Prov 23 - Biblia Wichi

¹ Chik letachufwiyej hin'o tä niyat, yej p'ethatlä tä lhewej häp hin'o tä len'ohyaj ihi.

² Tej chik wuj tä lechuyu, mat yej lhak'ale äk,

³ häp n'olhäk tä wuj tä isen lhäy'e tä akäj, tsi elat niyattso t'uhläk ikan amej.

- 7 -

⁴ Yej alekhajyen yämthilek ahäpe hin'o tä hiw'en m'ayek, wet yej lhen atichunhayaja.

⁵ Chik letetshan, lew'enla tä ihichet'a n'okäywet chik t'un. Yofwajkwet tatäy, tet iwoyek iwo lhafwisa wet yik, mälhyej iwoye iyhäjkottaj.

- 8 -

⁶ Yej tachufwiyej hin'o tä tsofwnaj, wet yej käne lhäk tä isen wet akäj.

⁷ Tsi letichunhayaj isit'a, tej chik yok, “Tufw”, wok yok, “Yäyej”, mat mathichet'a.

⁸ Letach'uyhiyejlhila m'ak tä letufw, wet lajit lahaya ämtes tä isen tä lewoyeje hin'otso.

- 9 -

⁹ Yej lätyeneje ämet häp hin'o tä ch'isuk, tsi iläkwihila ämtes tä matchehen.

- 10 -

¹⁰ Yej lanche tuntey tä pajche õ'tihi línea tä lepes n'oelh kahonhat, wet yej soyej lhip honhat tä lewuk chipenhas.

¹¹ Tsi Lhawuk häp tä tach'ote lhamel, wuj tä takhajay wet tatayhla ahilä.

- 11 -

¹² Ch'ahuye nilhokej m'ak tä õ'chufwen amej. Ti amej yämthilek wuj tä aisej.

- 12 -

¹³ Yej leyej tä lefwonepej äs, tsi y'inhit'ak letasin.

¹⁴ Chik lewoyeje täjtso, lefwayhthiyeja t'ilek, tsi nech'e isila m'ak tä iwoye.

- 13 -

¹⁵ Yäs, chik ahäpe hin'o tä lehusek ihi, matche tä okäjyaj ihla n'oyej,

¹⁶ wet otamsek ihi chik olät ame tä isen ämtes tä lhämlhi.

- 14 -

¹⁷ Yej tihi ahusek chik let'äytene häp iyhäj tä lech'isukyajay ihi. Mat wujyenpej häp Lhawuk,

¹⁸ häpkhilek ais alhoho wet tek tatäy amej aniwhayaj.

- 15 -

¹⁹ Yäs, ch'ahuye wet achufwenej, wet äm is m'ak tä lewoye.

²⁰ Yej alet'aje iyhäj tä ikän hat'es, wok häp iyhäj tä yäm wuj lhäk tä tufw.

²¹ Tsi w'oknhas wet yalhk'alis pajla'tha nahati tä ilän, wet tä lepese noj lakäywet wet taw'uyhi lew'uy tä wasi.

- 16 -

²² Ch'ahuye ajcha tä häpe elh tä letälho, wet yej lhen w'et m'ayeka ako chik nichäte ifwala tä hich'ut.

²³ Akhajyench'oye m'ak tä matche, lhäy'e n'ohanyaj, lhäy'e n'ochufwenyaj, lhäy'e tä ahusek ihi. Wet chik lekatej, yej wompe m'ak tä lewatlä.

²⁴ Mamse tä wuj tä is m'ak tä iwoye, lajcha matche tä akäjejlhi. Wet elh tä lhäs lehusek ihi, wuj tä lakäjyaj iyeji.

²⁵ Tä mälhyejtso, is chik ahäpe elh tä lajcha lhäy'e lako akäjejlhi tä ahäpe lhamel lhäs.

- 17 -

²⁶ Yäs, ch'ahu n'oye wet tetshan m'ak tä owoye.

²⁷ Tsi atsinha tä lakain'oyaj ihi hätet iwoye chowej tä pitoj chik hin'o nichäte. Wet atsinha chik katäfwelayej hätet iwoye chowej tä nitsajaho. Chik lechäte, lesakanhiyejt'a chik lech'oleye.

²⁸ Häp atsinha tä mälhyejtso hätet iwoye etantsaj chik ikanejlhi m'ak tä t'uhläk t'etane, wet tamenej wujpe hin'ol tä nemhit ihumnhen lech'efwas.

- 18 -

²⁹ ¿Atsi tä äytaj m'ak tä ilän wet t'änlhi? ¿Atsi tä õtäkleyejlhi, wet atsi tä õ'wo lelätseka tä niwoya m'ak chik tamenej? ¿Atsi tä tatey t'ukwahen?

³⁰ Häpe t'at hin'o tä nileyayej hat'es, häpe t'at elh tä t'ukwe hat'es tä nech'ayek.

³¹ ¡Yej yahin hat'es tä ichät tä ihi n'olhäthi tä akäj!

³² Tä lepese, hätet iwoye amlhäj chik ayokwaj, wuj tä äytaj.

³³ Iwohla haw'enhaya, wet lhämhiyela m'ak tä lajit lahaya.

³⁴ Hätehlat iwoyek lhehi lewomekitaj chowej, wok lhehi barco tä yafwthitaj tä äytaji ichäjlhi tä inät wuj tä iwo lhetheya.

³⁵ Wet lhohlak, “Õ'hichäjn'o, mat tek oläte. Õ'päjlhin'o, mat oläthiyet'a. Chik ow'ok noj n'o'pe, äp ot'uhikwelat lhip hat'es.”