LUKAS 10 - PANO WENE YABUNGGA ERIGIN YIRIGE MENDE

Ar Yesus mutok lagwi mende inebe tujuh puluh paga lakbarige wene

¹ Yoralok, Ar Tuhan nen akuni Ar mutok lagwi mende inebe tujuh puluh paga amberak pulogo baga lagagerek, inebe mbere dombo kigik, pulogo nen o kota nggwe, Ar lamo nggwe mban inalep lowak nen yiluk lakbarige.

² Lakbaga dogolir wene men yirige, “Enggen mbalu mende nggok ar werek o.” Ogwe akuni ir enggen mbalu mende inebe we bugudak o. “Etiar ma, ar ap eyabu onde werek eti, akuni yabu eru mende amberak lakba waruwak nen yiluk, nggino yokni o.

³ Yogo lani arar o! An kir lakbinagagin yi, ir domba mende yangge tekman mende inakla talek lakbinagagin o.

⁴ Etiar ma, kir nen dompet inom, uang kuwak erogo birtagama inom, sepatu inom, kininggimo wolok lagup o. Tuan obakte akuni kinane pak dagik, ya ku yigik lagup ar o.

⁵ Nen kir akuni inuma unggugu dogolir kalok, yegerogon yorano, ‘Kir kinuma yoma kinoba pani pano kinadeknggen arar o,’ yiluk eti ndak yorano o.

⁶ Nen ir etoma nen, inadeknggen pano paga wokinakwi kalok, kir kinadeknggen ir inoba bagun mende ernogo, ir inoba arar dogogin o. Nen kinadeknggen inoba bagun enogo togok bugwi kalok, kinadeknggen inoba bagun ernogo, iyok paga waganino o.

⁷ Nen arar lalok, kir o ambi mo arar dogono o. Kir ye mende nde mende, kinake bugwi kalok, kodano ar o. Nenaluk, ir akuni yabu ekwa mende kalok, yabu eru onggo kodaurak eti ndak arar o. O ar ambi uma nen, ar ambi uma unggigik, lagup ar o.

⁸ Nen kir o kota ambimo kwak lalok ma, ir etoma pikpak arar wokinakwi, etoma kinedado kinake darogo bugwi ekwi kalok, dago etoma nano arar o.

⁹ Ir akuni u kunik mende, o kota etoma, u dek ekbano ar o. Nen ir akuni etoma, ‘Ar Allah Raja ndak-ndak kinakla yoma menarurak eti, korok panggo yi waga o, yiluk yorano o.’

¹⁰ Ogwe kir o kota ambila lugun mende, ir etoma nen wokinakwi dek arar kalok, tuan paga wundi lalok yegerogon yino o,

¹¹ ‘Kir o kota yila mende kinawul momok niniyok paga denggelek yi, kir kinilu dogowak nen yiluk, nir nen pulogo kinoba bogo o. Ogwe kinilu togo dogono o, Ar Allah nen Raja ndak-ndak kir kinakla yoma menarurak nogo, arar panggo yege o!’

¹² Kinakla eberek togon dogono o, o Aga Yobok paga, ir akuni o Sodom mende enogo inomaduk dek erogo baurak mende eti, we anggin dek negen erigin ogwe, ir akuni o kota yi mende inomaduk eti, anggin nggok mende arar arigin o!”

O kota ambetak nen iniliti ebebar andagik dek wene

¹³ Kir o Korazim yi muk kinarigin arar o! Nen kir o Betsaida mende yi muk kinarigin ar o! Ye wene nde wene erukbuk mende kar koba etagage mende etoma, o kota Tirus etoma o, o kota Sidon etoma o, ir inoba etatep dogolepma, ir akuni o etoma mende pagane ar maduk mende nina'ir yiluk, inomaduk mbo biluk, tu kumbi mo yugu dogi tagwi mende yikwi, nen inalubak paga wul mokmok dabuk mbabuk ekbiluk dogolep o.

¹⁴ O Irep Kudi eti paga, Ar Allah nen ir akuni o Sidon mende o nen o Tirus mende o, ir eti inomaduk dek erogo baurak eti perak, we anggin dek negen arar erigin kwe, kir perak, mondok anggin werek mende arar o.

¹⁵ Nen ki o Kapernaum mende yi! Kir kinakla nen, kir yadek togon mbogor paga negen binagi dagagin yiluk anda tanggwi a? Dek o! Kir kali aikmo etoma arar lakbinagagin o.

