Prov 3 - Biblia Wichi

M'ak tä is chik elh iwoye chik t'uhläk iwoye Dios lhämet

¹ Yäs, yej p'ethatlä ochufwenyajay, wet amajeji ahusek olhämtes,

² wet wujla'pe ifwalas lhäy'e nekchämis tä leläy, wet wujla atamsek chik i'amej.

³ Yej lhekach'oye n'ohumnhayaj lhäy'e m'ak tä matche. Ti amej, hätet iwoyek lhen amisa, wet lesaynhi ahusek,

⁴ häpkhilek Dios lhäy'e wichi akäswethä amej.

⁵ Mälhetwek ahusek tä let'ekhaye Lhawuk, yej t'ekhaye am ahanyaj.

⁶ Tihi Lhawuk nilhokej m'ak at chik häpe tä lewoye, wet lhamlak isyen alhoho.

⁷ Yej fwetaj wuj tä lehan m'akej, mat humin Lhawuk wet woye lhämtes, wet atiyej kanhihlä m'ak tä ni'isa.

⁸ Häp täjtso kacha tä wuj tä is yämthilek aikhajyen.

⁹ Wujyenej Lhawuk nilhokej m'ak tä akäywet, lhäy'e akäs lhay tä ichun tä lelanhi,

¹⁰ häpkhilek tapokwe akapuchehis wet aka hat'es nitsäywethä tä lehis tapokwe.

¹¹ Yäs, yej t'ulhan chik Lhawuk iti amej letasnhayaj tä ifwonej ame m'ak chik lham nhuminache.

¹² Tsi Lhawuk itasin elh tä lham ihumin, hätet iwoye hin'o tä itasin lhäs tä lehumnek.

M'ayhay tä isen tä tälho n'ohanyaj

¹³ Elh chik nilhoke n'ohanyaj, Dios lakäpfwayaj tä is iyej. Häpe t'at elh tä lehusek ihi,

¹⁴ tsi m'ak tä ikalhi inu'pe m'ak tä õ'kalhi tä tälho chinaj t'äj, wet laha inu'pe oro.

¹⁵ Laha ihi n'ohanyaj, inu'pe tuntey tä isis. Nilhokej m'ak tä wichi ikänch'oye, tek w'awulhi n'ohanyaj tä laha ihi.

¹⁶ N'ow'atshancheyaj tä pitaj häp tä tälhe, lhäy'e n'okäywet, wet lhäy'e n'owujyaj.

¹⁷ N'ohanyaj len'äyhäy häpe n'äyhäy tä ischehen. Chik lenukwehen, atamsek ihi t'at.

¹⁸ Häpe t'at hal'ä tä iwo lew'atshancheyaja häp wichi tä itsok, wet Dios lakäpfwayaj tä is iyejen lhamel tä nileyayej.

¹⁹ Lhawuk yenejlhi honhat häp lehanyaj, wet hit'unteji pule lhayis.

²⁰ Wet tä lehanyaj ihi, hiw'enhathen lewomekitas, wet itälhtho pule ayas.

Elh chik lehanyaj ihi, is alhoho len'äyij

²¹ Yäs, tipej amej n'ohanyaj wet en atichunhayaja, isit'ak yik hach'oye wet nemhit lew'en.

²² Tsi häpkhilek haw'atshancheyaj tälho wet aisilatyenla, tehlat iwoye n'olhamis.

²³ Wet tek ihichela awit'äyhyaj chik lenukwe n'äyij. Ihichet'ala m'ak chik letanhäphänej.

²⁴ Chik lewo elakw'eta, ihichet'ala anowayhyaj, wet chik lemä, atamsek ihi t'at.

²⁵ Tek lenuhthila amho m'ak chik aiselkat chik ni'isa, wok n'owit'äyhyaj chik nichätpe wichi tä ni'isahen.

²⁶ Tsi Lhawuk hiw'enla amho ahusek yämthilek lechaye t'at häp lham, wet tek lechäthihola n'otkanyaj chik häpe.

Tiyej hach'otyaj aelh

²⁷ Elh chik häpek iwatlä hach'otyaj, yej alefwonlä chik lew'en tä lekalhi.

²⁸ Yej tahuyej aelh wet lhok, “Mäh tapilak ifwala, ow'enla amho m'ak tä lewatlä.”

²⁹ Yej woyeje atichunhayaj tä ni'isa aelh tä icha ame.

³⁰ Yej t'ukwe m'ak chik lhen tesayej aelh wet letatayhlä, chik newache m'ak chik ni'isa chik iwoyej ame.

³¹ Yej lhok, “Häp tä is hin'o tä ka'atännhatsaja”, wet yej ten m'ak tä iwoye.

³² Tsi Lhawuk y'ulhan häp wichi tä iwoye m'ak tä ni'isa, mat ihumin t'at tä iyej wichi tä isen.

³³ Lhawuk takäpfwayeje m'ak tä ni'isa lew'et hin'o tä ni'isa, mat takäpfwayeje m'ak tä is lew'etes wichi tä isen.

³⁴ Lhawuk iläkwethä häp wichi tä aläkwyhantses, mat hip'altsen häp iyhäj tä lhaknichäjawethä.

³⁵ Ahantses t'awayhat häpe t'at lewujyaj, mat häp akachuhantses lelhukla tä w'et m'ayhay t'at.