Prov 27 - Biblia Wichi

¹ Yej alechäjejlhi tä lhok, “Owohiyela täjtso chik fwala.” Tsi lehanhiyejt'a m'ak chik ihichelak fwala.

² Is chik wichi t'at chik yäm ame tä ais. Isit'ak am t'at chik lhäm ame tä ais.

³ Choyhat tunte lhäy'e holo, matkat hin'o tä ch'isuk lewäk nem koyhyaj tä choyhat, lechoyhthayaj inu'pe tähestso.

⁴ N'owäk häpe t'at m'ak tä ni'isa, wet n'ofwitseyaj iwasthi m'ak at chik häpe. Mat n'ot'ischenyaj inu'pe tähestso, ihichet'a elh chik tumlä.

⁵ Is chik lefwone aelh. Yej tech'aynej tä leskatho tä lehumin.

⁶ Ot'ekhaye t'at okalay'i, tej chik iwo olätseka. Mat ot'ekhahiyet'a elh tä yen tayhfwayan'o, tej chik fwetaj ihuminn'o wet hits'u och'alo.

⁷ Elh chik yip'is, y'ulhan akäyek. Mat häp elh tä nichuyu, tej m'ak chik tapay, mat yok, “Hak'onek.”

⁸ Elh tä yikch'oye honhat tä lew'et, hätet iwoye afwenche tä yikch'oye lhup wet lhaitonitche tä yik.

⁹ M'ak tä lenij akäjche ikänitlhin'o. Wet okalay'i lhämtes tä isen, häp tä ikhajyenn'o.

¹⁰ Yej leyej akalay'i, wok häp elh tä ajcha kalay'i. Häpkhilek tejlak alhakli ihi, mat lehohiyet'a apuhfwa tä lew'et atofwe, tsi iche elh tä ni'tofwayehlä haw'et.

¹¹ Yäs, is chik ahäpe elh tä lehusek ihi, häpkhilek okäjyaj in'oyej wet ohanhiyeja owoyneje olhämet chik onchulho elh chik fwetaj ilätyenlhi n'oyej lhämet.

¹² Elh tä hin'olhi ihanlä lewit'äyhyaj wet lhaiskat. Mat häp elh tä nihn'oyalhi tujlhache t'at m'ak tä iwoye, pajla'tha lewit'äyhyaj ihi.

¹³ Elh chik lhailhuhyenej elh tä nitäfwelayej laka pi'ä, soyej lew'uy yämthilek yen lhäyeka letape.

¹⁴ Elh tä ifwitsenej lhämet tä n'okwiyej elh tä kamaj honatsi, tet iwoyek iläkwlhi elh.

¹⁵ Atsinha tä äkleyhtsaj hätet iwoye hup lhetekch'o tä tatoy chik iwomchä.

¹⁶ Chik ofwetaj on'äyejo m'ak tä iwoye, hätet iwoyek ofwetaj ofwonlä ihwok, wok ot'uhläk otsok inät.

¹⁷ Chik ot'uhläk y'uy chinaj, ofwutej at elh chinaj. Häp tä mälhyej'attso, hin'o t'at tä ikhajyen elh.

¹⁸ Hin'o tä t'uye lelafwek, tufwila yachuyaj lhay. Häp tä mälhyej'attso elh chik t'uye lewuk, lewuk iwujyen t'at.

¹⁹ Chik oyahnhi inät, ow'en t'at opeyak. Häp tä mälhyej'attso, hin'o letichunhayaj hin'älit t'at m'ak tä ihi lehusek.

²⁰ N'ot'ilek lhäy'e n'op'itsekw'et, tek lepes iche. Häp tä mälhyej'attso, hin'o tä ayhthatsaj lepes ihichet'a.

²¹ Oro lhäy'e plata, õ'thatho itäj häpkhilek õhw'en chik kalelhäj tä is. Wet häp tä mälhyej'attso hin'o. Chik wichi iwujyen, n'änhila m'ak tä häpe.

²² Tej chik õ'päjlhi hin'o tä m'ak nitälhaye, wok õ'chofwaji, ilehiyejt'a lakey tä nit'uyahläk yenlhi m'ak chik häpe.

²³ Is chik wuj tä letäfwelejwethä aläy tson'atas, wet let'uyepej aläy kayla lhayis,

²⁴ tsi n'okäywet lhäy'e n'oniyatyajay t'unhit'a.

²⁵ Chik inuphä hup, iwo tesa tä w'atshan honhat, wet wichi ihutwek hup tä tälhe chenhas,

²⁶ lew'enla lew'ole tson'atas yämthilek lhen haw'uya. Lewomla aläy kayla les wet lew'enla chinaj t'äj yämthilek lechäj honhates.

²⁷ Lew'enla t'os tä naya tä tälhe aläy kayla lhayis, yämthilek iche lhäk häp haw'et lheley, lhäy'e iyhäj tä achumyenhay.