EFESUS 6 - PANO WENE YABUNGGA ERIGIN YIRIGE MENDE

Ir elege nen inagwiya inombae inom eku dogorak wene

¹ Kir elege obogar kinagurakma! Kir Ar Kristus awurumi mutok lagwi mende arar ma, kinagwiya-kinombae inane kinaruk kulogo eku dogoni o. Kir eru mende eti arar o.

² “Kinagwiya-kinombae inalon palogo, keyagi warinaku dogorak o.” Wene yi o pagane etoma Ar Allah nen ibibir mondok yirige mende ebe eti:

³ “Kiniluk idu paga dogolir, kinadeknggen mondok dogowak nen yiluk ake paga yirige o.”

⁴ Nogari kir elege inombaelak mende wae! Kir nen kinakburi inakla agaga dagurak mende erinabugup o. Ogwe, kir nen Tuhan abok yoralok inaruk wakwi, wene pano mende paga mban yoragwi eku dogoni o.

Yedoman nen ombae imbirak eka dogorak wene

⁵ Nawor nakbur, kir yedoman agop mende yi! Agar taga ya dogolir, kinombayelak inane mutok eku dogoni o. Ap kinombae apma werek eti alon palek dogolir, oba um palogo nen eku dogoni o.

⁶ Kir yabu ekwi kinaruam kigik, akuni nen wogok dinaguwak nen yiluk eku dogogup o. Kir nen Kristus ayedoman ma, Ar Allah wadok mende kiniliti paga wadok andagu dogoni o.

⁷ Yedoman nen yabu eku dogolir, kiniliti adeknggen paga akuni inake ekwi dek mende, Tuhan ake ma yiluk eku dogoni o.

⁸ Nir ninadiktak ap ugun wender mende, yedoman mende, ninewe nen yabu onggo wogoragin ma, kinilu dogolir eku dogoni o.

⁹ Nogari, kir ap kinayedoman werek mende yoma! Kir pano yonggwa kinagwi dogowak nen yiluk, karigin bagagin yiluk yoragup o. Kir inom, kina yedoman mende inom, kir kinombae eyabu ekwi mende eti ebe omanggi ar o, Ar eti Tuhan arar o, Ar ai mbogor taga mende arar o. Ar nen akuni inelokte dombalinabir tagodek arar o.

Ar Allah arige arega pulik wene

¹⁰ Ugu paga ya, kir Ar Tuhan kinom ambi kunarugutip ma, Ar obarne wokeraga paga, kinobarne erogo mendek dogoni o.

¹¹ Iblis nen wim kinoba wundiluk, ane amburu wurabir warir taga ma, Ar Allah nen arige arega tumburik wokerage mende endoma wokbiluk, tuam waku dogoni o.

¹² Nir ir akuni yoma mende ninom wim dek o. Nen ir wim ninom mende eti, Irimbo inobabur maduk mende, ir o agar taga yoma nir mende yiluk iniyok tebelir taga mende, amerakor paga tebelir taga mende, ir ninom wim arar ekwi agorik o.

¹³ Yogondak Ar Allah arige arega tumburik endoma waganini o. Kininggim kodalok ma, Kinawim mende, kinoba wulkunem, kinom ndak ar abugun o. Wim arar ekdiluk nen, kir kinebe ndegelek mban kinagun o.

¹⁴ Kir tuwam panorogo waku dogoni o. Ar Allah arige arega obarne werek tumburik yoma kodani o. Kir Kinaredok kwak, Ar Allah mutok nomo yigikdek lagu dogoni o. Nen kir kiniyom besi mende eti kwak, wene ebebar mende mban eku dogorak mende yugu dogoni o.

¹⁵ Kinasepatu kwak eti, wene Pano Wene yorar lagu dogorak ake talek yugu dogoni o.

¹⁶ Dinggaga kukbaga, kiniliti Tuhan oba ebebar andagwi mende eti, nggemu tu talek yik biluk dogolir, ebebar andagwi eti paga, ar Iblis omade indu akda talek waganem, pugalogo lagaku dogoni o.

¹⁷ Kir ndil kodaurak mende eti topi baja kwak, nen Ar Allah wene eti Roh Kudus nen kinambirok talek wokeragin o.

¹⁸ Wim kinom eku dogolir, tamban nggok ekwi, kinane nggomorogo Allah wae, yamak ninan o, yiluk yogu dogoni o. O telek ari waga kigik, tamban ar eku dogoni o. Roh Allah nen yokeragage ndak-ndak, kir nen ninarni yiluk tebebe yigikdek, kinomanggen ndederogo dogoni o. Ar Allah akburi inake tamban kunik kanik eku dogoni ar o.

¹⁹ An wene yega nagik, Ar Allah nen nane mor-mor wokniruwak nen nake tamban eku dogoni ar o. Nen, wene Pano Wene kimago mende yorawak nen yiluk, nake inom tamban eku dogoni o.

²⁰ Wene Pano Wene eti nen ar, an Ar Allah awene wolok nogwa ertagagi o. Nen yogondak ya an kede warek werek o. Wene Pano Wene eti nobade dek dogolir yokerawak nen yiluk, nake tamban eku dogoni o.

Irep paga keyagi warek wene

²¹ Ar ninogar Tikhikus Tuhan eyabu a'ir kakbuk erita mende ernogo, ar kir kinoba watuk nen, wene an yoma agarik mende domborogo yokera warigin o. Kir nen an nebe agarik mende inom, yabu erir taga mende inom yokeramo, kinilu arigin o.

²² Wene eti paga nen, ar wene nir ya agorik mende yokeramo, kinakla adeknggen aruak nen, ar ebe kinoba lakbi wagi o.

²³ Ninombae Ar Allah nen, Ar Tuhan Yesus Kristus imbirak, kinebe ambi, kiniliti ambi, nakba kakba dogolir, Ar Yesus oba ebebar andagu dogobagik nen yiluk, yamak kinawak o.

²⁴ Yogo, kir obogar nen, nir ninewe Yesus Kristus kiniliti mondok kunik ma, Ar Allah nen kinake ekdinagaga dogowak o. An Paulus nen, Keyagi wakinaki o, waanelak.