kir kinok negen ar ambi yokirak o. Nen kir An wene onggo yoknugwi kinalok, An wene ta nen obarne wonege paga, ye wene nde wene etoma, erir lektaga eti, yokeragin o.

²⁵ Ma wene ebe yegerogo: ar Yohanes enogo ta obatne wogorige paga, ir akuni ima wukbaga lagage? Ar Allah nen a, akuni nen a?” Tuguluk ir ap imam-imam kepala inom, nen ir ap Yahudi mende inewai inom, wene ngguruk inadik yegerogo yirugwa, “Nir nen, Allah nen obatne wogorige paga yumo, Ar nen, kir ar oba nenaluk kiniliti panggol digikdek, yiluk yoneragin?

²⁶ Ogwe nir nen, ‘Akuni nen obatne wogoga paga o,’ yiluk yumo, nen ir akuni yoma nen, ar Yohanes eti nabi mende arar yugwi ma, akuni pakalok nen kwak, nggi yokneragun nda.”

²⁷ Yiluk yugu lagugwarik, ir wene onggo yogu dogolir, “Nir nenggokdek o,” yiluk yorugwa. Yorugwama Ar Yesus nen onggo yoraga dogolir, “Eti kalok, An ogwe ta nen obarne wonege paga, yoma erir netaga eti, kir yokeragin mondok dek ar o.”

Elege mbere inoba lirogo yorarige wene

²⁸ Ar Yesus nen wene ugu yoraga dogolir, “Yogondak wene yi, kir kinakla paga nen nenggerogo kinakla andagun, kinaruk dogoni nda?” yiluk yoralok yega dogolir, “Ap ambi akburi wadigi, inebe mbere welagugwa. Ar ap enogo akbur manggwiya kwak nen oba lagagerek, wene yoga dogolir, ‘Nakbur o, kar yogondak anggur yabula, ibar yabu eri lan o.’

²⁹ Yiluk yorige mende, elege enogo wene onggo yoga dogolir, ‘An na'ir o,’ yiluk yirige. Yirigerek ogwe, yabongga akla ebeka lagagerek, tuguluk anggur yabula yemenogo yabu eri lagage.

³⁰ Ar ap enogo, tuguluk akbur yabongga mende enogo oba lagagerek, wene etegerogon ar, yorige. Yorige mende, elege enogo onggo yega dogolir, ‘Wa nombae, kalok an ligin o,’ yiluk yirigerek ogwe, ar elege enogo nen lau arar dambe karige o.

³¹ Etiar ma, elege inebe mbere eti, inombae akla andarige mende, ta kwak ekige?” “Manggwiya kwak o,” yiluk ir ap imam-imam kepala o, nen ap Yahudi mende inewai o, nen wene onggo yorugwa. Yorugwama, Ar Yesus nen, onggo yoraga dogolir, wene kinilu togo dogono o, “Ap pajak kuwak ekwa inom, nen kumi ndononggwa ya wokbagik mende inom, kir lemelogo binagaluk, ir ndak Ar Allah akburi arugun o.

³² Nenaluk, ar Yohanes enogo waga lagagerek, akuni Ar Allah iliti andega ndak-ndak, dogitaga mende emekira wagagerek ogwe, ar wene emekira wagage mende, kir ar oba ebebar andalok dek o. Ogwe ir pajak kuwak ekwa mende inom, ir kumi ndononggwa ap ya wokbagik mende inom, ar oba iniliti ebebar andarugwa o. Kir etoma obogar kinil kugwi ar ogwe, kir kinakla andagwi dek ar o, nen Ar Tuhan oba ebebar andagwi dek ar o,” yiluk yoragage.

Anggur yabu eku lagugwa inoba lirogo yirige wene

³³ Wene enogo yoralok, Ar Yesus wene ambi inom, yoraga dogolir, “Wene oba lirogo ambi yi, kinaruk kulini o. Ap ambi agar bugudak negen ar onde werek ma, anggur ai yakige. Yakbiluk leger palogo malaka, anggur amburu peralku dogowam, agar kuluka, nen tuam waku dogomo, nggayo mendaka, ekige. Erogo biluk, ebe akuni inoba sewa erogo balok, ar o kuri ninimo ar lagage.

