EFESUS 3 - PANO WENE YABUNGGA ERIGIN YIRIGE MENDE

Ar Paulus akuni Yahudi dek mende ineyabu ekige wene

¹ Eti paga nen, an Paulus, Ar Kristus Yesus endaga paga, kir akuni Yahudi dek mende kinake paga kede warogo banunggugwa o.

² Ar Allah Iliti pano nen, yabu kir kinake eka dogowak nen yiluk, nayonggo birige yiluk, kinaruk kulkugup arar o.

³ Ar Allah nen, Awene erigin yiluk kimago mende, an bugalogo yornirige o. (Wene yi mende an diru bugudak nggaruk togon ogona enda mbalki o.

⁴ Kir nen diru endaga talumo, an Ar Kristus awene kimago mende nilu agage ndak-ndak, kir etegerogon ar kinilu arigin o.)

⁵ O pagane ar agimago wene eti, ir akuni ugunar yoralokdek, yogondak Roh Allah nen, ir ap Rasul mende inom, nabi mende inom, ir inoba tugunogo yoneragage o.

⁶ Kimago wene eti ebe yi o: alep Ar Allah nen ir Yahudi mende inake birige mende, Wene Pano Wene paga, ir akuni Yahudi dek mende inoba kidu-kidu erogo birige o. Ir akuni Yahudi dek mende etoma, obogar edo omanggi mende paga ar kunggigemo o. Tuguluk Ar Allah nen ir akuni Yahudi mende wokeragin o, yiluk wene warogo birige mende eti, ar Kristus Yesus paga tu kir obogar wokeragin o.

⁷ Ar Allah nen we onggo dek mende woknirige eti, Wene Pano wene yorar nega dogowak nen yiluk wornirige eti arar o. Yabu eti Ar Allah obarne noba birige mo, wene ebe nakla dogi taga o.

⁸ Ir akuni Ar Allah akburi obogar etoma pano mende o, ogwe an yi ap nebe mondok maduk mende arar o. Ogwe Ar Allah nen wene onggo dek noba birige eti, Ar Allah eyabu akuni ir Yahudi dek mende, ir inake wene Pano Wene dek ari tagodek mende eti yorawak nen yiluk, nayonggo birige o.

⁹ Nen ir akuni an paga nen, Ar Allah ebe waltenak mende, o yoma kenamer ekige werek awene kimago welagage mende eti, inilu agwi erugun o.

¹⁰ Ar Allah akla ebekige mende eti jemaat paga tu, ir ap ye edo nde edo mbogor paga ogona yoma werek mende, Ar Allah akla nggagalek mende eti inilu aruwak nen yiluk ekige o.

¹¹ Ar Allah nen erik nen yiluk, kwalogo birige aitok mondokma, eka dogolir Ar Kristus Yesus Tuhan nir ninewe dogolir erir taga o.

¹² Kristus oba panggologo ebebar andalok, Ar ninom ambi ar arumo, Ar Allah oba ninobade dek ar, Ar oba unggwi lagup mende o.

¹³ Eta ma, an nen nggino yokera taga o. An kir kinake erogo banggama yagan waka paga, kiniliti pirik dogogup o. Eta obogar, kir pano dogobagik nen yiluk, etarir taga o.

Kristus nen iliti kunik erninakige wene

¹⁴ Eta paga nen, Nombae Uwagam nendop yungguli taga o.

¹⁵ Ar nen mban ar, ir keluarga mbogor taga mende inom, nen ir agar taga mende inom, inobabur inadik denek mende arar wogoragin o.

¹⁶ An tamban eka dogolir, Ar Allah endaga mbogor nen Ar Roh Kudus paga nggweru kiniliti kode ekinabuwak o yiluk, yorir taga o.

¹⁷ Ar Kristus oba ebabar andalok oba panggol kugu paga, Ar Kristus ebe ninilitimo dogolir, iliti kunik nen kinedo yagago menogo binagawak o.

¹⁸ Kir Ar Allah akburi obogar, Ar Kristus iliti akuni kinakba karige mende anggup ogona paga nen kogona edoma kudi, tuguluk alebuak ogona kudi nen akom kogona kudi etoma obogar kir kinilu aruwak o.

¹⁹ Ir Akuni o agar taga nen endago paga, odo kirogo niniluk arurak dekma, kir Kristus iliti kunik ekinakige paga, kir nen Ar Allah obabur pano kinilu arubagik nen yiluk, kir kinake Ar Allah yorir taga o.

²⁰ Ar Allah obarne ambik nilitimo yabu eka dogolir, nir nen nggino yogekdek mende, Ar Allah nen nggok togo ekdinanigin o.

²¹ Kristus Yesus paga, jemaat obok nen, yogondak yabongga Ar Allah ar nggogor dugwi dogowak o. Ar Allah endaga nggok wogok bugwi dogowak o amin.