MARKUS 11 - PANO WENE YABUNGGA ERIGIN YIRIGE MENDE

O Yerusalem paga Yesus yade dirugwa wene

¹ Ar Yesus inom lagugwa mende enogo, o Yerusalem unggwi lawok nen yiluk, kur Zaitun alilu, o kota Betfage o nen o Betania o, etoma panggo yi lagugwa. Nen o etomala dogolir, Ar Yesus nen, Ar Mutok lagwi mende inebe mbere alebagik lakbarige.

² Lakbaga dogolir yegerogo yoragage, “O kampung kinilka paga etila lani o. O kampung etila ari lalok, keledai ak ngger lerago, amburuwak paga akuni yarugogo auwan wogorek lagikdek mende ambi nggombi kunik eta werek enaga, kir kede pigalogo wolok warno o.

³ Ir akuni nen, kir keledai yi nenaluk kede pigalir tagwi o, yiluk yokiragwi kalok, wene yegerogo yorano, ‘Ar Tuhan nen eru ambi werek agama o, ma arar ekbiluk kalok, wolok akdipmo bi warugun o,’” yiluk yorano o.

⁴ Etegerogo yoragagemo, ir enogo arar lagugwarik, keledai ak ngger leraka enogo, o tukandema nggombi yidilik tuan eragalu werekma, ir nen keledai enogo kede pigalkugwa o.

⁵ Ir ap o eta welagugwa enogo nen, ir kinok yoragu dogolir, “Wadigi yi, kir nena erir tagwi? Keledai ak ngger leraka endi nenaluk kede pigalir tagwi?” yiluk yorarugwa.

⁶ Ir nen wene onggo yegerogo yorano o, yiluk Ar Yesus nen alebagik lakbaga dogolir yirige enogo ndak-ndak ar yorarugwa o. Yoragugwama, ir nen yugu dogolir, kalok arar wolok lani o, yiluk yoragugwama, ir enogo arar wolok lagugwa o.

⁷ Keledai enogo Ar Yesus oba wolok wagugwarik, nen keledai enogo amburuak paga, ir iniyom jubah nggorogo, ar Yesus korek taruam tabul ndalogo birugwa. Tabul dalogo birugwama, ar Yesus yomanogo korek tari dagarige o.

⁸ Ar Yesus obok korek tagagemo, ir akuni pakalok iniyom jubah nggorogo nen, tuan nggok enogo paga ndalir lagwi, nen ir ambetak o alokbak enggaga kunik yabumo mende waganogo ndalir lagwi,

⁹ etegerogo ekbiluk, Ar enogo laga kigik, ir ambetak inalep ilka paga lagwi, nen ir ambetak yabongga, Ar amborna nggwe lagwi erir lagu dogolir, “Hosana! Ar Allah nen ninewe endaga mbogor lakbi wagage yi, endaga woguk duwok o.

¹⁰ Ninumbu Daud apma balok welagage enogo akdikmu yabungga menik nen yiluk warir taga ma, Ar Allah endaga mbogor eti ar woguk duwok o,” yiluk inamikmir agan lagugwa.

¹¹ Yiluk namikmir agan, o Yerusalem unggwi wagu lagugwarik, Ar Allah Ai Palek ma unggwi lagugwa. Unggi lagugwarik, ar Yesus enogo ye mende nde mende, il yambenir lagage. Nen o ki arik nen yiluk ertarigi nanggige, Ar mutek lagwi mende ap dua belas enogo inom, o Betania arar unggwi lagugwa.

Ar Yesus nen o ara edo mbuk arin yiluk yorige wene

¹² Nogo yiluk kubenengge, o Betania nen tuan paga lagu dogolir, erom abu agage o.

¹³ Erom abu arigi nanggige, ar Yesus enogo loknengga nen, o ara ambi engga nggok mudi-mudi mondok il lakega lagagerek, o enogo enggen yugu a, dek a, yiluk o enogo edoma korok-korok il birka lagage mende, enggen yirurak o auwan ma arar ma, enggen yugu dek, we enggangga mban dabolek il ka lagage.

¹⁴ Enggangga dombok il kega lagagerek, o arar ebe enogo yoga dogolir, “O yogondak kudik yi nen, kar kenggen akuni ambi nugun mondok dek arar o!” Yiluk etegerogon yoga, ir Ar mutok lagwi mende enogo etegerogon yoga inaruk kolkugwa o.

Ar Yesus Allah Ai Palek ma unggwi lagagerek nggarelkige wene

¹⁵ Ar Yesus mutek lagwi mende inom, o Yerusalem lagugwarik, Ar Yesus enogo Allah Ai Palek ma unggi lagage mende, ir akuni Allah Ai Palek ma yemenogo, ye mende nde mende wolok bi unggiluk, onggo kunggwi, onggo mbalogo kodagwi, ekwi yomanogo mugogo wuldaga dogolir, ir rupiah onggo-onggo erir taga mende inao ndalek mende inom, ir tewe merpati onggo inoba birtaga mende inao bangku ndalek inom, limik-lemek erogo wul dakige o.

