Rut 4 - Biblia Wichi

Booz iyej Rut

¹ Booz ihoye hupuy lepe, wichi tä lhaihutwekhen lew'et, wet itayphä. Wet hiw'enlä elh tä nekche lhip tä ihi, häpe t'at elh tä Booz pajchem'at yäme. Wet tahuyej, yok: –Eh yaelh, ho kana, tayphä. Wet lham ihoye wet itayphä.

² Wet Booz nech'e t'äne diez hin'ol tä thänhäy tä ihi hupuy wet tahuyej lhamel, yok: –Taychephä kana. Wet lhamel itaychephä.

³ Wet nech'e Booz tahuyej elh, yok: –Noemí pil naji tälhe honhat tä Moab, iwatläk iwom laka honhat lhip tä lewuk naji n'aelh Elimelec.

⁴ Olham otichunhayaj tä owo asiläta yämlek lehanej. Wet ofwen amho, chik lewatläk lechäj, lefwen yämlek lhamel tä ikana iläte ämet, lhäy'e hin'ol tä thänhäy. Chik lewatläk lechäj, lechäj. Chik kawatahläk lechäj, lefwen n'oho yämlek ohanej. Tsi newache elh chik ihanhiyeja chik ichäjla chik kahäpeya am, wet nech'e häpe olham. Elh ichulho, yok: –Ochäjla.

⁵ Wet Booz nech'e yok: –Chik lechäj Noemí laka honhat, iwatläk lethatlä tä lechuma Rut, häp atsinha tesa tä tälhe Moab, yämlek hin'o p'itsek lhey kamaj iyej t'at laka honhat.

⁶ Tä elh iläte, wet yok: –Kha, tek okalhi chik ochäj, tsi elat nem olewuk m'ak tä in'oyej athana. Is chik am tä lechuma, tsi olham oleyej tä ochäj.

⁷ Häp fwalas tä pajche p'ante, iche Israel lhayis lakey tä elh ilanhi lenisäj wet hiw'enho elh. Häp täja hin'älit tä iwom m'ak tä lewuk, wet yäm kalelhäj m'ak tä iwoye.

⁸ Tä mälhyejtso, elh ilanhi lenisäj wet hiw'enho Booz wet yok: –Is chik am tä lechäj honhat.

⁹ Wet Booz nech'e tahuyej hin'ol tä thänhäy lhäy'e ilhokej wichi wet yok: –Amel ahäpehen iyhäj tä lelätay n'oye wet lew'enay fwalana tä ochäj tä tälhe Noemí ilhokej m'ayhay tä lewuk naji Elimelec lhäy'e m'ak tä lewuk leles Quilión lhäy'e Mahlón.

¹⁰ Häte ochuma Rut, häp atsinha tesa tä Mahlón lech'efwa p'ante tä tälhe Moab, wet oyen och'efwaya. Tä mälhyejtso, hin'o p'itsek lhey kamaj ihiyeja t'at honhat tä oyämetso, wet nitäya tä iyej lepuhfwas lhäy'e wichi. Amel ahäpehen iyhäj tä lelätay n'oye wet lew'enay m'ak tä owoye fwalana.

¹¹ Wet hin'ol tä thänhäy lhäy'e ilhokej wichi iyhäj yok: –Matche, olhamel oläte wet ow'en t'at. Wet häp atsinhatso tä tiyäjihola haw'et, is chik Lhawuk itiyej lakäpfwayaj tä is, yämlek häte iwoye Raquel lhäy'e Lea p'ante, häpe tä y'atälhe tä n'ahäpehen Israel lhayis. Is chik han'ohyaj ihi tä lhehi Efrata wet yämlek letoyaj ihi ey tä lhehi Belén.

¹² Is chik Lhawuk hiw'en amho ales tä tälhe atsinha lhutshatso. Is chik haw'et häte iwoye Fares lew'et, häp hin'o p'ante lhokwey häpe Judá lhäy'e Tamar.

Rut iwo lhäsa

¹³ Tä mälhyejtso, Booz ichuma Rut wet iyej. Wet Lhawuk itichunche Rut, nech'e hich'otshan, wet iwo lhäsa.

¹⁴ Wet nech'e atsinhay lhamel yämeje Noemí, yok: –¡Lewujyaj ihi Lhawuk tä hiw'en amho acheyäs fwalana häpkhilek t'u ame! ¡Is chik letoyaj ihi tä ihi ilhokej Israel!

¹⁵ Lham aikhajyenla wet hich'otla ame chik athaläkw. Tsi häpe atiche Rut tä lhäs, häp atsinha lhutsha tä wuj tä aihumin, laha inu'pe siete ales tä hin'ol.

¹⁶ Wet Noemí ichuma häp han'äfwaj, ipalak, wet lham tä t'uye lhäy'e tä ichihelit.

¹⁷ Wet atsinhay tä lew'etfwas iwo lheya han'äfwaj, lhamel yok: –Nech'e lhäs ihi Noemí. Wet lhamel yen lheya Obed, lham häpe p'ante Isaí lajcha wet David lechäti.

Häp David lechätilis p'ante

¹⁸ Häp täja lheyes häp wichi tä tälhe Fares p'ante: Fares lhäs Hesrón,

¹⁹ Hesrón lhäs Ram, Ram lhäs Aminadab,

²⁰ Aminadab lhäs Nahasón, Nahasón lhäs Salmón,

²¹ Salmón lhäs Booz, Booz lhäs Obed,

²² Obed lhäs Isaí, wet Isaí lhäs David.