LUKAS 16 - PANO WENE YABUNGGA ERIGIN YIRIGE MENDE

Ap uang aru mbale akla mudi werek mende oba lirik wene

¹ Yesus nen aworomi yoraga dogolir, “Ap ambi amende ambik welagage. Ar eyabu mende ambi, ap uang aru mbalu ilu mende nen auang pago welagage o. Ap agarek ambik ernogo, akuni nen yogu dogolir, kar keyabu mende eti, kauang obok takborake o, yiluk yorugwa.

² Ar nen ap uang aru mbale enogo ayonggo biluk yoga dogolir, ‘Kar kawene kolalki ya ebebar a? Yogondak uang eken mende obogar mbililogo dombok dombogar yornirin o. Kar nen bendahara an nauang yoma pago dogorak dek arar o.’

³ Ar uang aru mbale mende nen ebeka dogolir, ‘Eku, an yabu arar wuldanumo, nenggerogon erigin? Agar yulu nobarne dek ar ma, nen nggino yu nande enggadi pakalok ar o.

⁴ An yabu arar wuldanumo, nogari ambigarma, an ir inuma ninom dogogin, yogo wene yi kwak pano nakla ebeki o,’ yiluk andarige.

⁵ Ap uang aru mbale nen, ir ap nomar inoba werek mende obogar inayonggo birige.

⁶ Ap alep wagage mende yoga dogolir, ‘Kar nomar koba menden werek?’ yorigemo ar nen, ‘minyak zaitun seratus paga werek o,’ yiluk yorige. Yorigemo ar nen, diru mbalek yi koba nomar werek mende asurat erek o, yiluk yorige. ‘Ma kebe yogo korektarin o, nen kinggi aburu yi paga bin o, nen ebe lima puluh paga mbalki o,’ yiluk yorige.

⁷ Nen ap ambotna ambi yoga dogolir, kar mende nomar mende werek, yiluk yorige. ‘Ar nen onggo yoga dogolir,gandum seribu paga yagadek o,’ yiluk yorige. Yorigemo ar uang nandode nen, ‘Yi surat kanomar mende o. Ma dambulik delapan ratus diru mbalin o,’ yiluk yorige.

⁸ Ma ar ap uang aru mbale mende ombae tuan enogo nen, litau paga akla mudi ekige enogo paga wogok dirige o; Nenaluk ir akuni agar paga welagwi mende yi, akuni o yanggukmo dogi tagwi kwak dogu dambe kalok, nen ir akuni inakla mudi erinaburak mban ekwi o.”

⁹ Tuguluk Ar Yesus ambi inom ar yega dogolir, “Kir kinaruk panorogo kolini o! Ye mende nde mende yoma paga, kinogari kinom kunik dogu kwarinaku dogoni o. Ye mende nde mende agar paga mende yoma obogar onggo dek arigin eti paga, kir kiniluk mondok dogowam panoma etoma wokinabigin o.

¹⁰ Ap ambi, yabu bugudagar mende kigik, ar nen ndak arar erigin yiluk oba andagwi mende eti, yabu nggok mende oba bumo, ndak arar erigin o. Ogwe, Ap ambi, yabu bugudagar mende kigik, ar nen eru ndak dek arar yiluk oba andagwi mende eti, ar nen yabu nggok mende oba bumo, ar nen erigin mondok ndak dek arar o.

¹¹ Yogo, ye mende nde mende agar paga werek mende yoma, kir kininggimo bigikdek kalok, Ta nen ye mende nde mende mbogor paga mende kinoba bigin kogop?

¹² Nen ir akuni adik inamende, kir kinoba burak ndakbuk kalok, ta nen kir mende wokeramo onde arurak?

¹³ Ap ambi nen ap inebe mbere ineyabu erurak ndak dek o. Ar ap ambi kwak ar iliti kunik eka dogolir, nen ambi obakte paga dogogin o. Ar nen ap ambi ane dirogo eka dogolir, ambi eyabu dirogo erukbuk o. Kir eta ndak-ndak werek. Kir nen Allah eyabu ekwi, nen kir kinamende eyabu ekwi erukbuk o.”

Yesus nen ye wene nde wene yirige wene

¹⁴ Ap Farisi mende Yesus yega obogar inaruk kolalku lagugwarik, ir uang iniliti kunikma, Yesus agarndok kanggugwa o.

