GALATIA 1 - PANO WENE YABUNGGA ERIGIN YIRIGE MENDE

Wene edoma warek wene

¹ Newe nawor Allah akburi o Galatia werek mende, an Paulus inom, ir Allah akburi Kristen mende obogar an ninom dogitagwi mende nen ninakla duktek agorik eti,

² Ar Allah Ninombae inom, nen Ar Tuhan Yesus Kristus inom, Ir nen kininggi werek ekinaku dogolir, ambi ar dambulogo binagagwi eku dogowak o, yiluk andartagwi o!

³ Ir akuni nen andarugwa paga, kar rasul dogonok o yiluk banudek, Ar Yesus Kristus inom, Ninombae Allah nen inom, Ar Yesus kanggigerikmo nen iluk ekdirige enogo nen, an menogo baninggige o.

⁴ Nir ninombae Ar Allah akla wadok andarige paga, Ar Kristus nen nir ninomaduk onggo, Ar ebe ninake kurban negen kanggige paga, nir o madukmo yoma nen maga binaniluk, ndilogo wokninakige o.

⁵ Eta paga ma, Ar Allah endaga nggok aitok mondok dogowak o! Amin.

Pano wene ambiar wene

⁶ Newe nawor kir kinoba an bi warkinaki o! Kristus obabur pano paga, Ar Allah nen wai yokeragage o, ogwe yogondak Ar Allah ibar dambe kalok, wene Pano Wene, Allah nen yirige mende eti damber kalok, akuni inane nen “pano wene” yega mende mutok lagopma o.

⁷ Ebe, “wene pano wene” amberak yoma dek mende, ir ap amberak inane paga wene pano wene abel daga kalok, kir nugur kinabuok nen yiluk ekinabir tagwi o.

⁸ Ap “wene pano wene” adik mende, nir nen yokeralok dek mende yokerar tagwi eti, nir agar paga mende a, Malaikat mende a, Ar Allah nen inoba anggin wogoragin o.

⁹ An alep ar yorkeragagi mende, yogondak ambi inom dagalogo yokerak o. Ap “wene pano wene” yokerar taga eti, wene pano wene nir nen yokeragagumo kir waganggugup enogo mende dek ma, ar oba Allah nen anggin mende bigin o.

¹⁰ Eta eka neyalok, akuni nen pano eke yornirugun a? mondok dek. Allah nen kar pano yokniru kwak an wadok nggok agarik o. Yogondak ya an akuni nen inadeknggen noba buwak yiluk, iniliti waganir lektaga. An eterogon eka kalok, an Kristus ayedoman dek o.

Ar Paulus rasul etagage wene

¹¹ Nawor nakbur wene pano wene yorkeragi eti, edo ir akuni inakla nen wulabek dek o, yiluk kinilu arno o.

¹² An wene eti akuni nen woknirukdek. Ap nen emernirukdek ar, Yesus adik nen wene Pano Wene edo yoma nen wundiktaga o, yiluk pudaktogon yoknirige.

¹³ Yogo kir obogar nen, agama Yahudi inawene kindirik pago dogolir eka lagagi ebe kinilu o. An nanini paga, akuni Allah akburi maduk erinaka, inebe inarir nega, eka lagagi inom, kir dirogon mondok kinilu o.

¹⁴ Agama Yahudi mende erakde mbalka dogolir, ap Yahudi mende amberak ninom mende tebek dagik, an kwak odo kirogo eka lagagi o. Ir amberak ndorek negen welagugwa. An nen nir ninumbui wene yirugwa mende nggerok togon wokbiluk pago dogolir, eka lagagi o.

¹⁵ Eta mende, Allah iliti pano nen, an endak tagakdek neyagik, eyabu eruak yiluk miknaka, nayonggo bega ekigemo o.

¹⁶ Allah nen Ar Akbur neloktema telekma erogo biluk, Ar awene Pano Wene akuni Yahudi dek mende yorar nega dogowak nen yiluk nayonggo baninggige o. Eta paga, an nen akuni inoba, an ya nenggerogon erigin yiluk kinok waganukdek o.

¹⁷ Ir nen auwan neyagik, Rasul alep agugwa mende inoba, o Yerusalem lagikdek mende, an o Arab etoma lagagi. Etoma nen o Damsyik wagagi o.

¹⁸ Tiga tahun ekdiluk, ar Petrus nimbirak kunuok nen yiluk, o Yerusalem lagagi. Ar Petrus nimbirak o Yerusalem etoma 15 hari arar welagagi.

¹⁹ Yakobus Yesus ambudik mende enogo nimbirak abuk agagu mende, Rasul ambetak ninom abuk arukdek.

²⁰ An diru eki enda ebebar mondok arar o. Ar Allah an nenggal dek eti ilu o.

²¹ Eta etegerogon eka lagagirik, o Siria paga nen Kilikia paga etoma arar lagagi o.

²² Eta paga, ir Allah akburi Kristen mende o Yudea werek mende nen, an pano rogo inilu arukdek welagagi o.

²³ Ir akuni inane wolok yugwi inaruk kulku dogolir, “Ap alep nir akuni Kristen mende ninaka, nen ar wene alep tebelik nen yiluk eka lagage enogo, yogondak ar nen arar yorar wene eti nertaga o.”

²⁴ Eti paga ma, ir nen an paga Ar Allah pogorarir tagwi o.