Prov 20 - Biblia Wichi

¹ Hat'es, chik hin'o iyäyej, nech'e aläkwyhantsaj t'at wet ifwitseyen, wet nehit katsik is m'ak tä iwoye chik w'oknaj.

² Niyat tä fwitsaj hätet iwoye hay'äj tä y'ip, wet elh chik ifwitseyen t'änej at lhame lewit'äyhyaj.

³ Wichi iwujyen hin'o tä nittayahlä iyhäj. Mat häp hin'o tä ch'isuk ikelit tä tatayhlä elh.

⁴ Tä nichäte lewhäy tä wichi tutcheyhen, n'etäjayis tutcheyhit'a. Wet tä nichäte lewhäy tä õ'lanhi yachuyaj, t'alhlhi t'at mat nehit katsik hiw'enho.

⁵ Hin'o lenech'ethayaj tä ihi lehusek hätet iwoye inät tä atojchä, mat elh tä lehusek ihi hin'älthila.

⁶ Ichehen hin'ol tä yäm lhamehen tä fwetaj isen, mat ihichet'a hin'o chik wichi t'ekhaye.

⁷ Hin'o tä is iwoye t'at m'ak tä is alhoho, wet lakäjyaj ihi leles tä nekche len'äyij.

⁸ Chik rey tatayhiphä n'okalelhthayaj lew'et, itetshan t'at wichi tä ihi tä tatache, wet ikalelhät m'ak tä ni'isa yämthilek noj.

⁹ Elh chik yok, “Olej ohusek, noj och'isukyaj”, mathichet'a lhämet.

¹⁰ N'okaw'awlhanthi tä akantsaj lhäy'e metro tä akantsaj, Lhawuk wuj tä y'ulhan.

¹¹ M'ayhay tä han'äfwaj iwoye, n'änhila chik is wok ni'isa.

¹² Lhawuk lham t'at tä yenlhi och'ote yämthilek olätche honhat, wet yenlhi ottelho yämthilek ow'enche honhat.

¹³ Yej humin tä lemä, häpkhilek niwohit m'ak chik tatäy amej wet lew'en äk tä naya.

¹⁴ Hin'o tä ichäj m'ayek yok, “Matche tä ni'isa täja.” Mat w'et iwoye t'attso, akäjejlhi t'at tä ichäj.

¹⁵ Hin'o tä ihan m'akej, lhämtes laha inu'pe oro lhäy'e m'ayhay tä wuj laha tä ihonhatena.

¹⁶ Elh chik lhailhuhyenej elh tä nitäfwelayej laka pi'ä, soyej lew'uy yämthilek yen lhäyeka letape.

¹⁷ Hin'o ihumin tä tufw m'ak tä ikalheji lefweynhayaj. Mat tä lak'aj tapoyejej, nech'e häpe t'at tunte les.

¹⁸ Chik iche m'ak tä let'uhläk lewoye, chunkat alhe elh chik iwo achoweja. Chik isen lhämtes, woye t'at. Chik lewo aka'tshayaja, a'äm hin'olhi, äm lehanej m'ak tä lewoye.

¹⁹ Elh tä sitäwo tek iskat m'ak chik häpe. Tä mälhyejtso, yej alet'aje elh tä lhämet nit'unahi.

²⁰ Elh chik takäpfwayeje lewit'äyhyaj lajcha wok lako, y'inhila tä ihi honataj tä tanhowatnhan.

²¹ N'okäywet tä hin'o ikalhi tä nitälhayejo lechumet, chik lepese Dios lakäpfwayaj ihiyejt'ala.

²² Yej lhok, “Owo hayahlä m'ak tä oelh iwoyej n'oye.” Mat tiyej achayaj häp Lhawuk, wet lhamlak tach'ot ame wet aifwayhtej.

²³ Isit'a n'okaw'awlhanthi tä akantsaj. Lhawuk wuj tä y'ulhan.

²⁴ Lhawuk lhäm t'at tä tach'anlhaye wok nitch'anlhayaye m'ak tä hin'o iwoye. Tä mälhyejtso, nehit katsik ts'ilak lhamej wet ihanhiyeja m'ak chik ihiyeja.

²⁵ Elh chik näma ayej kalelhäj letichunhayaj tä iwo t'awayhata Dios, wet chik tajyäme tä iwoye täjtso wet yok, “Okalhihit'a”, lewit'äyhyaj t'at.

²⁶ Niyat tä lehusek ihi yokwes wichi tä kahap'altsentsesa, wet y'äsayenpe kaletas.

²⁷ Lhawuk lechäkw häpe t'at hin'o lehusek, wet hiw'en m'ak tä ilech'oye hin'o.

²⁸ Niyat tä hap'altsentsaj wet nileyayej laka wichi, nofwit'ala leniyatyaj.

²⁹ Mamses len'ohyaj tälhe lakhajyhayaj, wet hin'ol tä lew'oley ipelajiche, wichi yenhit'a w'et m'ayeka.

³⁰ N'otasnhayaj tä äytaj, häp tä itäyhat m'ak tä ni'isa. Wet chik õ'päjlhi hin'o, häp tä nech'e is m'ak tä yen tichunhayaja lhamej.