¹⁵ Nen Ar Yesus nen ir yoraga dogolir, “Kir yi, akuni inilka paga pano ekwa yuak ekwi, Ogwe kir kinakla werek mende eti, Ar Allah ilka ilu arar o. Ir akuni nen yi kwak mondok anggup lektek mende andugwi eti, Ar Allah nen we teberek mende arar andartaga o.

¹⁶ Hukum wene ar Musa nen wogoragage inom, ir nabi-nabi wene emerirarugwa inom, erir wagwi kigik, ar Yohanes Pembaptis eka lagage kudi paga, wene yir wagugwa eti, wene Pano Wene Ar Allah ebe raja talek menatuk apma baurak mende etiar yorar wagu lagugwa o. Eti paga, ir akuni nen, Ar Allah akburi etaruwok nen yiluk, ir inobatne paga mban eku lagugwa o.

¹⁷ Mbogor agar dek arurak eti alon mondok dek arar o, ogwe Ar Allah nen yirige mende wene yugu huruf ambiar eti, dek arurak kwak eti mondok ndak dek arar o.

¹⁸ Ap ambi nen agwe dambe kalok, kwe adik wagangga kalok, ar nen mbainak arar erigin o. Nen kwe togokdu mende enogo, ap ambi nen wagangga kalok, ar ap eti ogwe mbainak ar erigin o,” yiluk yoragage.

Ap inggi werek o nen Lasarus o imbirak ekugwa wene

¹⁹ “Ap ambi ebe inggi werek mende ma, iyom onggo nggok mende mban yugu dogolir, nen ar o kup keyam etoma, erekma waganekma mban nengga wega welagage o.

²⁰ Uma bakma etoma ap inggi dek mende endaga Lasarus eti welagage, ar agado paga etoma kimbi tedek togo kunik welagage.

²¹ Ar nen erom agakdo yibilik, mbo wuldegetek mende nengga lagage, nen ir nggeo wagu lagartek umo kunikmo yomanogo inakda melok nunggwi, eku lagugwa.

²² Ap amende dek mende enogo wartagagemo, ebe malaikat nen wolok Abraham eragalilu mbogor paga panoma etoma arar bi lagugwa. Ar inggi werek welagage ernogo, yabungga kanggigemo agarma birugwa.

²³ Kambiluk lektagama etoma ari lagagerek, yagan ambik waka lagage. Eta yagan waka dogolir, il ilik tagage mende, Abraham walegar lakarige. Nen Lasarus Abraham eragalilu imbirak il karige.

²⁴ Nen ar ap inggi werek enogo nen, Abraham yoga dogolir, Abraham nombae! An nakba kande,” yiluk yorige. Ar Lasarus, I ambi inggi paga enagago, nakda paga bi waruak nen yiluk yorin nde. An indu aik mo, kener wari taga o!

²⁵ “Abraham nen: Nakbur kakla eberno o! Kar kiluk dogolir, ye pano nde pano etoma, kega lagagena o. Nen ar Lasarus yi maduk-maduk welagage mende, ar ya pano agarik o, nen kar enda kener waka agandik o.

²⁶ Ma, o nir werekma inom nen kar werekma inom, nggadiyakma erogo kudi binanenggama o, ma endoma nen yoma warukbuk o, nen yoma nen endoma warukbuk ar o.

²⁷ Ap amende ambik mende nen yoga dogolir, Lasarus an numa, ‘nombae oba lakbino o!

²⁸ An naworomi inebe lima etoma werek o. Nen ar Lazarus inoba lakbumo, an naworomi noba yoma wagunem, ir inaruk waruwak nen o,’ yiluk yorige.

²⁹ Abraham nen wene onggo yoga dogolir; ‘ir Musa ambuku mbalek inom, nen buku-buku nabi mbalkugwa mende inom, ir pago werek o. Ir nen wene buku-buku etoma akla mbalek mende mutok erir lamo pano ar o!’

³⁰ Ap nggok eti nen; Abraham nombae wene yegen eta ndakbuk o. Akuni wartagugwa mende nen iniluk atuk inoba lalok wene yoramo perak, ir nen iniliti kwakbatalok, nen inomaduk mbo bugun o.

³¹ Mende Abraham nen yoga dogolir, ‘Ir wene Musa nen yirige mende inom, nabi-nabi nen yirugwa mende inom, waganggidek kalok, nen ir watagugwa mende nen inoba lalok inane yoramo, inane waganugun dek ar o.’ ”