Salmo|Sal 1 - Biblia Wichi

LIBRO 1 (SALMOS 1—41 ) Dios leles len'äyij wet akachuhantses len'äyij

¹ Lhawuk lakäpfwayaj tä is iyej hin'o tä niwoyaye wichi tä ni'isahen lhämet, wet ninuyakwe wichi tä lech'isukyajay ihi len'äyij, wet nittayaphäwhäye lhamel tä aläkwyhantses,

² mat itiyej lehumnhayaj Lhawuk lechufwenyaj, wet yen tichunhayaja ifwalapej honatsipej.

³ Lham hätet iwoye hal'ä tä iwhäye tewok. Tä nichätepej lewhäy iwo lhaya, wet ihanhiyejt'a chik tamchäy lew'ole. Nilhokej m'ak tä yenlhi wuj tä isen.

⁴ Tek mälhyejtso wichi tä ni'isahen, hätet iwoye hup tä yafwthi ichäj.

⁵ Häp tä tamenej tä wichi tä ni'isahen nichäthihola Dios lakalelhthayaj, wet lew'et ihiyejt'ala Dios laka wichi.

⁶ Lhawuk t'uyehen wichi tä isen, mat wichi tä ni'isahen nofwila.