Prov 6 - Biblia Wichi

Chik aelh t'alhe m'ak tä lewuk elh, yej lhok, “Olhamlak okeltejlhi”

¹ Yäs, chik alelhuhyenej aelh laka pi'ä,

² hätet iwoyek lhäyitlhi amej ämtes, wet ayen lhäytseka.

³ Lhehi t'at takweyey häp hin'o tä aelh letes ihihlä. Yäs, chik let'uhläk letafwayej täjtso, woye täja: Hoye aelh wet keltejlhi yämthilek tiskanpe letes.

⁴ Yej t'elej wet yej lemä,

⁵ afwayhtej awit'äyhyajtso, atech'aynej ch'iwase tä lhaifwayhtej hin'o tä ichowalhe, wok afwenche tä n'otkwey nistakej.

Tetshan m'ak tä siwanhas iwoye wet achufwenej

⁶ ¡N'etäjayis, lhek yahin m'ak tä siwanhas iwoye! Tetshan lakey wet achufwenej.

⁷ Tej tä newache elh chik laka niyat,

⁸ mat tachumlhi t'at wet ihutwek lhäk tä kamaj kapelhayisa, ihutwek hal'ä lhay tä y'o yämthilek lhäk iche t'at.

⁹ ¡N'etäjayis, naya tä lemä! ¡Nephä, yej lemä!

¹⁰ Tä lekän nahati wet letatsufwel amej yämthilek akäj tä lemä,

¹¹ hap'altseyaj ailänla wet nehläs nichätla atape, hätehlat iwoye etantsaj chik aipäjlhi.

M'ak tä hin'älit hin'o tä ni'isa

¹² Hin'o tä ni'isa iwoye t'at m'ak tä ni'isachehen. Häpe hin'o tä lhämtes mathichehent'a.

¹³ Tä yämlhi, isuyhthipej tatelho, wet äp ilanlhipej lepach'o, wet äp yämyenwethä lefwus.

¹⁴ Isit'a m'ayhay tä ihi lehusek, yen at tichunhayaja tä t'uhläk iwoye m'ak tä ni'isa, iläkwethä iyhäj, t'ukwe t'at laka'tshayaj.

¹⁵ Tä mälhyejtso, lewit'äyhyaj iselkatla wet lakacha ihichet'ala.

M'ayhay tä Lhawuk y'ulhan

¹⁶ Iche seis m'ayhay tä Lhawuk y'ulhan, wok oyok, siete m'ayhay tä matche tä n'äyiho. Häp tähesna:

¹⁷ Olhaichäjlhi; olhämtes mathichehent'a; olän elh tä laj letesa;

¹⁸ owo ohuseka'pe otkanyaj yämthilek owoye; on'etäjiyet'a m'ak tä ni'isa;

¹⁹ oyäme m'ak tä n'am w'en, w'et oyämlhi; wet m'ak tä owoye tamenej tä tataywek iyhäj.

M'ak tä n'okain'oyaj itone hin'o

²⁰ Yäs, enpej atichunhayaja ajcha lhämet, wet yej leyej m'ak tä ako ichufwen amej.

²¹ Satyenhi ahusek wet ti amej, hätet iwoyek lhen amisa.

²² Ichunla ahiläk lelunlhi, wet t'uhla amek lemä, wet yämhilhila amhok len'om.

²³ Tsi lhämtesna häpe n'ochäkw, wet lechufwenyajay häpe isi, wet lefwonyajay tä hiw'en amho häpe t'at han'äyij tä haw'atshancheyaj.

²⁴ Tach'otla ame häpkhilek nikalha amhi atsinha tä ni'isa tä lech'efwa ihi chik fwetaj ikänitlhi amej lhämtes tä akäschehen.

²⁵ Yej tihi ahusek tä lekäne tä isilataj. Yej yahinlä tatey chik aiyahin.

²⁶ Atsinha tä kain'oyaj länek lakahat pan lhiphaj. Mat uhlä atsinha tä lech'efwa ihi, tamenla amej wet awit'äyhyaj ihi.

²⁷ Tetshan, elh chik iti'pe let'okwe itäj, lew'uy y'o t'at,

²⁸ wet elh chik t'äsche fwiyhol, lepach'ol y'o t'at.

²⁹ Häp tä mälhyej'attso elh chik yikejlhi elh ch'efwa, iwohiyet'ak nikatayej n'otasnhayaj.

³⁰ Elh tä nichuyu wet t'etan, õyen at häpeya hin'o tä ni'isa.

³¹ Wet chik õhw'enej, tiskanla'pe siete veces häp m'ak tä t'etane, wet äp õ'sohiyeja nilhok m'ak tä ihi lew'et.

³² Häp tä mälhyej'attso elh chik yikejlhi elh ch'efwa, lehusek ihihit'a. Elh tä iwoye täjtso, lhaiwit'äyen t'at.

³³ M'ak tä ikalhihlä lakeytso, õ'wo lelätshaya wet õhn'äfwlhatlhi, wet lajit lepesa tä wichi y'ulhan.

³⁴ Tsi hin'o tä lech'efwa atsinha, t'ischenyaj ihi wet lewäk ihi, wet tek itäyhthiyeja letes häp elh chik nichäte ifwala chik iwo hayahlä,

³⁵ wet tek tachumlahlä m'ak chik elh fwetaj tiskanej letape. Tej chik wuj m'ak chik õ'fwenho, mat tatäyhit'a lewäk.