Prov 8 - Biblia Wichi

N'ohanyaj t'änch'oye wichi

¹ N'ohanyaj ifwitsenej lechos, wet n'otäfwnhayaj t'än yämthilek wichi iläte.

² Takasitche'pe chenhas tä atoschephä tä iwhäye n'äyij, wet takasthiche n'äyhäy tä tajwek.

³ Ifwitsenej lechos tä ihiche n'olafwek tä hupuy lep'ot lepelis, wet yok:

⁴ “Amel tä ahin'ol, häp tä ot'än amehen, otshupyeneje olhämtesna häp amel.

⁵ Amel tä kahanache m'akejen wet laj ahuseya, achufwenejen wet lehanhiyeja, häpkhilek isen m'ayhay tä lewoye.

⁶ Tetshan olhämet, ofwenla amhohen m'ayhay tä laha ihi wet isen.

⁷ M'ak tä oyämhiyela häpe t'at m'ak tä matche, ohuminhit'ak oyäme m'ak tä kamatache.

⁸ Isen nilhokej olhämtes, ihichet'a elh chik häpek ni'isa alhoho wok otkanyaj.

⁹ Elh tä ihanej hiw'en tä nilhokej olhämtes matchehen t'at. Wet elh tä letäfwnhayaj ihi hiw'en tä nilhokej olhämtes ische alhoho.

¹⁰ Yej chunkat chinaj t'äj tä letachumlä, chunkat ochufwenyaj. Yej chunkat tä letachumlä oro tä isilataj, chunkat n'ohanyaj.

¹¹ Tsi n'ohanyaj laha inu'pe tuntey tä isis. Nilhokej m'ak tä wichi yäme tä isen, w'awulhihit'a.

M'ayhay tä isen tä tälho n'ohanyaj

¹² “Olham ohäpe n'ohanyaj wet matche tä ohin'olhi. Otäfwnhayaj ihi tä owoye m'ayhay tä oyäme.

¹³ Chik on'äyiho m'ak tä ni'isa, häp tä owunit Lhawuk. Olham on'äyiho elh tä lhaichäjlhi wet lhaiwujyen. Olham on'äyiho elh tä iwoye m'ak tä ni'isa wet w'et yämlhi.

¹⁴ Olham tä lewukn'o m'ak tä one'tek õ'woye. Ohäpe n'otäfwnhayaj wet lewukn'o okhajyhayaj.

¹⁵ Olham tä ow'enho leniyatyaj häp reyes, wet niyatey is n'oyej tä yenlhi leyes tä ische alhoho.

¹⁶ Olham tä one'tek niyatey niyatejen wichi, wet lhamel iwo lakalelhthayajayej honhat.

¹⁷ Wichi tä ihuminn'o olham ohumnhen t'at, wet lhamel tä t'u n'okwe nilhok n'oye.

¹⁸ N'okäywet lhäy'e n'owujyaj in'oyej, n'okäywet tä t'un lhäy'e m'ak tä is alhoho.

¹⁹ M'ak chik tälh n'oye wuj tä is, inu'pe oro tä isilataj, inu'pe plata tä lhäy'e lhip tä is.

^20-21 Wichi tä ihuminn'o, ohänche n'o'isyaj len'äyij wet is alhoho m'ak tä iwoye. Wet ow'enho lakäywet tä lewuk, oyäm tapokwe lewukwey häp m'ayhay.”

Tälhe tä nech'enyaya tä n'ohanyaj iyej Lhawuk

²² Wet n'ohanyaj äp yok: “Olham t'at tä ochun tä oiyej Lhawuk tä kamaj niwoya tesa tä yenlhi nilhokej m'ayhay.

²³ Tälhe tä nech'enyaya ohäpe t'at lechunkatsek, tä kamaj nenalhi honhat.

²⁴ Oiche tä kamaj newache lewomekitas tä wus, tä kamaj newache tewok lhayis lhäy'e ts'ifwik lhayis.

²⁵ Tä kamaj newache chenhas, pajche oiche t'at,

²⁶ tä kamaj Lhawuk nenalhi honhat lhäy'e alhotas tä wus, tä kamaj nehichet m'akfwaj chik õyok, Honhat täja.

²⁷ Wet tä Lhawuk yenlhi pule, wet hit'unthi tä lewomekitas ichufwi, olham oiyej t'at.

²⁸ Tä lham itihi lew'et häp pule lhayis yämthilek ikaphä, wet yäm t'un lewomekitas lehis tä tumchä, olham oiyej t'at.

²⁹ Wet tä ne'tek inät lhayis ihiche t'at lew'etes, yämthilek iwoye lham lhämet tä hiw'enho, wet tä wak'alh honhat lefwetes,

³⁰ olham oiyej t'at, wet otch'oteje m'ak at chik häpek lenech'ethayaj. Wet ohäpe t'at lham lakäjyaj nilhokej ifwalas, wet okäjyaj in'oyej nilhok lewhäy tä oiyej.

³¹ Okoylhi t'at tä oyahinpe honhat tä lhenek, wet okäjejlhi wichi tä i'pe.

³² “Athana ch'ahu n'oye, amel tä oaleles. Okäpfwayaj tä is iyej lhamel tä iwoye olhämtes.

³³ Tetshan m'ak tä ochufwen amejen, chumlä n'ohanyaj, yej kachuye.

³⁴ Okäpfwayaj tä is iyej hin'o tä tach'ahu n'oye wet iniwhi n'ohlä tä iwhäye owukwe ifwalapej ifwalapej.

³⁵ Tsi elh chik nilhok n'oye nilhoke t'at lew'atshancheyaj, wet Lhawuk tach'othiyela.

³⁶ Mat häp elh chik lhaiwetahat wet nilhoka n'oye, lham t'at tä lhaiwit'äyen. Nilhokej wichi tä n'äyi n'oho, ihumin t'at t'ilek.”