Prov 2 - Biblia Wichi

M'ak tä elh isej tä tälho lehanyaj

¹ Yäs, a'en lewuka olhämtes wet en atichunhayaja.

² Ch'ahuye n'ohanyaj wet tihi ahusek yämthilek lewoye.

³ Mälhetwek ahusek tä let'alheje Dios yämthilek ayen häpeya elh tä lehusek ihi.

⁴ Amälhetwek tä let'ukwe tähestso, hätet iwoyek let'ukwe chinaj t'äj wok n'okäywet tä õ'iskat.

⁵ Chik lewoye täjtso, letäfwenhiyeja m'ak tä is chik lewoye yämthilek lehumin Lhawuk wet lewoye lhämtes, wet nech'e mathichelak letäfwelej Dios.

⁶ Tsi Lhawuk lham t'at tä hiw'enhomche wichi lehanyaj. M'ak tä häpe n'ohanyaj lhäy'e n'otäfwnhayaj tälhche lak'aj.

⁷ Lhawuk tach'ote wet t'uye lhamel tä is alhoho m'ak tä iwoye wet newache letes.

⁸ T'uyepej iyhäj tä inukwe len'äyij tä is alhoho, wet t'amajej iyhäj tä t'ifwtiyej lham.

⁹ Chik letach'ahuye olhämtes, lehanhiyeja m'ak tä is alhoho wet äp is, wet alewaklhat t'at yämthilek lewoye m'ak tä is.

¹⁰ Tsi n'ohanyaj tiyäjla amho wet ikäjyenhilhila ahusek.

¹¹ Chik lhen atichunhayaja wet ahanyaj ihi, häpkhilek t'amaj amej wet tek attäy.

¹² Ifwayhthila amej n'äyij tä ni'isa, lhäy'e hin'ol tä iwoye lhämtes tä t'akanyajay,

¹³ häp lhamel tä ileche n'äyij tä is, wet inukwe n'äyhäy tä honatsichehen,

¹⁴ wet yen käjyaja tä iwit'äyen iyhäj, wet ihumin m'ak tä ni'isa tä iwoye,

¹⁵ wet nistakej n'äyij tä is alhoho, wet inukwe n'äyhäy tä hits'ulhakchehen.

¹⁶ Wet n'ohanyaj ifwayhthila amej atsinha tä lech'efwa ihi tä ikänitlhi amej lhämtes tä akäschehen,

¹⁷ häp lham tä iwom t'unfwa tä ichun wet hip'ethatlä lhämet tä iwoye tä ihi tä Dios tatache.

¹⁸ Chik lenukwe n'äyij tä tiyäje lew'et, letataye t'at ilek, hap'itsekw'et t'at.

¹⁹ Wet hin'ol tä tiyäjchufwi lewukwe, tek lhamel inukwephä, wet nemla yachajok inuhikwela n'äyij tä tiyäje n'ow'atshancheyaj.

²⁰ Tä mälhyejtso, nukwe n'äyij tä is wet woye m'ak tä wichi tä isen iwoye.

²¹ Tsi lhamel tä is m'ak tä iwoye wet newache letes, tatäyhit'a tä ihi t'at honhat tä lew'et.

²² Mat häp lhamel tä iwoye m'ak tä ni'isa wet ileche Dios len'äyij, õ'tihiyeja kanhihlä honhat tä ihi.