Prov 26 - Biblia Wichi

¹ W'enha lhamej fwiy'et wet w'enha lhamej nahayofw, häte isit'a chik iwomchä chik õ'lanhi yachuyaj. Wet häp tä hätet iwoye täjtso, isit'a chik õ'wujyen häp hin'o tä ch'isuk.

² Afwenche tä weta wok lhup newahi, wey'älhi t'at. Wet n'olhämtes tä ni'isachehen mälhyet iwoye, chik newache m'ak chik tamenej, m'ak iwohiyet'a.

³ Yel'ataj lecha t'at n'otasnhat, wet asno häp tä õ'wo lhokheka, wet hin'o tä ch'isuk häp tä õ'päjejlhi hal'ä.

⁴ Yej lhäjlhahlä letichunhayaj häp hin'o tä m'ak nitälhaye, häpkhilek akniteya iwoye lham tä ch'isuk.

⁵ Mat amtej chulhej'atlä ämtes tä m'ak nitälhaye, häpkhilek näma lhame tä inu atape tä ihan m'akej.

⁶ Hin'o tä t'ekhaye elh tä ch'isuk wet ichenchufwi lhämet, hätet iwoyek yisthen lham takäläy, wet hätet iwoyek iyäyej t'at lefwitajayaj.

⁷ Hin'o tä ch'isuk, lhämet yikhit'a. Hätet iwoye tsufwlaj takäläy, yäpnhomche t'at.

⁸ Elh tä iwujyen hin'o tä ch'isuk, hätet iwoye hin'o chik yäytej tunte lefwonthi.

⁹ Hin'o tä ch'isuk ihanhiyejt'a n'olhämet tä n'ohanyaj. Hätet iwoye hin'o tä w'oknaj chik ch'uthan ihi takwey, iläthit'a.

¹⁰ Hin'o tä yen lakawoya hin'o tä ch'isuk wet itihi lew'et, hätet iwoye hin'o tä tiyäjejen lotek wichi tä ilunhen.

¹¹ Hin'o tä ch'isuk tä yachajopej m'ak tä ni'isa tä iwoye, hätet iwoye asinäj tä yachaj lhamho lech'uyhat.

¹² ¿Hä lew'en hin'o tä nhana m'akej tä fwetaj ihan m'akej? Iwoye t'at m'ak tä lham letichunhayaj. Mat häp hin'o tä ch'isuk, chik nitäfwelej m'ak tä ni'isa tä iwoye, elat ilehiyeja.

¹³ Hin'o tä n'etäjlhi yok: “¡Hay'äj tä ihi n'äyij! ¡Ow'enne tä nekche t'at hupuy kawayhi!”

¹⁴ Hupep'ot yafwthi ilunkatlhi t'at. Häp tä mälhyej'attso n'etäjayis tä nich'olelhi'pe lemäwet.

¹⁵ Hin'o tä n'etäjlhi tachuma n'olhäk tä ihi plato, mat tek ichuttej yämthilek y'uyhte lak'aj.

¹⁶ Hin'o tä n'etäjlhi yäm lhame tä lham t'at tä ihan m'akej, fwetaj inu'pe iyhäj tä is alhoho tä nichulho iyhäj.

¹⁷ Chik olhay'uytho iyhäj tä lhailätyenejwethä lhämtes, hätet iwoyek otsok lech'otey häp asinäj tä fwitsaj.

^18-19 Hin'o tä itiyej t'akanyaj häp elh, chik tajyäme m'ak tä iwoyeje elh, wet yok, “Okoyhyaj t'at”, hätet iwoye hin'o tä cha länek chik iwunhomche m'ayhay, wet tiyäjejen wichi n'och'ähal tä n'ot'ilek.

²⁰ Chik newache elh tä sitäwo, wichi tek tataywek. Hätet iwoye itäj, chik lehuk newache, y'om t'at.

²¹ Chik ot'uhläk nitutseya itäj, otchuma fwiyhol, wet chik ot'uhläk y'uho itäj, owo lehukwa. Wet mälhyej'attso hin'o tä äkleyhtsaj, häp tä iwo n'oka'tshayaja.

²² Elh tä sitäwo, lhämtes hätet iwoyek akäj, wet tiyäjo hin'o chik häpe pajtha atojchä.

²³ Chik hin'o t'uhläk isilataj towej tä iyhät, y'ilenejlhi pintura. Häp tä mälhyej'attso n'olhämtes tä ni'äytesachehen mat häpe t'at n'otkanyaj.

²⁴ Elh tä n'äyihomche iyhäj, tä yämlhi is t'at, mälhyej chik newache lefwitseyaj. Mat t'akanyaj ihi t'at letichunhayaj.

²⁵ Tej chik yäm is lhämtes tä yämlhi amho, yej matitche, tsi m'ak tä ni'isa tapoyej lehusek.

²⁶ Tej tä fwetaj iskat tä n'äyihomche iyhäj, n'änhila'pe m'ak tä ni'isa tä iwoye, wet nilhokhiyeja wichi chik hiw'enla.

²⁷ Elh chik yenlhi chowej, lhamlak nichäte. Wet elh chik ihuttshi tunte, lhamlak tunte nichätpe.

²⁸ Hin'o tä w'et yämlhi, n'äyiho elh wet ilänej lhämtes tä ni'isachehen. Wet hin'o tä ikänitchehen lhämtes, tamenej elh tä tach'ahuye.