Prov 15 - Biblia Wichi

¹ N'olhämet tä äytaj ikelitphä n'owäk, mat häp n'olhämet tä ni'äytaja y'omat n'owäk.

² Chik wichi iläte hin'o tä ahantsaj lhämet, lhamel wuj tä ihumin n'ohanyaj. Mat häp wichi tä laj lehuseya, lhämtes tä tälhche lak'aj laha ihihit'a.

³ Niwohit lhip chik Lhawuk newahi. Itetshan wichi tä isen lhäy'e iyhäj tä ni'isahen.

⁴ Iche n'olhämet tä mälhyej iwoye kacha, hätet iwoye hal'ä tä n'ow'atshancheyaj. Mat häp n'olhämet tä n'otkanyaj, häp tä iwit'äyen hin'o lehusek.

⁵ Hin'o tä laj lehuseka yen w'et m'ayeka lajcha fwonyaj. Mat häp hin'o tä tach'ahuye lajcha fwonyaj, häpkhila elh tä lehusek ihi.

⁶ Hin'o tä is wuj lakäywet. Mat häp hin'o tä kahap'altsentsaja, lefwitajayaj tälho t'at m'ak tä ikalhi.

⁷ Hin'ol tä ihanche m'akejen, tä yämwethä häpe t'at lehanyaj. Mat häp lhamel tä laj lehuseya, tek mälhyejtso m'ak tä iwoye.

⁸ Lhawuk y'ulhan m'ak tä wichi tä ni'isahen yen t'awayhata. Mat wuj tä akäjejlhi wichi tä isen t'alhyajay.

⁹ Lhawuk y'ulhan m'ak tä wichi tä kahap'altsentsesa iwoye. Mat ihumin elh chik iwoye m'ak tä is.

¹⁰ Elh tä ileyej m'ak tä is tä iwoye, tek iwatlä n'ofwonyaj. Wet häp elh tä y'ulhan n'ofwonyaj, y'inhila.

¹¹ Tä Lhawuk hiw'en n'ot'ilek lhäy'e honhat tä atojchä tä n'op'itseyhay lew'et, ¡wet wichi lehusey nem koyhyaj tä Lhawuk hiw'en m'ak tä ihi!

¹² Hin'o tä aläkwyhantsaj ihuminhit'a tä elh ifwone, wet lhay'ajiyet'a iyhäj tä ihan m'akejen.

¹³ Elh tä lehusek akäjlhi, n'äl t'at tate'pe tä akäjlhi. Mat häp elh tä lehusek äytaj, wuj tä lefwitajayaj ihi.

¹⁴ Elh tä lehusek ihi wuj tä iwatläk ihan m'akej. Mat häp iyhäj tä m'ak nitälhaye yen lehusek lhäka m'ak tä lajit lahaya.

¹⁵ Elh tä lelhakli iyej hiw'en tä nilhokej t'at ifwalas tä isit'a. Mat häp elh tä lehusek lakäjyaj ihi, lepes ihichet'a tä akäjlhi t'at.

¹⁶ Is t'at chik n'am w'en m'ayek mat ohumin Lhawuk wet owoye lhämtes. Tsi chik ow'en m'ayek mat tek otamsek ihi, isit'a.

¹⁷ Wuj tä is chik oiyej oiyhäj tä lehumnhayaj ihi, wet tej chik hal'ä lhay t'at chik otufw, mat is t'at. Tsi chik otufw itshäwet t'isan tä yätaj, mat oiyej wichi tä laj lehumnhayaja, isit'a.

¹⁸ Elh tä tektshanlhi tamenej iyhäj tä tataywek. Mat häp elh tä nitektshanaye m'ak chik iwoye, y'omat n'olhäkleyhyaj.

¹⁹ Hin'o tä katawo len'äyij, ch'uthanil tä iche, lakawayhi ihichet'a. Mat häp hin'o tä is, len'äyij tet iwoyek tsajche wet holohit'a.

²⁰ Mamse tä ihan m'akej ikänitlhi lajcha lhäy'e lako. Mat häp mamse tä laj lehuseka yen w'et m'ayeka lajcha lhäy'e lako.

²¹ Hin'o tä laj lehuseka ihumin t'at tä niwoya m'ak chik iwoye. Mat häp elh tä lehusek ihi hi'isyenpej alhoho m'ak tä iwoye.

²² Chik wichi nity'ätshanayej lhamehen m'ak tä t'uhläk iwoye, isit'a alhoho. Mat chik iche wujpe hin'ol tä lehusey ihi wet lhämtes isen, häpkhilek wichi isej.

²³ Wuj tä lakäjyaj ihi hin'o tä wichi ihuminche lhämet tä iläte tä nichulhlä lhamel.

²⁴ N'äyij tä n'ow'atshancheyaj tiyäj kaphä, wet hin'o tä lehusek ihi tä inukwe tek nichäthihola honhat tä atojchä tä n'op'itseyhay lew'et.

²⁵ Lhawuk iwasthi lew'et häp hin'o tä lhaichäjlhi, mat t'uye t'at tesa laka honhates.

²⁶ Lhawuk y'ulhan letichunhayaj häp hin'o tä ni'isa, mat ihumin lhämtes häp wichi tä laj lech'isukyaja.

²⁷ Elh tä t'akänyaj itiyej m'ak at chik häpe, lhäkleyhyaj ihi t'at lew'et. Mat häp elh tä nitchumahlä m'ak tä õ'käntejlhi, pitajla lew'atshancheyaj.

²⁸ Hin'o tä is nitichunejlhi lhämet chik is yämthilek nichulho iyhäj. Mat häp hin'o tä kahap'altsentsaja iwoye lhämtes tä ni'isachehen.

²⁹ Lhawuk atofwehlä häp wichi tä kahap'altsentsesa, mat tach'ahuye t'alhyajay häp wichi tä isen.

³⁰ Hin'o tä lakäjyaj i'pe tatey, ikhajyen elh. Wet elh tä ihanch'oye m'ayhay tä isen, takhajay.

³¹ Elh chik tach'ahuye n'ofwonyajay tä n'ow'atshancheyaj tälho, lew'et ihiyeja iyhäj tä ihan m'akejen.

³² Elh tä yen w'et m'ayeka n'ofwonyaj, lham t'at tä lhayen w'et m'ayeka. Mat häp elh tä tach'ahuye n'ofwonyaj, ikalhi lehanyaj.

³³ Chik ohumin Lhawuk wet owoye lhämtes, täjtso häp tä ichufwen n'oyej n'ohanyaj. Wet chik ot'uhläk in'oyej on'ohyaj, chunkat is chik olhay'ayhatchä.