2 TIMOTIUS 1 - PANO WENE YABUNGGA ERIGIN YIRIGE MENDE

Keyagi warek wene

¹ Timotius nakbur niliti kunik kar arar o! An Paulus nen surat yi mbalogo koba lakbi wagi o. Nen an nakla paga nen, Ar Allah Ninombae nen, Ar Tuhan Yesus Kristus nen, adeknggen koba bega, koba no dek pani pano erogo bagaga dogowak o.

² Ar Allah Ninombae iliti mirkige paga, an yi Ar Tuhan Yesus Kristus mende rasul erogo baninggige paga, wene Ar Allah nen ane amburu yirige mende yorar nega dogowak nen yiluk baninggige o. Nen niniluk dogu eti Ar Kristus Yesus paga arar kodarugu o.

Ar Allah woguk dega dogolir aruk wakige wene

³ An nen numbui eku lagugwa kwak, niliti pano paga Nombae Allah eyabu eka agarik ma, wene eti paga wa yiluk keyagwi warir taga o. An dinggaga kukbaga tamban eka dogolir, koba ebertaga kalok, Allah wa yiluk, keyagi warir taga o.

⁴ Kar kiliti maduk agage yanogo paga, koba mi agikdek agarik o. Eta paga nen, an niliti adeknggen nggok aruwak nen yiluk, kar koba warik yiluk erir taga o.

⁵ An nen kar kaganu Eunike inom, kaguya Lois inom, wene waganggugwa ndak-ndak, Ar Kristus oba ebebar o yiluk, eberogo waganggigen eti koba eberek o. An nen kar eta ndak-ndak ar eberitagan andar taga o.

⁶ Eta paga, kar nen Ar Allah amende pulik karunia wokirige mende, aganggen erogo eka dogono o. An nen kalubak tebelogo kake tamban eka nagik, Ar Allah nen yabu wokirige yomanogo, ambi tebelogo burak dekma, kar kilurogo dogolir, erir laga dogonok nen yiluk yokigi o.

⁷ Ar Allah nen iliti wokneragage eti, obade nggirik mende dek o. Ar Allah iliti wokneragage eti nen, ninobarne eka, niniliti amodok mbalninaka erir taga o.

⁸ Etama, Ar Tuhan obok kenggadi dek paga dogolir, telekma mondok ar bugalogo yoraga dogonok nen yiluk, yokigi o. Nen an Tuhan awene paga kede warnaka yi paga, nenggadi a yiluk andagup o. Kar Ar Allah obarne paga, wene Pano Wene ake nimbirak kener warurak pano arma, nobade yugup o.

⁹ Ar Allah nen ninagap endaka, wai yorneraga ekdiluk, ar adik akburi denogo binanggigemo o. Ar nen nir pano ekugu paga erukdek, Ar akla andarige paga, Obabur pano mende paga erninakigemo o. Ar obabur pano nen wokneragage eti, mbogor agar awan kenamer bigikdek kigik, Ar Yesus Kristus paga wokneragagemo o.

¹⁰ Yogondak Ar Allah iliti pano nen, ninakba karige mende wokneraga karugu eti, Raja Ndilninakwa endaga mbogor, Ar Yesus Kristus wagage paga telekma agage o. Ar Yesus nen wene Pano Wene, Ar ebe wartaga dogolir ekige eti, kanggwi mende enogo, kambiluk lektagama etoma arar tebelogo biluk, warek welagagerek iluk agage o. Ar pano ekige paga, nir niniluk ninaitok dogorak mende, wolok woknera wagage.

¹¹ Wene Pano Wene eti yorau paga, Ar Allah nen, an rasul menogo banengga, akuni inonggokdek mende yanggulirau menogo banengga, ekigemo o.

¹² Eti paga nen, an wene Pano Wene yorar laganem, kener mban warir lektaga o. An nen an ar ta oba panggolir taga eti, an nilu dogolir erir lektaga o. An nen ebeka dogolir, Ar yabu woknirige werek eti nen, Ar ndak ar woknarek irep kudi bani ligin yiluk, andaga agarik o.

¹³ Wene pano mende, wokirigi etoma kinggimo ndekner togo pago dogolir, wene edo iniliti kondalek dogorak mende yi arar o yiluk, Ar Tuhan Yesus Kristus paga, dirogo arar wolok erir laga dogon o.

¹⁴ Ar Roh Allah ninilitimo dogolir yamak ninar taga mende nen, yamak keyaga kigik, wene Pano Wene mende eka dogonok nen yiluk, ninoba birugwa mende eti aruwan panorogo dogon o.

¹⁵ Akuni o Asia mende nen, dambe daniluk mbugulkugwa kilu agandik o. Ap ambi Figelus inom, Hermogenes inom, dambe daniluk lagugwa o.

¹⁶ Ogwe ar ap Onesiforus mende keluarga nen perak, niliti adeknggen eku lagugwa paga, Ar Tuhan nen inakba nggok togon kega dogowak o. An kede warek ngganggokla werekma, Onesiforus an nebe lakneyau enggadi werek mende kigik, noba mondok ari waga lagage o.

¹⁷ An o Roma lagagirikmo, Onesiforus nen kwaknabir lagagerek, kwak baniluk nimbirak abuk agagu o.

¹⁸ O Efesus eta dogolir, ar nen ambigar yamak neyaga lagage eti, kar kilu paga o. Ar Tuhan nen akuni yoma obogar inuwak deninaka dogolir, ar kwak iliti akba nggok mondok eruwak o.