¹⁶ Tuguluk Ar Yesus mutok lagwi mende yoraga dogolir, “Ir akuni kir wene yoragop kolalka mende eti, An yigi arar inaruk kolalka o. Ir akuni nen kir togok binagaga mende eti, an togok banengga arar o. Nen ir An togok banengga mende eti, An Nombae lakbani wagage mende arar togok bega o.”

Ir inebe tujuh puluh paga lakbarige enogo iniyok paga wagugwa wene

¹⁷ Ar akuni inebe tujuh puluh paga lakbarige mende ernogo, Ar Yesus oba iniyok paga, inakla adeknggen ambik paga arar wagugwarik, yogu dogolir, “Tuhan wae, ir kugi inobabur maduk mende yemenogo, nir nen, Kar Tuhan kendaga paga wundi lani, yiluk yegetekma, ninane kolek arar kode wulku lagiya o.”

¹⁸ Yiluk yorugu nanggugwa, “Ar Yesus nen wene onggo yoraga dogolir, ar Iblis mbogor paga nen bigalabok talek nggar wura waga kigi o.

¹⁹ Eti ar ma, kinilu togon dogoni o! Kir An nobatne wokiragi eti, wado ebe paga kiniyok bugwi, nggin oba kiniyok bugwi, nen kinom ndugi mbalek mende etoma tebelinakwi, erir wagwi kigik, ar ambi nen kir maduk erogo binagurak paga, erurak ndak dek mondok arar o.

²⁰ Etiar ogwe, ir kugi inobabur maduk mende nen, ninane inaruk kolka yiluk kinadeknggen erugup o. Ate, kir kinendaga mbogor paga diru mbalek eti paga kwak kinadeknggen erurak o.”

Yesus adeknggen karige wene

²¹ O eta paga, Ar Yesus Allah Agurengge nen oba lakbi wagagemo, akla adeknggen ambik arar ertatuk yega dogolir, “Nombae, mbogor inom, agar inom, Tuhan Kar ar kapma tebelek werek o. An Kar wa yiluk yokigi o. Nenaluk, ir akuni wene inilu mende inom, nen ir wene inakla nggagalek mende inom, wene ir inilu agunem yiluk kiragago birigen o. Nen ir akuni diru inunggukdek mende inake kenam erogo begen o. Eti paga, Nombae iliti adeknggen etari taga o.

²² Ye eru nde eru edo obogar, An Nombae nen noba birigemo o. Ir akuni amberak nen Akbur eti inunggukdek o, nen ilu eti, Nombae adigar ilu o. Nen ir akuni amberak nen, Nombae inunggukdek o, ilu eti, Akbur inom, Nen ir akuni tani-tani, Ar Akbur eti nen Ombae abok bugalogo yoragin eti mende, inadik mban inilu arugun o.”

²³ Tuguluk Ar Yesus il Ar mutok lagwi mende meda togon bikdaga lagagerek, inadik ar yoraga dogolir, “Kir kinadeknggen mondok arar o, nenaluk kir kinil nen yogondak etarirtaga mende yoma kinil ketagwi yi o.

²⁴ Nenaluk kinakla eberek togo o: Ir ap Nabi o nen raja o, menarir wagugwa etoma inom, kir yogondak kinil ketagwi yi, inil kau paga, wadok ambik arar karugwarik ogwe, kalokdek arar o. Kir nena kinaruk kolalkop yoma, ir inaruk kolalu wadok karugwa ar ogwe, ir inaruk kolalukdek o.”

Ap iliti pano Samaria mende oba lirogo yorarige wene

²⁵ Tuguluk ar ap guru agama ambi menaga lagagerek, Ar Yesus abur mbalik nen yiluk, kinok wokega dogolir, “Guru Nombae o, An niluk mondok dogolir, nen nabedal kabedal erurak paga, nena erurak o?” yiluk yorige.

²⁶ Ar Yesus nen wene onggo yoga dogolir, “Alkitab akla etoma diru nena mbalek? Nen kar nen nena kakla anda tagan?” yiluk yorige.

²⁷ “Ar akuni enogo nen wene onggo yega dogolir, ‘Kiliti apir ar paga inom, kaguringge apir ar paga inom, kobatne apir ar paga inom, nen kar kakla nggagalek apir ar paga inom, Ar Tuhan Allah etia ar kiliti kunik eka dogon o.’ Nen, ‘Kar kebe kiliti kunik etatagan eti ndak-ndak ar, ir akuni wedek mende, kiliti kunik ar erinaka dogon o.’ ”

²⁸ Yorigemo Ar Yesus nen onggo yoga dogolir, “Wene onggo yegen eti mondok ebebar o. Ma, eti ar eka dogon o, eti eka dogogin paga, kar kiluk dogogin o.”

