Prov 24 - Biblia Wichi

¹ Yej t'äytene wichi tä ni'isa, wet yej lhen atichunhayajak lhewej lhamel.

² Tsi tajlhamat lefwitseyaj tä yen letichunhayaja, wet iwoyepej lhämtes tä ni'isachehen.

- 20 -

³ Hin'o tä lehusek ihi ihanej iwoyneje m'ak tä iwoye yämthilek lew'et lheley letamsekis ihi.

⁴ Wet nitäfwelej m'ayhay tä laha ihi tä wuj tä isis, wet häp tä itichufwi lewukwech'ol.

- 21 -

⁵ Hin'o tä ihan m'akej, häp tä laha ihi, inu'pe n'okhajyhayaj.

⁶ Tsi chik iche n'oka'tshayaj, chunkat wichi iwo huseya'pe m'ak tä is chik iwoye. Wet chik iche wujpey hin'ol tä lehusey ihi, iyhäj isej lhämtes tä isen wet ikalhi laka'tshayaj.

- 22 -

⁷ Chik wichi lhaihutwek yämthilek itetshan m'ayhay tä laha ihi, hin'o tä ch'isuk ihanhiyejt'a lhämet chik iwoye, yok tam, tsi ihanhit'a m'akej.

- 23 -

⁸ Hin'o tä yenwethä m'ak tä ni'isa, wichi yok, “Akantsaj.”

⁹ Wet m'ak tä t'uhläk iwoye häp hin'o tä ch'isuk, häpe t'at lech'isukyaj. Wet wichi wuj tä y'ulhan häp hin'o tä aläkwyhantsaj.

- 24 -

¹⁰ Chik iche lewhäy tä atha han'äyij wet lhok, “Okalhihit'a”, tälhe tä otle nit'una.

- 25 -

¹¹ Yej wahnej iyhäj tä ihäne t'ilek häp elh. Fwayhthen iyhäj tä eyte õ'länhihen.

¹² Tsi tejlak lhok, “Olhamel ohanhiyejt'a”, mat Hin'o tä itetshan wichi lehusey hiw'en tä isichet'a ämet, wet iwo lahayayej m'ak tä lewoye.

- 26 -

¹³ Yäs, tufw akäyek tsi wuj tä is. Chik nichätho hak'aj, wuj tä hak'onek.

¹⁴ Mälhhiyejattso ahanyaj lhäy'e atäfwnhayaj chik nichätho ahusek. Chik lelhokhiyela, aisila alhoho wet tek tatäyhla aniwhayaj.

- 27 -

¹⁵ Yej aletech'aynej hin'o tä kahap'altsentsaja tä ikanejlhi hup tä lewuk hin'o tä is yämthilek t'etane m'ak tä ichufwi.

¹⁶ Tsi tej chik hin'o tä is nichätpej katsi pajla'tha siete veces, mat neyhiphäla. Mat häp hin'ol tä kahap'altsentsesa, lhamel nichäthihola lewit'äyhyaj.

- 28 -

¹⁷ Yej a'käjlhi chik nichätpej katsi atayhfwa.

¹⁸ Tsi chik Lhawuk hiw'en m'ak tä lewoyaye, tek akäjiyejlhila, wet itihiyeja kanhi lewäk tä itiyej atayhfwa.

- 29 -

¹⁹ Yej län amej atichunhayaj chik lew'en wichi tä iwoye m'ak tä ni'isa, wok let'äytene lhamel.

²⁰ Tsi hin'o tä ni'isa ifwitla lakapes wet noj, tehlat iwoye n'ochäkw chik y'om.

- 30 -

²¹ Yäs, is chik lewujyen häp Lhawuk lhäy'e niyat. Yej amtej letatayhlä lhamel.

²² Tsi chik Lhawuk iwo lewäka, lhäy'e niyat, wet letayhfwas yofwajkwet nichätho lewit'äyhyaj.

Iyhäj ahantses lhämtes

²³ Häte tähesna ahantses lhämtes t'at: Isit'ak n'okalelhthayajwos iwo leyahneka.

²⁴ Elh chik tahuyej hin'o tä ni'isa wet yok, “Letes ihichet'a”, elh tä iwoyetso wichi iwoyeje lhämtes tä ni'isa wet yen w'et m'ayeka.

²⁵ Mat häp n'okalelhthayajwos tä itasin hin'o tä ni'isa, wichi yok, “Häp tä is.”

²⁶ Elh chik is alhoho lhämet chik nichulho m'ak chik õty'ätshaneje, matche tä iyhäj ihuminche lhämet.

²⁷ Äm wak'alhen achumtes wet enwethä achumtes tä ihi alafwek. Chik wak'alhen, nech'e häpkhilek lhenlhi awukwe.

²⁸ Yej kalelhät letes aelh chik nikalelhäja m'ak chik ni'isa tä iwoye, wet yej woyeje ämet tä kamatache.

²⁹ Yej lhok, “M'ak tä hin'otso iwoyej n'oye, häte olham owoynhiyejelatso m'ak chik owoyeje. Owohla lahaya m'ak tä iwoyej n'oye.”

³⁰ Onukwe lhip lelafwek häp hin'o tä n'etäjayis tä laj lehuseka.

³¹ Ow'en tä wuj hon'al tä yelaj tä tälho, lhäy'e nawaj, wet tuntey tä yen lelafweka wasi.

³² Tä ow'en, wuj tä oyen tichunhayaja. Wet ohanej m'ak tä tamenej, wet oyok,

³³ Tä lekän nahati wet letatsufwel amej yämthilek akäj tä lemä,

³⁴ hap'altseyaj ailänla wet nehläs nichätla atape, hätehlat iwoye etantsaj chik aipäjlhi.