Oseas 9 - Biblia Wichi

Dios ichenhiyela laka wichi häp honhat tä kalew'eta

¹ Yej akäswethä, Israel lhayis. Yej tiyäjlhaphä che ate iwoye wichi iyhäj, tsi lewoyay akeya tä lewomay aka Dios. Häp lewhäy tä lelanayhi achumtes, lekän lhoy, lehumin tä lekatej laha tä tälhe akeyis tä lewoye.

² Häp wichi tä Israel hiw'enhit'ala yachuyaj lhäy'e hat'es. Laka hat'es tä nech'ayek nofwila.

³ Lhamel yäpnhiyela Egipto, wet che ihihila Asiria, tufwila n'olhäk tä kok'ayehen. Nemla ihi laka honhat tä Lhawuk hiw'enho.

⁴ Nemla hiw'enho Lhawuk häp hat'es tä yen t'ewayhata wok itshäwet che ilän tä yen n'okhayajayej. Wet lhäk tä tuj Lhawuk tek akäjejlhi, elh at che tuj n'olhäktso kok'ahiyela. Lhamel tufwila t'at n'olhäktso, ihänhiyet'ala Lhawuk Lew'et.

⁵ ¿Atsihila m'ak che lhamel iwoye ifwala tä n'okäjyaj iche, che häpe n'okäjyaj tä tälhe Lhawuk?

⁶ Oyok, ihanhiyejt'ala iwoyneje che iwo lakäjyaja. Tsi tä lhamel ilethanlä letäyhyajay, tha Egipto lheley tachumlahlä wet tajänhichelahlä tä ihi honhat tä Menfis. Lakäywetes chayotas tä hip'ohla'pe, wet lew'etes ch'uthanilla che hip'okwe'pe.

Israel lhayis tatayhlä Dios laka silätwos

⁷ ¡Näm t'at ifwalas tä lewhäy tä n'otasnhayaj! ¡Näm t'at lewhäy tä ikathiyeja laha tä t'uhawetej! ¡Israel ihanej t'at tä taj lewhäy! Amel lhoyay, “¡Häp profeta lechowej ihihit'a! ¡Häp hin'o tä n'okäpfwayaj ihi tektshanlhi!” Tha m'ak tä tamenej tä amel lewoyayetso, häp tä tapo amejen m'ak tä ni'isa wet lhäy'e lhip tä len'äyiho Dios kasilätwos.

⁸ Dios itihi laka profeta häp Israel häpkhilek lhamel nitekm'ahatawethä, tha amel letihlä aka niyhäy len'äyhitaj. Tej che ihi laka Dios Lew'et, amel let'ulhan t'at.

⁹ Nemhit w'et iwoye amel awit'äyhyajay, tet iwoye täjp'ante ihi Gabaa. Mat Lhawuk yenla tichunhayaja m'ak tä ni'isa tä lewoyaye, wet yenla tesa amejen hach'isukyajay.

M'ak tä tälhejlä Israel lhayis lech'isukyaj

¹⁰ Lhawuk yok: “Täjte onlhoke Israel lhayis, okäjejlhi, tet iwoye tä hin'o nilhoke uvas che iche tayhi tä ts'anis. Amel achätilis ow'enejte tä tet iwoye higos tä lakonkay. Mat täjte lhamel ihoye Ba'al-peor, wet lhayachaje m'ak tä hich'atej tä ni'isa, lhayen w'et m'ayhaya, lhaitech'aynej t'at lecheyälis tä w'et yen lewuka.

¹¹ Israel lewujyaj yikhilach'oye, tehlat iwoye afwenche tä lhayämet. Nemla iche leles tä nech'ehen, äp nich'otshanhiyala, han'äfwaj ilehiyejena t'at.

¹² Mat tej che ichiyhelthen leles, osohiyeja, niwohit elh che omälhthihila. ¡Äytajichela m'ak tä iyej lhamel che oyikch'oye!

¹³ Ifwalas tä pajche ow'en tä tet iwoye hal'ä tä õ'tihchä tä ihi lhip tä isphä. Mat itonhiphäla leles wet yachajiyela n'olänyaj.”

¹⁴ ¡Iwuk, w'enho m'ak tä lew'enhihola! ¡W'enho lakahis tä niwoya lelesa! ¡W'enho t'aatey tä t'os nitälhaho!

Lhawuk itiyej lewäkw Israel

¹⁵ Lhawuk yok: “Nilhokej m'ak tä ni'isa tä iyej lhamel tälhe täjte ihi Gilgal, häp tä owo tesa tä oy'ulhan. Lechumyajay tä ni'isachehen häp tä tamenej tä ochenlach'oye oka honhat. Nemhit ohumnhila lhamel tsi laka niyatey fwitses.

¹⁶ Israel lhayis tamchäy t'at, tet iwoye hal'ä tä lefwettsil hiy'esen wet häpkhilek niwohiyat lhaya. Tejlat che iwo lelesa, mat olänhihena.”

¹⁷ Wichina tek tach'ahuye oka Dios. Häp tä tamenej tä oka Dios y'ulhanhila, lhamel niwethiyetpe honhat elh che häpe.