¹⁶ Wuldaga lagagerek, Kir Allah Ai Palek ma yoma, ye mende nde mende wolok wulkik unggigik erugup o,

¹⁷ yoraga lagagerek wene emeriraga dogolir, “An nai palek yi, ye akuni nde akuni inalebunu dombok etoma nen, ir tamban eku dogomo ai palek yi arar o, yiluk yugu dogogun o, yiluk Alkitab akla diru mbalek o. Ogwe kir nen o, ap inilmudu waganiluk, kode kirak tari lektagama ndak-ndak erogo biluk ekwi kigi o,” yiluk yoragage.

¹⁸ Wene yorarige enogo, ir guru-guru agama inom, nen ir imam-imam inom, inaruk kolalkugwa o. Ir wene yirige enogo inaruk kolalku lagugwarik, ir akuni obogar kuak erek enogo wene emeriraga paga bi waku lagugwarikmo, inobade agu lagugwarik, nenggerogo waruwok yiluk, abok mbalkugwa o.

¹⁹ O ki agi nanggige, Ar Yesus mutek lagwi mende inom, o kota yomanogo nen, wundi lagugwa.

O ara edo mbuk agage o, nen tamban eku dogorak ake yirige wene o

²⁰ Wundi lagugwarik, nogo yiluk, kubenengge o keyalek tuan paga wagu dogolir, o ara enogo edo inom omanggen inom obogar mbuk agagerekmo inil karugwa.

²¹ O mbu agage enogo inil kugu lagugwarik, ar Yesus nen o enogo pudulogo yogwa ar Petrus aruk kolkirekmo, akla Eberka lagagerek, nen yoga dogolir, “Nombae Guru wae. O ara pudulogo begen enogo arar mbuk etaga yi, kil bikan o!”

²² Yorigi nanggige, ar Yesus nen yoga dogolir, “Kiliti Ar Allah oba panggol diluk, ebebar andaga dogon o.

²³ Kiniliti yunggu digik kwak dek, ogwe mondok ebebar andagu dogolir, ‘Kur nggok yi al kenogo, i laut enggelekma etoma arar ari lan o!’ yiluk yogwi kalok, kinane yugun enogo ndak-ndak arar eka kinil kagun o.

²⁴ Kir tamban eku dogolir, ye mende nde mende nggino yorugun mende etoma, Ar Allah nen muk woknege arar o, yiluk ebebar andagwi eti paga, arar wokeraga kugun o.

²⁵ Nen kir nen tamban eruwok nen yiluk ogwe, ap ambi kinom agorek kina'ir andagwi kalok, ar ap kinom agorek enogo ndak maga biluk, kinom dambul diluk, etegerogo kinom dambulurak o. Eti erugun paga, Kinombae mbogor paga werek enogo nen, kir maga binagaga dogoluk, kinomaduk dek erogo binagagin o.

²⁶ [Kir nen akuni ambetak maga bagun dek kalok, kir Kinombae mbogor taga werek enogo nen, kir kinomaduk enogo dek erogo maga binagagin dek ar o.]”

Ar Yesus kar ta obatne paga erir netagan yiluk kinok yorugwa wene

²⁷ Yoraga lagagerek, tuguluk, Yesus aworomi inom iniyok paga, o Yerusalem lagugwa. Wagu lagugwarik, ar Yesus enogo, Allah Ai Palek ma onggega lagagerek, welaga kigik, ir ap imam-imam kepala inom, ahli-ahli Taurat inom, ap tua-tua inom, ar uwagam wagugwa.

²⁸ Oba wagu lagugwarik, wene men yorugwa; “Kar ye ekik nde ekik erir tagan yoma, ta gwak obatne paga eka agandik? Nen, ta nen obatne workege paga erir tagan?” yiluk yorugwa.

²⁹ Yorugu nanggugwa, ar Yesus nen, “Yogo an wene ambi kinok yokerak o. Ma kir nen wene onggo yornugwi kinalok perak, ta obatne paga eka agarik eti, An nen bagalogo yokeragin o.”

³⁰ Yiluk yoraga dogolir, “Ar Yohanes ima wukdaga lagage enogo eti, Mbogor paga nen yorige paga wukdaga lagage a? Akuni nen yorugwa paga ima wukdaga lagage a? Kir nen yonitni nda!” yiluk yoragage.

³¹ Yoragi nanggige, ir-ir wene mbalku dogolir, “Nir nen, ‘Ninombae Mbogor paga nen yorige paga eka lagage o, yiluk yogwi ninalok, ar nen onggo yigin eti, kalok nenagaluk kir kiniliti ar oba ebebar andagikdek welagop?’ yiluk yoniragin o.

³² ‘Tuguluk, nir nen, akuni nen yorugwa paga eka lagage o, yogwi ninalok, Eyo!’ ” Ir akuni obogar nen, ar Yohanes eti ap Nabi mende o, yiluk andugwi ma, nenggerogon yoruwok.

³³ Yiluk inane dambulogo, Ar Yesus yogu dogolir, “Nir ninenggokdek o,” yiluk yorugwa. Yorugu nanggugwa, ar Yesus nen, “An ogwe ta obatne paga erir netaga eti yokeragin degar o,” yiluk yoragage.