Prov 22 - Biblia Wichi

¹ Chik wichi yäm n'oye tä ois, häp tä wuj tä laha ihi, inu'pe okäywet tä wuj.

² Hin'o tä hiw'en m'ayek, Lhawuk t'at tä yenlhi, hätet iwoye hin'o tä niw'ena m'ayek.

³ Elh tä hin'olhi ihanlä lewit'äyhyaj wet lhaiskat. Mat häp elh tä nihn'oyalhi tujlhache t'at m'ak tä iwoye, pajtha lewit'äyhyaj ihi.

⁴ Elh tä lhaknichäjalhi, wet ihumin Lhawuk wet iwoye lhämtes, lakaha häpe t'at lakäywet, lhäy'e len'ohyaj, lhäy'e lew'atshancheyaj.

⁵ Hin'o tä ni'isa, lewit'äyhyaj tälhe t'at m'ak tä iwoye. Mat häp hin'o tä t'amaj lhamej lhaitontehlä tähestso.

⁶ Chufwenej m'ak tä is häp han'äfwaj yämthilek iwoye, häpkhilek chik nichäte tä thaläkw, ilehiyejt'ala.

⁷ Wichi tä p'elitses, hin'ol tä hiw'en m'ayek lakawos t'at. Wet elh tä tacheyjänej elh kachinaj t'äj, hin'o tä iwo lecheyjänhata lakawo t'at.

⁸ Elh tä yenlhi m'ak tä ni'isa ikalhihila lewit'äyhyaj. Õ'tasnhila wet tatäy.

⁹ Elh tä hip'altsen iyhäj, Dios lakäpfwayaj ihiyeja, tsi hiw'enho lhäk iyhäj tä m'ak niw'ena.

¹⁰ Hin'o tä aläkwyhantsaj is chik lechen wet yik, häpkhilek noj n'olhäkleyhyaj, wet nemla iche iyhäj tä iyet lhamehen, wet ileyej tä lhailäkwethä.

¹¹ Niyat ihumin hin'o tä lehusek ihi lhäy'e tä lhämtes isen.

¹² Lhawuk t'uye hin'ol tä lehusey ihi, wet itäyhat akantses lhämtes tä iwoye.

¹³ Hin'o tä n'etäjlhi yok: “¡Hay'äj tä ilunlhi! ¡Op'itsek ihihilat n'äyij!”

¹⁴ Atsinha tä lakain'oyaj ihi, lak'aj hätet iwoye chowej tä pitoj. Wet hin'ol tä Lhawuk itiyej lewäk, lhamel nichäthiyela.

¹⁵ Mamses lakey tä tektshanwethä tälho t'at lhamel letichunhayaj. Mat is chik õ'tasin lhamel häpkhilek ileyej.

¹⁶ Hin'o tä t'uhläk hiw'en m'ayek, wet ilänej lechumet elh tä p'elitsaj, hiw'enhit'ala m'ayek. Wet elh tä iwo t'awayhata hin'o tä hiw'en m'ayek, lhamtej p'elitsajila, m'ak hiw'enhit'ala.

Ahantses lhämtes tä ihi treinta

¹⁷ Ch'ahuye lhämtes häp ahantses, wet tihi ahusek m'ak tä ochufwen amej.

¹⁸ Wuj tä is chik let'amajeji ahusek wet lhenpej ämeta.

¹⁹ Ohanhat amej ifwalana, häpkhilek letiyej ekhahyaj häp Lhawuk.

²⁰ Olesayen treinta olhämtes tä n'ohanyaj ihi yämthilek aisej.

²¹ Wet otäfwnhat amej m'ak tä matche, häpkhilek lehanej chik lechulho elh chik tay'ätshan ame.

- 1 -

²² Yej t'etane m'ak tä lewuk aelh tä p'elitsaj, tsi p'elitsaj t'at. Wet yej häne n'okalelhthayajwos häp elh tä newache m'ak chik isej.

²³ Tsi Lhawuk tach'othiyela, wet lhamlak itiyej lelhakli häp iyhäj tä ilhaklit elh tä p'elitsaj.

- 2 -

²⁴ Yej lhekche iyhäj tä fwitses wet awäkyhatses,

²⁵ tsi elat leten lhamel lakeyis wet letamen amej.

- 3 -

²⁶ Chik elh iwo laka pi'äya, yej alelhuhyenej.

²⁷ Tsi chik kaw'ena laha chik letiskanpe, õ'sohla amej amäwet.

- 4 -

²⁸ Yej t'ayhattshi tuntey tä achätilis pajche itihi p'ante línea tä lepes laka honhat.

- 5 -

²⁹ Elh tä yäm is lechumet tä iwoye, niyatey yenla lakawoya, wet häpkhit'a wichi tä w'et m'ayhay t'at chik lakawo.