Prov 7 - Biblia Wichi

Atsinha tä ni'isa lakey tä iwoye

¹ Yäs, ch'ahuye olhämtes wet en atichunhayaja.

² Woye m'ak tä one'tek lewoye, häpkhilek haw'atshancheyaj ihi. Amajeji ahusek ochufwenyajay, hätet iwoyek let'uye ales.

³ Äytej afwus wet lesaynhi ahusek.

⁴ N'otäfwnhayaj en häpeya hach'inhä, wet n'ohanyaj en häpeya aelh.

⁵ T'uhla ame yämthilek akniwit'äyena häp atsinha tä lech'efwa ihi tä ikänitlhi amej lhämtes.

⁶ Iche ifwala tä ohoye oka ventana wet oyahinche t'at.

⁷ Ow'en wichi tä laj lehuseya, ow'en mamses, wet iche elh tä nitäfwelayej chik is wok ni'isa häp m'ak tä iwoye.

⁸ Yik t'at, tä nichäte esquina wet hap'alakpe n'äyij, wet ihoye atsinha tä kain'oyaj länek wukwe.

⁹ Wet tä ifwala y'uy wet nech'e honatsi,

¹⁰ inuphä atsinha tä tälhchufwi lewukwe wet ihoye mamse. Taw'uyhi lew'uyis tä isis, n'äl tä häpe t'at atsinha tä lakain'oyaj ihi.

¹¹ Ifwunhiyejt'a m'ak at chik häpe. Häpe atsinha tä tek w'et yiklhaye wet len'äfwlhi ihihit'a, iwohit'a lew'etahchä,

¹² ilunchehen hup kawayhil, takasthiche n'äyhäy tä iniwhichehlä hin'ol, elh chik nichutej itsoklhi.

¹³ Wet atsinhatso tä nichäte mamse, tatsufwelej wet hits'uhi lak'aj, n'äfwelhit'a, wet tahuyej wet yok:

¹⁴ “Pajchemat olän itshäwet tä ofwelnaj tä oyok, Olänla yämthilek olha'isyene Dios.

¹⁵ Häp tä tamenej tä ot'u amche, matche tä owatläk oaiw'en, wet tä oaiw'en, is t'at.

¹⁶ Owaklhatmat omäwet, och'enpe ow'uy tä isilataj.

¹⁷ Otsäype m'ak tä lenij akäjche, mirra, áloes, canela lenij.

¹⁸ Lhu wet n'attsufwelchewek, n'awoyej n'amehen tä y'akän lhamehen pajla'tha ifwala n'amejen.

¹⁹ Och'efwa ihit'a katsi, yik naji, ihoye honhat tä atofwe.

²⁰ Wuj chinaj t'äj tä ichäj, atofwe ifwalanaj lewhäy chik tapinla.”

²¹ Matche tä atsinha inityen hin'o wet ikäsyenchehen lhämtes. Lepese, ikalhi t'at hin'o,

²² wet yikche atsinha, hätet iwoye weyis tä õ'tone lew'et tä õ'länhen itshätäy, hätet iwoye tson'ataj tä yikche hin'o tä yäyit, hätet iwoye ch'iwase tä õ'sakanej,

²³ pajtha n'och'äha tajo t'at t'otle, hätet iwoye afwenche tä lhaiteläfwite hotanaj, ihanhiyejt'a tä t'ilek t'at.

²⁴ Tä mälhyejtso, tä ahäpehen oles ch'ahu n'oye athana wet tetshan m'ak tä oyäme.

²⁵ Yej tichunejlhi atsinha tä mälhyej tä oyämetso, yämthilek alemenyenej wet lhekche.

²⁶ Tsi tamenej wujpey hin'ol tä lewit'äyhyaj ihi wok y'inhen, lhiphiyet'a, wujpey lelänhay,

²⁷ wet chik lenukwe n'äyij tä tiyäje lewukwe, lenukwe t'at n'äyij tä tiyäje ilek.