Prov 5 - Biblia Wichi

Uhlä atsinha tä lech'efwa ihi tä t'uhläk isakan amej

¹ Yäs, tetshan olham ohanyaj wet ch'ahu n'oye tä oyäme m'ak tä ohanej,

² häpkhilek is m'ak tä lewoye wet m'ak chik lhäme häpe t'at m'ak tä matche.

³ Tsi atsinha tä lech'efwa ihi akäj lhämtes tä iwoye, hätet iwoye akäyek.

⁴ Mat tä lepese hätet iwoye m'ak tä tapay wet äp y'uy, inu'pe n'ofwajnhat tä lhayhil nitäkw.

⁵ Ihänla ame n'op'itseyhay lew'et, tsi len'äyij tä inukwe tiyäje t'at n'ot'ilek.

⁶ Wet ihuminhit'a n'äyij tä tiyäje n'ow'atshancheyaj, wet kalelhäjit'a m'ak tä iwoye.

⁷ Tä mälhyejtso, tä ahäpehen oles ch'ahu n'oye athana wet woye m'ak tä ofwel amhohen.

⁸ Yej aletott'ayne atsinha tä lech'efwa ihi wet yej hoye lewukwe.

⁹ Tsi chik lewoye täjtso, wichi iyhäj tä kahap'altsentsesa isila amej wet ahäpkhila elh tä w'et m'ayek t'at.

¹⁰ Lhamel iwohla kotsayej akäywet lhäy'e nilhokej m'ak chik tälho achumtes.

^11-13 Chik mälhyejtso, chik nemla akhajyhayaj ihi nech'ehilak letichunche täjtso wet lhohlak: “¿Chipte tä n'am woyehte m'ak tä is alhoho, wet tek owoye tä õ'näyej n'oho m'ak tä ni'isa, wet n'am woye lhämet n'ochufwenyajwos tä ichufwenn'o?

¹⁴ Tatäy lhimphaj wet matche tä owit'äyhyaj in'oyej tä oiyej wichi.”

Yej leleyej atsinha tä hach'efwa

¹⁵ Chik lechim, yäyej inät tä ihi apek.

¹⁶ Yej w'et letsäylhi inät tä ihi aka ts'ifwik, yej tsächehen hupuy kawayhil.

¹⁷ Ts'ilak am tä alewuk ts'ifwik lhäy'e inät tä ihi, lewukhit'a wichi iyhäj.

¹⁸ Is chik Lhawuk lakäpfwayaj tä is ihi t'at aka ts'ifwik, wet wo akäjyajayej häp atsinha tä lhen unfwaya tä amamse,

¹⁹ häp lham tä laj lefwitseyaja. Is chik nittäya lehumnhayaj tä iti amej nilhokej ifwalas.

²⁰ Yäs, yej läna amej atichunhayaj chik leyahin atsinha tä lech'efwa ihi. Yej tatsufweleja atsinha elh.

²¹ Lhawuk itetshan t'at m'ak tä hin'o iwoye, niwohit m'ak chik niw'ena.

²² Hin'o tä ni'isa, lakey tä iwoye yen lhäytseka. Lech'isukyaj hätet iwoye niyhäy tä yäyitlhi.

²³ M'ak tä lhaknitsokayejlhi tä iwoye ihäne t'at t'ilek. Lhektshanyaj tä wuj tä iwoye tamenhiyejak tatäy.