EFESUS 2 - PANO WENE YABUNGGA ERIGIN YIRIGE MENDE

Warek mende nen niniluk erogo binanigin wene

¹ Ar Allah ane tebelogo biluk, maduk ekwi paga, onggo wartagu lagagupmo o.

² Etanem, agar taga yoma nen eritagwi mende mutok nugu lagagupmo o. Eta ebe kir nen odo amerakot paga, ininggi pago werek mende mugurek nugwi, ebe irimbo akuni Ar Allah wene waganggunem yiluk nugurinakwa mende ane mutok ekulagagup mo o.

³ Nir o pagane etoma, ir ndak-ndak ar eku lagagumo o. Nir ninobabur akuni ninakla wadok, adeknggen paga eku lagagumo. Eta ekunem akuni amberak Ar Allah Anini inoba bega lagagemo o.

⁴ Wee Ar Allah iliti mondok pano nen, Ar nen etegerogon ninakba karige o.

⁵ Nir Ar Allah iliti andalok eru mende, ekikdek tebelogo birugumo, ninebe warek welagagu o. Yabungga Ar Allah iliti pano ninakba nen, Ar nen Kristus ninom niniluk erogo binaninggigemo o. Ar Allah iliti pano nen, kir Ar nen kinagap Endarkigemo o.

⁶ Eta paga, nir Kristus Yesus ninom kunggugumo, Ar Allah nen nir mbogor taga mende etoma ar ninom wene onde dogowak yiluk, niniluk erogo binaninggige o.

⁷ O Yabungga etoma, Ar Allah akuni ninakba nen eterogon ekigemo yiluk, ninilu aruwak nen yiluk ekigemo. Ninakba karige eti ebabar o yiluk, Ar Kristus Yesus wokneragage paga ninilu agagu o.

⁸ Kir Ar Kristus ebebar o yiluk waganggugupmo, Ar Allah kinakba nen ndil kinakige o. Kir ndilkinakige etoma, kir nen ekugup paga dek mende, eti Ar Allah kinakba nen we onggo dek arar ndil kinakige.

⁹ Etiar ma, ir akuni nen, an kwak ndak o yiluk, woguk daktau mondok ndak dek o.

¹⁰ Nir yi ninebe Ar Allah nen kenam erogo binaninggige mende o. Ar Kristus paga, Ar Allah nir ninake pulogo birige mende, nir erir lagu dogowak nen yiluk, erogo binaninggigemo o.

Ar Kristus paga omanggi agagu wene

¹¹ Kir akuni Yahudi dek mende yi! Kinebe alep welagagupmo birkani nda, ir akuni Yahudi mende nen, “Kir sunat erekdek mende yokeragwi o.” Nen ir akuni Yahudi mende sunat erek mende yiluk yugwi o, (ir inagakdo akuni ininggi paga mbalkwi eti paga panggok diluk, kir yokera tagwi o).

¹² O eta paga, kir Ar Kristus kinom ambi ar kunik dek arar o. Kir akuni kuro mende, Ar Allah akburi pulik mende nakburi o, yiluk warogo birigemo unggigikdek. Kir agar taga yoma bulatuk, Ar Allah kinonggokdek welagagupmo o.

¹³ Kir kinebe alebar etoma walek ar mende o, ogwe yogondak Ar Kristus kinom ambiar agop ma o. Ogwe Ar Kristus kanggige paga korok erogo ekdinagarige o.

¹⁴ Dambul ninakwa eti Kristus arar ma, Ar nen Yahudi mende inom, wedek akuni mende inom, dambulogo alebunu ambi ar bega, wim mbalek welagage mende, Kristus ebe war taga dogolir miyalogo birige o.

¹⁵ Agama Yahudi paga awene kindirik inom, eku lagugwa mende inom, Kristus nen kornorogo biluk, akuni mbere dogalek tekman akman welagugwa mende eti, akuni ambiar ngger mende erogo, Ar Kristus nen arar dambul kinakige o.

¹⁶ Kristus warogo o paga menogo birugwa paga, ap inai mbere welagugwa mende, ambi erinaka, wim mbalek welagugwa mende, Allah inom ambi dambulinaka, ekigemo, wim mbalek welagugwa mende arar dek agage o.

¹⁷ Eta paga nen, Ar Kristus awene Pano Wene dambul kinaburak wene eti, ir akuni Yahudi mende inoba arar wagage o. Alebar kir akuni Yahudi mende kinoba, nen yabungga kir akuni Ar Allah kinom walegar ndorek welagagup mende eti kinoba wagage o.

¹⁸ Ar Kristus paga nen, nir obogar Yahudi mende inom, Yahudi dek mende inom, Roh Allah ambi nen Ar Allah oba korok togon kunogo binaninggige o.

¹⁹ Yogondak kir akuni kuro tekmana mende dek o, kir yogondak keluarga Ar Allah mende arar, nen kir kinebe omanggi mende arar o. Kinebe Ar Allah ebe inggi iyok, akburi oba kunik mende o.

²⁰ Kir ir ap nabi inom, ir rasul-rasul inom, nen o kedaga birugwa paga menek agokip o. Yugum kedaga obarne werek pano mende eti, Ar Kristus eti arar o.

²¹ Ar nen o ebe obok tar denggek palogo, Ar Allah adik uma denogo birige o.

²² Kristus ninom ambi kunik werekma, kir ir akuni amberak nen, Ar Allah uma o yiluk, palogo binagi tagwi o. Uma etoma Ar Allah inom nen Ar Roh Allah imbirak kinom dogogun o.