Prov 4 - Biblia Wichi

Chunkat tä lewatlä n'ohanyaj

¹ Mamses, ch'ahuyaye ajchalis lhämtes tä ne'tek lewoyaye. Tetshan, häpkhilek lehanej m'ak tä is.

² Ochufwen amejen m'ak tä is chik lewoyaye. Tä mälhyejtso, yej leyej ochufwenyajayna.

³ Tsi häte olham ohäpehte elh tä lajcha ihi, wet oko wuj tä ihuminn'o.

⁴ Ojcha yokwe tä ichufwenn'o: “Enpej atichunhayaja olhämtes. Woye m'ak tä one'tek lewoye, häpkhilek haw'atshancheyaj ihi.

⁵ Is chik lewatlä n'ohanyaj wet lewatlä n'otäfwnhayaj. Yej p'ethatlä olhämtes wet yej kachu.

⁶ Humin n'ohanyaj wet yej leyej, tsi t'amajila amej.

⁷ Chunkat tä lewatlä n'ohanyaj lhäy'e n'otäfwnhayaj.

⁸ Humin wet aineyhthiphäla. Wujyen wet aiwujyenla.

⁹ Yenla awayhata n'olhetek t'ak tä wuj tä isilataj, wet yäythiyeja etek.”

N'ohanyaj häp tä ipäyen ame n'äyij

¹⁰ Yäs, ch'ahuye olhämtes wet a'en lewuka, wet wujla'pe nekchämis chik haw'atshancheyaj ihi.

¹¹ Ohänla amche n'ohanyaj len'äyij. Otch'otla ame yämthilek lenukwe n'äyij tä is alhoho,

¹² wet tek ihichela m'ak chik inu ahilä, ihichet'ala m'ak chik letanhäphänej chik lenu alhoho.

¹³ Akwey untej ochufwenyaj wet yej leyej. Amajej, tsi häp tä haw'atshancheyaj.

¹⁴ Yej nukwe len'äyij wichi tä kahap'altsentsesa, wet yej ten lhamel tä ni'isa.

¹⁵ Yej nukwe len'äyij, atontehlä. Mäch'oye lhamel wet tujlhache han'äyij.

¹⁶ Tsi chik niwoyaye m'ak chik ni'isa, imähihent'a, wet chik niläna elh chik häpe, nahati ilänhit'a.

¹⁷ Lhamel tufw pan tä tälhe m'ak tä ni'isa tä iwoye, wet iyäyej hat'es tä t'etantes.

¹⁸ Mat häp wichi tä isen lhamel len'äyij hätet iwoye ifwala tä nech'e inuphä, lhäy'epej lhip, lhäy'epej lhip tä isi.

¹⁹ Mat häp wichi tä iwoye m'ak tä ni'isa, len'äyij honatsi t'at, wet hiw'enhit'a m'ak chik tanhäphänej.

N'ohanyaj häp tä n'ow'atshancheyaj tälho

²⁰ Yäs, tetshan olhämtes wet ch'ahuye m'ayhay tä oyäme.

²¹ Yej p'ethatlä wet amajeji ahusek,

²² tsi elh tä iwoye häpe t'at lew'atshancheyaj wet kacha yämthilek t'isan isej.

²³ Uye ahusek, nuhatpe m'ak at chik häpek let'uye, tsi häpe t'at tä haw'atshancheyaj tälho.

²⁴ Tetshan m'ak chik let'uhläk lhäme, häpkhilek ka'ena ämeta m'ak chik kamatache.

²⁵ Tetshan m'ak chik is alhoho, yej leyej tä leyahin m'ak tä ihi tä letatache.

²⁶ Chunkat tetshan m'ak tä let'uhläk lewoye, häpkhilek ispej alhoho.

²⁷ Yej tatsayej kanhi tä lewoye, wet yej woye m'ak tä ni'isa.