Prov 21 - Biblia Wichi

¹ Niyat lehusek ihi t'at Lhawuk takwey. Hätet iwoye inät tä iläfwelche tä Lhawuk inuhatche lhip tä ihuminche.

² Hin'o tä yäme tä nilhokej m'ak tä lham iwoye is t'at. Mat Lhawuk lham t'at tä itetshan hin'o lehusek.

³ Woye m'ak tä is alhoho, tsi häp tä Lhawuk ihuminche. Inu'pe itshätäy tä õ'länhen tä õyen n'okhayajayej.

⁴ Wichi tä kahap'altsentsesa, lech'isukyaj häpe t'at tä lhaichäjwethä. Lhamel yok, “Ihichet'a elh chik w'awulh n'ohi.”

⁵ M'ak chik lhäy'e lhip tä otetshan, chik wak'alh, häp tä is. Mat häp iyhäj tä ikelitlhi m'ak tä iwoye, tä lepese niwohit m'ak chik iche.

⁶ Hin'o lakäywet tä ikalheji lhämtes tä kamatachehen, tet iwoye lefwak, t'unhit'a, nofwila.

⁷ Wichi tä kahap'altsentsesa, lhamel t'at tä lhailänhen tä niwoyaye m'ak tä is.

⁸ Hin'o tä ni'isa, m'ak tä iwoye hätet iwoye n'äyij tä hits'ulhakche. Mat häp hin'o tä lajit lakeya, lechumtes wuj tä isen.

⁹ Tej chik ow'et ni'saye, mat is t'at. Mat isit'ak oiyej atsinha tä äkleyhtsaj.

¹⁰ Hin'o tä ni'isa nichuyupejlä m'ak tä ni'isa yämthilek iwoye, wet hip'altsenhit'a elh.

¹¹ Chik õ'tasin hin'o tä aläkwyhantsaj, wet hin'o tä laj lehuseka nech'e lhaichufwenlak hiw'en. Wet chik õ'tasin hin'o tä lehusek ihi, lhäy'ehila lhip lehanyaj.

¹² Dios iyahin t'at lew'et häp hin'o tä kahap'altsentsaja, wet ichätyenpe lewit'äyhyaj häp lham.

¹³ Hin'o tä nitch'ahuyaye elh tä p'elitsaj tä lhaip'altsene, häte lham chik fwetajla t'alheje elh lech'otyaj, ihichet'ala m'ak chik ikalhi.

¹⁴ Chik õ'wo chalayejlhi hin'o wet õ'weskatshayne t'awayhat, noj t'at lewäk.

¹⁵ Hin'o tä is, lakäjyaj ihi t'at chik iwoye m'ak tä is alhoho. Mat häp wichi tä iwoye m'ak tä ni'isa, lewit'äyhyaj t'at.

¹⁶ Hin'o tä lehusek ihi, chik lewetahayaj iyej, tan'isiyeja wichi tä y'inhen.

¹⁷ Hin'o tä wuj tä ihumin tä iwo lakäjyaja, wet ikäne hat'es lhäy'e m'ayhay tä lenij akäjche, p'elitsajila, m'ak hiw'enhit'ala.

¹⁸ Wichi tä isen tek leteläythayaj ihiyeja. Tajlhamhiyela lhamel tä kahap'altsentsesa häpkhilek leteläythayaj iyej. Wet iyhäj tä iwoye m'ak tä is alhoho, tek leteläythayaj ihiyeja. Tajlhamhiyela wichi tä akantses häpkhilek leteläythayaj iyej.

¹⁹ Tej chik oihi honhat tä ts'anis, mat is t'at. Mat isit'ak oiyej atsinha tä fwitsaj wet äkleyhtsaj.

²⁰ Hin'o tä lehusek ihi hiw'en lakäywet tä wuj laha. Mat häp hin'o tä laj lehuseka ihämit nilhokej m'ak tä iyej.

²¹ Elh chik nileyayej m'ak tä is lhäy'e lep'altsenyaj, lew'atshancheyaj ihiyeja, lhäy'e le'isyaj, lhäy'e len'ohyaj.

²² Hin'o tä lehusek ihi, tej chik wuj tä õt'uye häp hupuy, mat inuye wet ikalhi t'at, isiyejt'a sip'äl tä wuj tä t'uye.

²³ Elh chik nowayhläk ni'isa alhoho lhämet chik iwoye, ihanhiyejt'a chik lelhakli iyeji m'ak chik häpe.

²⁴ Hin'o tä lhäy'e lhip tä tektshanlhi, wichi yok, “Aläkwyhantsaj, lhaichäjlhi, welkatlhi.”

²⁵ Hin'o tä n'etäjlhi lhailänej t'at tä iwatlä m'ayek, tsi tek t'uhläk tachumlhi.

²⁶ Ifwala imälhewek tä t'akänyaj itiyej m'ak chik häpe. Mat häp hin'o tä is tek n'äy m'akej.

²⁷ Lhawuk y'ulhan itshätäy tä wichi tä ni'isahen ilänhen wet yen t'awayhata. Wet chik lhamel iwo t'awayhata tä t'uhläk ikalheji m'ak tä iwatlä, nem koyhyaj tä y'ulhan.

²⁸ Hin'o tä kamatache tä fwetaj hiw'en m'ak tä yäme, tatäyhla. Mat häp hin'o tä tach'ahuye m'ak tä õyäme, häp tä nittäya, lhäy'e m'ak tä yenpej lhämeta.

²⁹ Hin'o tä kahap'altsentsaja lhayen at häpeya hin'o tä t'un. Mat häp hin'o tä is yäm is alhoho m'ak at chik häpek iwoye.

³⁰ Chik Lhawuk tatay ahilä, lajit lahaya ahanyaj, lhäy'e atäfwnhayaj, lhäy'e ämtes tä isen.

³¹ Hin'o iwaklhat lew'ute yel'ataj yämthilek iwo laka'tshayaja. Mat Lhawuk t'at tä tach'ote yämthilek ikalhi letayhfwa.