LUKAS 17 - PANO WENE YABUNGGA ERIGIN YIRIGE MENDE

Akuni maduk ekwi edo wene

¹ Ar Yesus nen aworomi ane waganggwi mende yoraga dogolir, “Akuni yoma maduk eruak nen yiluk etari taga mende edo eti werek o. Ma, ar ap maduk edo wulabir taga eti, wene andugi edo oba bigin o!

² Ir akuni bugudakndak mende yoma, ar eti paga maduk eku dogu eti maduk o. Ma pano kwak eti, ar ap eti yigom paga engganok kede yidilogo nen, i laut akla etoma mbo lakbumo kwak perak, mondok pano arar o.

³ Eta ma, kir tuwam panorogo wakwi dogoni o! Kogar ambi maduk eka kalok, aruk watno ar o! Ap ambi nen an maduk eki o, nen yabungga erigin dek o, yiluk yega kalok, oba mi erogo dambe kalok, maga bino ar o.

⁴ Nen Ar maduk inggi tujuh paga, hari omanggi paga ar, kar koba maduk erogo bagaluk, nen inggi tujuh paga ar, kar koba watuk, ‘An maduk erkaki o, ma maga banu nggino yigi o,’ yiluk yega kalok, omaduk eberek dogu tagalogo dambe kalok, maga bino ar o.”

Ebebar andalok, oba panggolurak wene

⁵ Ir rasul-rasul nen Ar Yesus yogu dogolir, “Tuhan, nir niniliti koba ebebar andagwi eti panggolurak mende, kode erninabin o,” yiluk yorugwa.

⁶ Yorugwama Ar Yesus nen wene onggo yoraga dogolir, “Kir kiniliti ebebar andagop eti, ebe sesawi enggen eti ndak-ndak kalok, ‘Kir nen, o ara yi kenogo laut ima eloma yaktari lan o, yiluk yorumo, o ara eti kenogo laut ima etoma yatari ligin arar o.’ Ma o ara yi, ebebar kinane aruk kolaligin o.”

Ir akuni yabu mende nen eku dogorak wene

⁷ “Kir ya agokip mende yi kineyabu mende ambi, yabu ogode waganggwa mende a, nen domba pagarek dogirtaga mende a, kinoba uma warumo, kir nen, ‘Kagarom ibar name o, yiluk yorugun a’?

⁸ Dek mondok arar o! Kir nen yorugun kwak eti adigar, yogo an nagarom nau mende pikpuk erin o yiluk yorugun o. Nen tu pano mende yikbiluk, An erom inom, i inom, nengga nagik naruwam dogono o. Eta arar kalok, kar kagarom naurak ndak o, yiluk yorugun o.

⁹ Ar tuan mende ane yege mende diduk arar eka kalok, ar eyabu mende eti wogokdurak ndak dek etnogogi?

¹⁰ Kir eta ndak-ndak arar o. Kir nen yi erni yokiramo, yabu arar ekbiluk kalok, kir nen yugu dogolir, ‘Nir yi yabu mende arar o; nir nen nir eru mende adek erir tagwi o,’” yiluk yurak o.

Ar Yesus nen akuni inebe sepuluh u warek mende pano erinakige wene

¹¹ Ar Yesus o Yerusalem laga dogolir, tuwan o Galilea nggwe nen, Samaria podok togon lagage.

¹² Ar Yesus o kampung ambila unggigi nanggige, ir akuni u inagakdo paga pirik kulik idik wuwarek mende, inebe sepuluh paga Ar oba wagugwa. Nen ir inebe ndorogo negen ar mendek dogolir,

¹³ ir inane Ar Yesus yogu dogolir, “Tuan, Yesus wae, nir ninakba kande lak!” yiluk yorugwa.

¹⁴ Ir enogo Ar Yesus il daga lagagerek, Ar nen yoraga dogolir, “Kir ap imam-imam inoba, inil kinoba bikinawak nen lani o,” yiluk yoragage. Yorarigemo, inebe tuan paga auwan lagwi dagik, u inagakdo paga enogo arar dek agage.

¹⁵ Ir inogar ambi u oba arar dek agage kega lagagerek, iliti adeknggen nen, Ar Allah endaga ane nggogar wogokdir iyok paga waga lagagerek,

¹⁶ Ar Yesus apma ur wandu yiluk dogolir, ae wa, yiluk keyagi wakige. Ar ap eti, ai o Samaria mende.

