EFESUS 4 - PANO WENE YABUNGGA ERIGIN YIRIGE MENDE

Ninebe omanggiar dogolir yabu adik ndik adik ndak eku dogorak wene

¹ Eta ma, an Ar Tuhan eyabu ekanem, kede warek ap ininggimo dogolir, nggino yorkeragi o. Kinebe Ar Allah nen kinayonggo birigemo welagop ndak-ndak ar dogobagik nen yiluk, yorkeragi o.

² Kiniliti tebe yiluk, yanggik yanggok, tagabal atuk dogoni o. Nakba-kakba dogorak mende, yonggwa-yonggwa paga tiktik dagwi, eku dogoni o.

³ Ar Roh Allah nen ambi ar dambulogo binagage mende, pano ndegelek dogowak nen yiluk, kinebe ambi ar dambulik dogolir, erir lagu dogoni o.

⁴ Ebe ambiar, Roh Kudus ambiar o, niniliti eberek ambiar paga eberek dogobagik nen yiluk, kinayonggo birigemo o.

⁵ Ar Tuhan eti ambiar o, nir niniliti oba panggolek ebebar andugwi mende ambiar o, ima wurabek mende eti ambi paga ar wurabek o,

⁶ nen Ar Allah Ebe ambiar ma, akburi yoma obogar inombae ertagage o. Ar ebe Tuhan mbogor agar kenam ekbirige werek o. Ar kenam ekbirige paga yabu eka, nen Ar obarne ekige mende etoma paga apma tebelek werek o.

⁷ Nir ninadik ndak dombok Kristus nen woknerak andalok birige mende kodagun o.

⁸ Alkitab mbalek paga nen yega dogolir, “Nen Ar ebe o ogona paga mondok etoma ari dagaluk mo, Ar nen akuni ambigar ndilogo wogorek ligin; Tuguluk Ar nen ye mende nde mende ambigar akuni wogoragin o.”

⁹ Yogo, “Ar ogona paga yadektogo dagarige,” yiluk yirige kalok, Ar ebe o kogona agar paga yoma kigik kogona kwak ar wukigemo o.

¹⁰ Ar wura wagage mende eti, arar ogona mbogor taga obogar abel nggebelogo biluk dagarigemo o, nen yoma obogar uwak ma agorik o.

¹¹ Ar nen “Ir akuni yabu ye mende nde mende eku dogu ake wogoraga dolir,” ir amberak rasul menogo baga, ir amberak nabi menogo baga, ir amberak wene Pano Wene eti yoragu dogorak menogo baga, ir amberak guru-guru menogo baga, nen ir amberak gembala-gembala menogo baga ekige o.

¹² Yi wogoragage paga, Ar Allah akburi nen Ar eyabu eru ndak erinaka, nen Kristus akburi ndegelogo pagarek welagwi eritagwi o.

¹³ Eti paga, nir ninebe obogar, ebebar andagwi paga inom, ninakla andagwi paga inom, omanggi ar ertagagu o. Nen nir Ar Kristus obabur talek ambi lambok ninanggok agwi, nen mondok pani pano etagwi agorik o.

¹⁴ Etiar ma, nir elegedak talek, ir akuni wene adiktik adiktak inane medok yugwi dalok, mugurek yidikduk agan laurak eti mondok dek o. Ir eti akuni wene mondok inenggal mende paga arar, akuni nugurinabir tagwi o.

¹⁵ Etegerogon ekwi dagik ar, nir nen yanggo yiluk, inebe inakba paga, wene ebebar mende eti, ir emeriraurak o. Etegerogon erugun paga, Ar Kristus nir ninewe agage ndak-ndak, nir ogwe ye wene nde wene etoma ake paga, ninoba ela waganek nggakberek mende ar etarugun o.

¹⁶ Ar nen parkerek kigik, inggi iyok oba kunik mende morerek pano mondok dogogun o. Nen, inebe adiktak mende, yungguk paga kunik dogolir, yabu pano erir lagwi kigik, nakba kakba paga inebe obogar inanggok atuk, kode agwi erugun o.

Kristus paga ninebe ngger mende erogo binagagin wene

¹⁷ Eta ma, an Ar Tuhan endaga paga, wene yi ambi inom obarne rogo yokerak: Akuni Allah inonggodek mende inobabur eritagwi ndak-ndak eku dogogup o. Nen eberu dek mende kigik oba ebeku dogogup o.

¹⁸ Ir iniliti apir agagemo. Ar Allah nen eku dogowak nen yiluk wokneragage mende inil kigikdek. Ir nen Allah ebe mondok inonggokdek o. Ir nen inebe tebe yiluk wene kulurak ndak dek o.

¹⁹ Ir inenggadi mondok dek ma, iniliti nengga kalok inoba aganggen nen erir nugwi, inakla wadok kalok wadi ugun erir nugwi eritagwi o.

²⁰ Kristus ane waganggugu eti eterogon mende dek o.

²¹ Kir Ar abok arar kinaruk kulkugupmo. Kir ar akburi agagupmo, Allah obabur Ar paga werek mende arar emekeragugwa o.

²² Eti paga nen, kinobabur alep mende wadok-wadok paga nugurogo maduk ekinaka lagage mende eti erugup o.

²³ Kiniliti kinobabur obok ngger mende ertarni o.

²⁴ Yogondak kinebe ngger mende, Ar Allah obabur kwak kigirogo binagarige ndak-ndak eku dogoni o. Ebe kinobabur ebe mende, mor-mor pano mende paga eku dogoni o.

²⁵ Eta ma, nawor nakbur wene kinenggal mende yugup o. Nir ninebe obogar, Ar Kristus inggimo, iyok ma, kir-kir obogar wene ebe mende mban eku dogoni o.

²⁶ Kir kinakla agaga aga kalok, kinakla agaga eti nen maduk ekinaka kau o. Kinakla agaga tebelek kigik noge ambi yigik erurak mondok maga o.

²⁷ Etegerogo erugun kalok perak, ar Iblis nen maduk ekinaburak o telek dek erogo bagun o.

²⁸ Ap kinil modoknggar mende, kinilmudu waganugup o. Kir nunggu dogolir, akuni magaragwi eku dogorak ma, kineyabu pik pak etagu dogorak o.

²⁹ Kir wene yugu dogolir, wene maduk mende kinandema nen wundurak dek o. Kinane paga akuni mor ekdagwi, akuni amberak yamak dagwi erumo, akuni amberak iniliti ago wakdagun o.

³⁰ Ar Roh Allah iliti aik erogo bugup o. Ar Roh Allah nen kir waganogo, Ar Allah kinom kunogo binagarigemo o. Yabungga Ar Roh Allah nen kinerakde mbalogo wender ekinabigin o.

³¹ Kinobabur kiniliti aigire, kinanini nggirik, kinanembuk werek mende, mondok dambekani o. Kinane enggak nggar werek yu maga o, yegedek elegedek yugu dogogup o. Kinakla na'ir ka'ir inom, etegerogon mende amberak inom dambe kalok dogoni o.

³² Kir kinobabur dogorak mende yi; Kiniliti pano paga, kir-kir ar nakba-nakba ekwi, Ar Allah nen Kristus paga kinomaduk oba mi ekige kwak, kir-kir ar kinomaduk mi erogo bagwi, eku dogoni o.