Prov 31 - Biblia Wichi

Lemuel lhämtes

¹ Rey Lemuel tä lew'et Masa, häp tä lhämtes täja tä lako ichufwenej wet yok:

² Ahäpe olhäs tä tälho okachowej. Dios t'at tä nichulho ot'alhyaj tä olhaip'altsene. Iche m'ak tä ofwel amho, oyok:

³ Yej alekhajyench'oye atsinhay, tsi lhamel tamenej reyes tä tatäy.

⁴ Lemuel, ofwel amho, isit'ak reyes lhäy'e niyatey iyäyej hat'es.

⁵ Tsi chik iyäyej, hip'ethatlä leyes, wet nemhit itetshan wichi tä p'elitses.

⁶ W'enho hat'es häp wichi tä eyte y'inhihen, lhäy'e iyhäj tä laj lakäjyaja,

⁷ häpkhilek nemhit nitichunwethä lhamej tä p'elitses lhäy'e tä leteläythayaj iyej lhamel.

⁸ Ämlhi'pe wichi tä laj len'ohyajaya, wet ch'ote iyhäj tä newache elh chik tach'ote.

⁹ Ämlhi wet woye m'ak tä is alhoho, wet ch'ote wichi tä p'elitses tä iwatlä m'ayek.

Atsinha tä lehusek ihi

¹⁰ Atha chik õnlhoke atsinha tä lehusek ihi, tsi hätet iwoye m'ak chik t'unhi, wuj laha, inu'pe tuntey tä isis.

¹¹ Lech'efwa wuj tä t'ekhaye, wet lham ikalhi t'at lakäywet.

¹² Nilhokej ifwalas hin'o isej atsinha, tsi ihanhiyejt'a chik iwoyeje m'ak chik ni'isa.

¹³ Ichäj tson'ataj w'ole lhäy'e lino, wet ihumin tä yenwethä.

¹⁴ Hätet iwoye barco tä ichäj n'olhäk tä tälhe lhip elh tä atofwe.

¹⁵ Tä nech'e fwala tä kamaj honatsi i'pe honhat, nephä wet iwaklhatho lhäk lew'et lheley, wet hiw'enhomche lechumtes lakawos tsinhay.

¹⁶ Itetshan honhat lhip chik häpe wet ichäj, wet chinaj t'äj tä ikalhi, itihchä uvas tä itihi lelafwek.

¹⁷ Lhaikhajyen wet tachumlhi,

¹⁸ wet hiw'en tä ikalhi t'at laha m'ak tä wichi ichäj tä tälhe, wet tä honatsi tachumlhi pajtha honaj chowej.

¹⁹ Ikhajyen takweyey wet tayhin wet ipätsinchehen.

²⁰ Lakato t'unhihot'a, hiw'enho t'at m'akfwaj elh tä iwatlä m'ayek.

²¹ Tek nowayhlä fwiy'et, tsi nilhokej lew'et lheley lew'uyis ihi t'at.

²² Lham t'at tä yenwethä lew'uyis tä taw'uyhiche tä imähen, wet lakay'uchelis häpe t'at wesaj tä isis.

²³ Wichi tä ihi hupuy tä lew'et wuj tä nitäfwelej hin'o tä lech'efwa tä iyejpej hin'ol tä len'ohyajay ihi tä lhaihutpejwek.

²⁴ Lham yenwethä leyhil tä isis, wet wichi ichäj t'at. Yenwethä n'okawakay, wet hin'ol tä yen chumeta m'ayhay tä ihäne honhates iyhäj, lhamel ichäj t'at.

²⁵ N'äl tä häpe t'at atsinha tä takhajay wet lewujyaj ihi, wet yenhit'a lhakliya ifwalas tä tatache.

²⁶ Chik yämlhi, n'äl t'at tä lehanyaj ihi, wet tä ichufwenhen iyhäj, n'äl tä lep'altsenyaj ihi.

²⁷ Itetshanpej m'ak tä lew'et lheley iwoye, wet tufwit'a m'ak chik nitälhaye lechumet.

²⁸ Leles lhäy'e lech'efwa lhamel iwujyen wet yok:

²⁹ “Iche t'at atsinhay tä lehusey ihi, mat am lenu'pe lhamel, wuj tä ahusek ihi.”

³⁰ M'ayhay tä ikänitlhi hin'o mathichet'a, wet n'osilatyaj t'unhit'a. Mat häp atsinha tä ihumin Lhawuk wet iwoye lhämtes, häp tä t'uhawetej chik õ'wujyen.

³¹ ¡Wunit tä ihi tä wichi tatache! ¡Is chik lewujyaj tälhe t'at lechumtes tä yenlhi!