¹⁷ Ma Ar Yesus nen yega dogolir, “Ir ap inebe sepuluh paga enogo inobogar u dek agiya a? Ir inebe nggoma werek?

¹⁸ Ar ap ninenggokdek mende yi adigar, Nenaluk Ar Allah wa yori waga?”

¹⁹ Yega lagagerek, Ar Yesus nen ap ir inogarak eti yoga dogolir, “Kar nen An noba ebebar andagen paga, u koba dek aga o, ma melatuk kuma lano!” yiluk yorige.

Ar Allah apma binaniluk eka dogogin wene

²⁰ Ir ap Farisi mende ambetak nen Yesus kinok yogu dogolir, Ar Allah o menda nen watuk apma binanigin, yiluk kinok yorugwama? Wene onggo yoraga dogolir, “Ar Allah o yoma apma binanigin eti, nir niniliti tenggelaruwak nen yiluk, ye ekik nde ekik, erigin dek o.

²¹ O eta paga, ir akuni nen yugu dogolir, ‘Kinil birka watni o, ar ebe yi o, ar ebe etoma kogo o!’ Nenaluk, Ar Allah ebe o yoma arar ap binaniluk agarik o.”

²² Eta welagugwarik, Ar Yesus nen aworomi yoraga dogolir, “Ar Akuni Inakbur mende ao telek kinil kau eti enam ari warigin ogwe, kir kinil kau ndak dek arigin o.

²³ Ir akuni nen yokeragu dogolir, yoma bika watni, Etoma bika lani! Yiluk yokiragwi kalok, kir nen kwarir lagup o.

²⁴ Bigalabok mbogor taga nen akbinak kibalabek keganem, akbinak o irep-irep wigak yitaga kwak, Ar Akuni Inakbur waru paga, kibak togo arar waga kugun o.

²⁵ Ogwe, Ar ebe ibibir kener ndak warka dogoluk, nen ir akuni o yogondak werek mende nen, Ar ina'ir kunugun o.

²⁶ Ar Akuni Inakbur ao telek ari waga paga, ir akuni inobabur, ar Nuh werek kigik eku lagugwa ndak-ndak etari warigin o.

²⁷ Akuni inarom nunggwi, inagwi nunggwi, kwe kodagwi, etegerogon erir lagwi dagik, ar Nuh to akla unggirige kudi. Nen i utuk waga dogolir, akuni etoma obogar i paga warinakige o.

²⁸ Nen ambi ar ap Lot werek kigik, akuni nen erom nunggwi, i nunggwi, onggo kunggwi, onggo mbalkwi, ai yakwi, o palkwi erir wagu lagugwa.

²⁹ Ekwi dagik, Lot Sodom dambe kalok wulka kigik, hari eti paga indu inom, indu enggen inom, mbogor paga nen wura waga dogolir, akuni obogar indu paga warinakige o.

³⁰ Ma, Ar Akuni Inakbur waga paga, o elokte eta ndak-ndak etarigin o.

³¹ O eta ari waga kigik, ir akuni o wadekngge paga dagaluk werek mende, uma inarunggan kodawok nen yiluk unggurak dek o. Ir yabumo werek mende, etegerogon ar uma iniyok paga laurak dek o.

³² Ar Lot agwe ekige ernogo, kinakla eberek togon o!

³³ Ir akuni nen ndil kodawok nen yiluk erugun mende, ir inebe ndilaurak ndak dek arar arigin o. Ogwe, ir akuni inebe dek erogo batagun kalok, ir inebe ndilkodagun o.

³⁴ Ebebar andugu dogoni o: kukbaga etinem, akuni inebe mbere nogo yugunem, ar ambi kwak wagangga, nen ar ambi kwak mbo bega, erigin o.

³⁵ Kumi mbere gandum enggen ndamul kunem, ar ambi kwak wagangga, ar ambi kwak damber kega, erigin o.

³⁶ Ap mbere yabu ekunem, ar ambi kwak wagangga, ar ambi kwak mbo bega erigin o,” yiluk yorarige.

³⁷ Yoragagemo, ir Ar Yesus aworomi nen kinok waganggu dogolir, “Tuhan wae, wene etoma, o nggoma nen etarigin mende yegen o?” yiluk yorugwa. Yorugwama Ar Yesus nen wene onggo yoraga dogolir, “Pidi mende ngga agarik eti, tewe pidi nonggwa eti, etoma ar dogirtaga mende o,” yiluk yoragage o.