Prov 30 - Biblia Wichi

Agur lhämtes

¹ Agur tä lajcha Jaqué tä lew'et Masa, häp tä lhämtes täja. Agur tahuyej Itiel lhäy'e Ucal wet yok:

² Matche tä ohich'atej tä n'am han m'akej,

³ tsi tälhe tä olhaichufwenhiyejt'a n'ohanyaj wet ontäfwenhiyejt'a Dios tä N'ot'amajchet.

⁴ ¿Atsi tä tiyäj puleye wet äp tälh puleye? ¿Atsi tä ihutwek yafwthi lhayis tä ihi takweyey? ¿Atsi tä ihanej chik ikäfwnhi wesaj häp inät lhayis? ¿Atsi tä iwo lepeseya honhat? ¿Wet chiwoye lhey, lhäy'e lhäs lhey, chik lehanej?

⁵ Nilhokej Dios lhämtes isen t'at, wet lham t'uyehen wichi tä ilethane.

⁶ Yej let'isej m'ak chik häpe häp lhämet, tsi elat aifwon wet ain'älthila tä w'et lhämlhi t'at.

⁷ Tajlhame täkwfwas m'ak tä ot'alhej ame, Iwuk, tä kamaj n'am leyej honhat. Tähesna:

⁸ Tiyej kanhi n'ohlä m'ak tä häpe n'otkanyaj lhäy'e chik w'et oyämlhi. Wet yej lhen n'oye hin'o tä hiw'en m'ayek, wet yej lhen n'oye hin'o tä niw'ena m'ayek, mat en n'oye hin'o tä lhäk nittäyayej.

⁹ Tsi chik wuj m'ak chik ow'en, elat olehla amej wet oyohlak, “Ontäfwenhiyejt'a häp Lhawuk.” Wet chik äp hich'atej tä m'ak n'am w'en, elat ot'etanla, wet nech'e oailäkwlhi tä ahäpe oka Dios.

¹⁰ Yej lhäme tä ni'isa n'okawo chik lhehi tä tatache häp lewuk. Tsi lhamlak yäm ame tä akni'isa, wet ates ihi.

¹¹ Iche elh tä fwitsaj tä yäme tä fwetaj ni'isa lajcha, wet iwoyeje lhämtes tä ni'isachehen häp lako.

¹² Ichehen lhamel tä fwetaj newache lech'isukyaj, mat lakokhayaj ihi.

¹³ Ichehen lhamel tä fwetaj len'ohyajay ihi, wet lhainuhatpe iyhäj.

¹⁴ Ichehen lhamel tä yen at lefwajnhatesa letsotey, wet tet iwoyek tsonhates t'at lech'alo lhiley, wet ilänejen wichi tä p'elitses tä ihi honhat.

¹⁵ Iche m'ayhay täkwfwas tä hätet iwoye fwis, iläthiyet'ak yok, “Naya, tek owatlä lhip”, mat hits'uhi t'at w'oyis. Iche tres m'ayhay tä ayhthatses, wok oyok, iche cuatro tä nhanayej chik yok, “Naya.”

¹⁶ Häpe n'op'itsekw'et, lhäy'e atsinha tä sufwnaj, lhäy'e honhat, tej tä iwomchä mat kamaj iwat'atlä inät, lhäy'e itäj, ihanhiyejt'ak yok, “Naya, tek owatlä hal'ä.”

¹⁷ Elh tä iläkwlhi lajcha, wet yen w'et m'ayeka lako lhämet tä ne'tek yäm is m'ak tä iwoye, is chik tsetwos timche tatelhoy, wet istiwin lhayis ichunnejen leles häp t'isan.

¹⁸ Iche tres m'ayhay tä oseltej, wok oyok, cuatro tä n'am hanej. Häp tähesna:

¹⁹ Häp iyhäjkottaj tä wey'ä, lhaitsayhatlhi wet is t'at. Wet amlhäj tä takälä newahi, mat chik tiyäjpe chenaj is t'at. Wet barco chik inukwe inät, häpe m'ak tä wuj mat is t'at. Wet hin'o ihanej tä itichunayenlhi lhamej atsinha, wet ikalhi t'at.

²⁰ Atsinha tä lech'efwa ihi tä iwoye lakain'oyaj, tufw lhäk wet ilejo lak'aj wet yok: “Ihichet'a m'ak chik ni'isak owoye.”

²¹ Iche tres m'ayhay tä matche tä nit'uhawetayej, wok oyok, cuatro tä wichi niteläytayej. Häp tähesna:

²² Hin'o tä n'okawo mat tä lepese niyat t'at, wet hin'o tä ch'isuk mat teskanej lhäk,

²³ wet atsinha tä õn'äyiho mat lech'efwa ihi, wet atsinha tä n'okawo mat tä lepese icheyäjo lewuk tsinha lew'et.

²⁴ Iche cuatro itshätäyhas tä ihi honhat tä matche tä ihan m'akejen, inu'pe hin'ol tä ihanche m'akejen. Häp tähesna:

²⁵ Siwanhas newache lakhajyhayaj, mat tä nahayhos ihutwek lhäk yämthilek iche t'at m'ak chik tufw.

²⁶ Wet inätetas häte lakhajyhayaj ihihit'a, mat yen at lew'eta chenhas.

²⁷ Wet chol, laka niyat ihihit'a, mat tä yikhen wuj tä is, tek lhaiwomwethä.

²⁸ Wet chal'a takhajayhit'a, lehanej tä letsoklhi t'at, matkat ihi t'at niyatey lewukwey.

²⁹ Iche tres m'ayhay tä is lew'ekyajay, wok oyok, cuatro tä wuj tä is tä ilunlhi. Häp tähesna:

³⁰ Hay'äj inu'pe itshätäy iyhäj, wuj tä takhajay, nowayhiyet'a m'ak chik häpe.

³¹ Ho'o tä takhajay, wet kayla tä asnak, wet rey tä ichunlä laka nifwotaj.

³² Chik alhen ch'isukwa tä alechäjlhi, wok lhenwethä m'ak tä ni'isa, leyej wet en atichunhayaja täja:

³³ Elh tä ikasohi itshäwet kat'os, hiw'enla manteca. Wet elh tä yäm äytaji leyalh tä tälhche lenhus, w'oyisla. Wet elh chik iläkwlhi elh, tatayhlawek lhamel.