³⁴ Ar ap enogo nen, ar ayedoman mende anggur enggen mbalu amor-amor ari wagagemo, ir akuni anggur ai yago, sewa ekugwa werek enogo inoba, ar ake onggo barugwa mende wogorawak nen yiluk, ir inoba lakbarige.

³⁵ Lakbarigemo wagu lagugwa, ir ap yabu sewa ekugwa erek enogo nen: ar ambi ndugi ndamuk pamuk wakwi, amberak mondok min inakwi, amberak mende nggir paga ndamuk pamuk warinakugwa.

³⁶ Etegerogon ekugwa ma, ar ap ernogo, ye lakbok yiluk, akuni ar ayedoman mende inebe yuk negen dogalek, lakbarige. Lakbarige mende, ir enogo ogwe etegerogon ar erinakugwa.

³⁷ Etegerogon mban ekwi agagemo, ar ap agar onde werek ernogo, akla andega dogolir, ‘An nakbur kwak lakbumo, ar alon palogo wogorugun,’ yiluk akla andega lagagerek, ar akbur arar ir inoba lakbirige.

³⁸ Ogwe, ir ap yabu sewa ekugwa werek ernogo, ar agar werek akbur etnogo wagage inil kalok, ar nin yogik yugu dogolir, ‘Yogo nanonggal, ombae watarumo akbur yi ar onde arigin ma, akbur yi mondok min ar waruok, wakbiluk yabu erek yoma, nir onde aruok nen yiluk yirugwa.’

³⁹ Yugu lagugwarik, ar akbur enogo pagago, abel tekman likalok bi wulku lagugwarik, mondok min ar wakugwa o.”

⁴⁰ Wene yi yoralok irep paga, Ar Yesus enogo wene ebe yoraga dogolir, “Yogo, ar ap agar onde werek ernogo, iyok paga watuk, ar nen ir ap agar sewa ekugwa werek yemenogo, nenggerogo erinaburak kogop?”

⁴¹ Ir onggo yogu dogolir, “Ir ap maduk mende eti, takbok togon, min arar war inaburak o. Wakdalok, eyabu erek eti, onggo ndak-ndak o kudi warek paga, wogogu dogowak nen yiluk, akuni wedek mende wogoraurak o.”

⁴² Yirugama ar Yesus nen yoraga dogolir, “Alkitab akla diru mbalek etnaga, kir ambi endaga talkugup a, dek a? ‘Ar ap tukang nen o palka dogolir, nggir ambi ndinogo birige mende obok unggune arar etaga o. Yi Ar Tuhan nen, pani pano mondok arar eke o!’ ”

⁴³ Yega lagagerek, Ar Yesus nen yoraga dogolir, “Kinakla eberek togo o, Ar Allah akburi yiluk, erogo binagarige mende eti, ndilogo wokbiluk, ir akuni ninggalok mende ar, Ar Allah ane yugu ndak-ndak dik duk, eku dogowak nen yiluk wogoragin o. [

⁴⁴ Ir akuni nggir enogo paga watagun mende eti, ndamuk pamuk mondok watagun o. Nen ir akuni nggir eti paga, tebelinabigin mende eti, al mburalek wul mokmok ar etarugun o.]”

⁴⁵ Ir ap imam-imam kepala o, nen ir ap Farisi mende o, Yesus wene oba lirogo yirige mende yemenogo, ir inoba lirogo yorataga, yiluk inilu agage.

⁴⁶ Etanogo yirigemo, ir ernogo, Ar paktawok nen, yiluk ekugwa. Ogwe ir akuni pakalok nen andugu dogolir, Ar Yesus eti nabi andugwi paga, inobade agage.