²⁹ Ogwe ar ap guru agama enogo erakde mbalek nen yiluk yega lagagerek, yoga dogolir, “An ninom agarik mende eti tani?” yiluk kinok yorige.

³⁰ Ar Yesus nen onggo yoga dogolir, “Ar wedak ambi o Yerusalem nggwe nen, o Yerikho nggwe wura lagage. Nen wuragi nanggige, tuan obate paga, ir akuni maduk mende nen, ebe ndugi wakwi, nen amindik amendek ndilogo waganggwi, eku lagugwarik, ar ebe tuan paga warek ilpudu birigemo dambe kalok mbugulkugwa o.

³¹ O etinem ar, ar ap imam ambi, tuan eti paga ar lagage o. Nen ap warek enogo il kega lagagerek, tuan akpirmo nggwe pungguk togon arar lagage.

³² Etegerogon ar, ar ap Lewi mende ambi laga dogolir, akuni warek enogo il kega lagagerek, oba panggo togon ari lalok mbenakige. Ogwe tuguluk ar enogo tuan pungguk togon ar ari lagagerek nen, arar lagage.

³³ Ogwe ar ap ambi ai Samaria mende ma, tuan enogo paga ar lak nen yiluk laga lagage, ap enogo warek kalok, akba nen akla daguk togo etagage.

³⁴ Nen ar ap enogo arar oba panggo yi laga lagagerek, ndugi wakugwama umo mbalek ma yemenogo, anggur amburu paga i korogo bega, nen minyak amburu paga u palka eka dogolir, umo yemenogo dinggil bega ekige. Etbega lagagerek, akuni ernogo, ar mende keledai ambor paga ilik bega lagagerek, wolok akuni u palinabi tagama, arar wolok lagage.

³⁵ Nen kubenengge ar ap enogo nen, uang perak mbere wagangga lagagerek, ar ap ai werek enogo wogoga lagagerek, nen yoga dogolir, ‘Ap yi, pikpak iluguk dino o, nen onggo amberak burak werek arigin kalok, an nen yi paga waga dogolir kalok, onggo bigin o.’ ”

³⁶ Yega lagagerek, Ar Yesus wene oba likige enogo kudi bik nen yiluk, irep paga wene kinok yi yirige, “Ir akuni inebe tiga eti, ap warogo bega yi, an nogar ar o, yiluk akba eke, ap ta kwak yiluk kar kakla andagen?”

³⁷ Ar ap guru agama enogo nen onggo yoga dogolir, “Eti ar ap warek mende yamak kege eti arar o.” “Etiar ma, kar kuma lalok, eti ndak-ndak ar eri lan o!” yiluk Ar Yesus nen yorige.

Ar Yesus nen kumi Marta Maria imbirak bikda lagage wene

³⁸ Tuguluk Ar Yesus enogo Ar mutok lagwi mende inom tuan ugu birugwa mende enogo arar lagugwa. Nen o desa ambila arar ari lagugwa o. Nen Etomala, kwe ambi endaga Marta, kwe eti nen Ar Yesus uma erom inom nau paga ayonggo birige.

³⁹ Nen ar Marta eti ogar kwe ambi endaga Maria eti imbirak welagugwa. Nen ar Maria yi, Ar Yesus iyokma korek latuk, wene yega yemenogo aruk kolek mondok welagage.

⁴⁰ Ogwe ar Marta ernogo, uma ar dogi taga paga, yi eka ndik eka, pakalok arar ekige. Tuguluk, Ar Yesus oba panggo yi lagagerek nen yoga dogolir, “Tuhan, Kar kakla nen ar Maria, an yabu nadik ar eka nagik agarik yi, ndak negen ar agarik kakla andagen a? Yabu an yamak neyawak nen yiluk yorin o!”

⁴¹ Ar Tuhan nen onggo yoga dogolir, “Marta, Marta! Kar mondok, we yi paga eli paga kiliti nggok togon pirik parik erir tagan o.

⁴² Nen wene ilitinggen negen mondok eti omanggi ar o, Ar Maria eti pano kwak nggi, yiluk obok il kege eti, ar inggimo nen ndilugun dek mende eti arar o.”