Sant 5 - Biblia Wichi

Häpet wichi tä hiw'en m'ayek

¹ ¡Amel tä lew'en m'ayek, huwa, afwchehchä wet änwethä, tsi nichätla atapehen awit'äyhyajay!

² Akäywet tä i'amejen najuthiche, wet lewos tuj haw'uyes.

³ Aka chinaj t'äj, lech'ohle ilän, wet lech'ohlena häpkhilek ikalelhät amejen ates wet hätehlat iwoye itäj tä aitäyhthen. Lehutaywek akäywet ifwalasna, mat lhek yahinya, häpe t'at lewhäy tä lepes.

⁴ Wet häp wichi tä lechumyenwethä tä ilanhi yachuyaj, lhamel lakaha tä kaw'enaho tä lekanej lhamel, häp tä t'änej atapehen ates. Wet Lhawuk tä najit letumfwaya iläte t'at t'änyajaytso.

⁵ Alhenay yalhk'alisayej m'ayhay tä lekän tä i'pe honhat, wet alhätajaynhen amälhyet iwoye w'asetas. ¡Lhek yahinya, näm ifwala tä n'olänyaj!

⁶ Lhen tesayej wet lelänhen wichi tä is alhoho, wet lhamel ihanhiyejt'a iwoyneje yämthilek iwo haya ahilähen.

“Yej lhak'alwethä”

⁷ Mat amel, ipuhfwas, yej lhak'alwethä, wo atamsekisa yäk Lhawuk näm. Lhek tetshan hin'o tä tutchey, inihich'oye ifwala tä lham ichumhiyela lhay tä isis tä tälhe, wet letamsek ihi t'at tä inihich'oye pelhay chik nichätepej lewhäy tä inawop lhäy'e tä chelhchup.

⁸ Häte amel yej lhak'alwethä, mat khajyenhen ahusey tsi Lhawuk tapinlat thahya.

⁹ Ipuhfwas, yej alet'ulhnhen, häpkhilek newache ates chik i'amejen. Tsi Dios tä häpe N'okalelhthayajwo ihi t'at lepe.

¹⁰ Ipuhfwas, yej p'ethatlä profetas p'ante yen lhämeta Lhawuk. Ten t'at tä iwo leteläythayaja, wet ten tä iwo letamseka.

¹¹ Tsi wichi tä leteläythayaj ihi mat lhaikhajyenhen, häp tä n'amel y'en isa. Lehanayej Job p'ante, iteläytej t'at leteläythayajay wet lhaikhajyen, wet häte lehanayej tä lepese p'ante Lhawuk itiyej t'at lakäpfwayaj tä is, tsi Lhawuk ihanej tä hip'altsenhen wichi.

¹² Wet m'ak tä inu'pe täjtso, ipuhfwas, oyok, Chik let'unhatche ämet, yej wo lheya pule wok honhat, wok m'ak at chik häpe. Lhek yahinya, chik lhopejkwe, “Ey'a”, is chik lhäm matche. Wok lhopejkwe, “Kha”, is chik lhäm matche tä lhok “Kha.” Häpkhilek Dios nena tesa amejen.

N'ot'alhyaj tä tälho n'ot'ekhahyaj

¹³ ¿Hä iche elh amel tä lelhakli ihi? Is chik iwo t'alhyaja. ¿Hä iche elh tä lakäjyaj ihi? Is chik ichoylhi tä iwunit Lhawuk.

¹⁴ ¿Hä iche elh tä t'inhayaj ihi? Is chik t'äne Dios leles tä lhamenya yämthilek iwo t'alhyaja'pe, wet y'ilenche aceite häp tä isej Lhawuk lhey.

¹⁵ Wet chik lhamel tä iwo t'alhyaja t'ekhahyaj ihi, ichesla t'inhayaj länek. Lhawuk ineyhthiphäla, wet chik iwoyen'aj lesukyajay, Lhawuk itäyhthiyeja.

¹⁶ Tä mälhyejtso, afwelej amhomche m'ak tä ni'isa chik lewoye, wet wo alhyaja atapehen yämthilek lechesen. Tsi chik elh tä is alhoho lhaimälhtejwek t'alhyaj tä iwoye, wuj tä laha ihi t'alhyajtso.

¹⁷ Häp profeta Elías häpe p'ante hin'o t'at, mälhyej iwoye n'amel. Matkat tä imälhetwek lehusek tä iwo t'alhyaja tä t'alheje Dios yämthilek niwomahchä, wet nemhit pelhay ihi honhat yäk tres nekchämes lhäy'e seis wel'as.

¹⁸ Wet tä tajyäme lewhäytso, iwo t'alhyaja tä t'alheje Dios yämthilek iwomchä, wet nech'e pelhay iche häp honhat, wet yachajo tä yachuyaj iche.

¹⁹ Ipuhfwas, chik elh amel wetayej Dios lhämet tä häpe m'ak tä matche, wet iche elh tä tach'ote yämthilek yäplej,

²⁰ hanayej täja. Oyok, elh chik häpe chik tach'ote lepuhfwa yämthilek ileyej m'ak tä ni'isa tä iwoye, ifwayhtej t'at häp t'ilek wet tamenej tä wujpe lesukyajay tatäy.