2 TIMOTIUS 4 - PANO WENE YABUNGGA ERIGIN YIRIGE MENDE

Yabu eru kayonggo eti ake mban, mutok matok eka dogon yorige wene

¹ Ar Kristus Yesus akuni warek mende inom, iniluk werek mende inom, inuwak denik nen yiluk agar taga yoma warigin o. Ar o yoma endaga mbogor Raja arar menarik yiluk warigin o. Etama, An Ar Allah inom, nen Kristus Yesus inom, inika paga nggino nggano yokirigin o:

² Kar nen Ar Allah awene ebe mende yirige eti, ir akuni ina'ir kigik a, wadok kigik a, mondok muginarek maginarek yoraga dogono o. Kar nen akuni ebebar andawak nen yiluk yoraga, maduk mende telekma bega, yegerogon erurak o yiluk yoraga, eka dogono o. Wene etegerogo emeriraga dogolir, yanggo yiluk dogono.

³ Ir akuni o ambi kenam arigin eta paga, wene ebebar mende eti pago dogu nina'ir o yiluk damber kugun o. Ir nen pano mende dambe kalok, ir iniliti wadok mende mutok lagwi. Nen ir inaruk kulu wadok andau mende mban emerirawak nen yiluk, inangguru ambigar menogo bagun o.

⁴ Ir nen ebe wene yugunem, inaruk abir wakwi, nen tuan nggano wene mbililogo yugunem kau inaruk wolok korok-korok eku dogogun o.

⁵ Eta adik-adik ar ekwi kigik ar mende, kar koba mondok ar kumbu kalok dogono o. Anggin panggin koba wuka kalok, eo yiluk piyalka, Pano Wene yoraga dogowak nen yiluk, kebe mendagarige eti kwak mban, mondok kudi bigikdek, nggidik nggedok eka dogono o.

⁶ An nebe nake paga, Ar Allah ake paga, namep kidirogo biluk laurak korok panggo yege nilu agarikma, o agar paga yoma, muk dambe kalok ligin arar o.

⁷ An mbu inae mbal-mbal eka lagi mende, kudi warek paga muk dengge yi unggurak arar ertaga o. Nen an Ar Kristus mutok nomorogo wulkikdek mondok, irep kudi paga arar ari ligin o.

⁸ Nen yogondak ya, onggo banengge ebe koda lau paga arar, aruam torek agarik o. O irep paga etoma, Ar Allah nimbirak kunik, pano mondogar welagagi eti paga, Ar Tuhan, Hakim ebebar mende eti nen, an onggo woknirigin arar o. Nen an nadik ar onggo woknirigin dek o, ir akuni amberak nen Ar Tuhan ibar warnek o yiluk, torek welagugwa mende etoma obogar, ir onggo wogoragin o.

Wene ugu paga yorige wene

⁹ Kar yogondak ya paga noba ibar-ibar eme o,

¹⁰ nenaluk ar Demas enogo agar taga mende wadok nen, o Tesalonika etoma togok daniluk lagama o. Nen ar Kreskes o Galatia etoma lagama, nen ar Titus Dalmatia lagama o.

¹¹ Nen an ya ar Lukas adigar nimbirak werek o. Etegerogon ma, kar ar Markus wagani lalok, kimbirak noba warno o. Ari watuk, ar nen an yabu ekanem yamak neyaga dogowak nen yuluk, wolok warno o.

¹² An nen ar Tikhikus o Efesus lan o yiluk, arar lakbigi o.

¹³ Kar waga dogolir kalok, niyom togi mende, dak Karpus werek ma, o Troas etoma birigi ernaga, wornendalok warno o. Nambuku wene o agakdo paga diru mbalek mende etoma, woknendalok watno o.

¹⁴ Ap Aleksander tembaga ekwa enogo nen, wene maduk mende ambigar erogo banenggemo o. Ar Tuhan nen onggo ar eke ndak-ndak wogorigin o.

¹⁵ Ar ap eti, wene nir wolok nugwi yi a'ir ambik kuninabir taga mendekma, kar nen ap eti ebe kil waganek mondok dogorak o.

¹⁶ An alep ar wene noba wurakunem, an nerakde mbalaga nagik, ap ambi nen neraga lilu menatuk, an nerakde mbalu mende mondok dek ar agugwa o. Obok ar togok daniluk wulkugwama, wene ya paga, Ar Allah nen maduk ekugup o yiluk, yoraganem, maga baga dogowak o.

¹⁷ Eta paga, Ar Tuhan nen an neragalilu naruwam tornarek welagagemo o. Ar obarne woknirigemo, an nen wene Pano Wene obogar akuni Yahudi dek mende inaruk kuluwak nen yiluk yoraga nagik, an nebe akuni inandema yagadek, korok kamburak mende ndilogo baninggigemo o.

¹⁸ Eta mondok ebebar o, ir akuni naruwok nen yiluk neloktema talekma nen, Ar Tuhan nen pigalnabir laga dogogin o. Ar uma panoma mbogor taga etoma, yabongga an pani pano ar woknarek bani ligin o. Ar endaga mban ar woguk bugu dogowak o! Amin.

Ugu paga keyagi warek wene

¹⁹ An nen Priskila inom, Akwila inom nen ar ap Onesiforus mende keluarga inom keyagi wakdagi o.

²⁰ Ar Erastus o Korintus paga werek o, nen ar Trofimus ebe u warek, o Miletus etoma biluk wagagi o.

²¹ Kar nen o togi mende auwan ari wagikdek kigik, kibi ya paga ibar noba warurak o. Nen ir Ebulus o, Pudes o, Linus o, Klaudia o, nen kar keyagi wakaka o. Nen ir ninogari iniliti ebebar andagwi mende amberak nen, kar keyagi wakaka ar o.

²² Ar Tuhan nen kar karuwam pakarek nega dogowak o. Nen Ar Tuhan nen, nogari kir adeknggen kinoba binagaga dogowak ar o. An Paulus nen, Keyagi wakinaki o, waanelak.