Oseas 8 - Biblia Wichi

Lhawuk itiyej letes Israel, häp lecheyälis tä tamenej

¹ Lhawuk yok, “Afwutche afwol, atet iwoye elh tä iwo siläta wichi tä lewit'äyhyaj ihichela. Tsi lhamel iwohiyet'a olhämtes wet nitch'ahuyaye ochufwenyaj.

² Lhamel t'än n'o'pe wet yok, Ontäfwel amej tä ahäpe Israel lhayis laka Dios.

³ “Tha Israel y'ulhan m'ak tä is alhoho, häp tä tamenej tä letayhfwas takähännhiyeja.

⁴ Tä lhamel iwo laka niyateya, lhamel t'at tä lewoynejek, olham olhämethiyejt'a. Wet tachuma plata lhäy'e oro wet yenejlhi takwey lhenek tä t'ekhaye, wet äp lhaihämthen t'at.

⁵ ¡Oy'ulhan w'asetaj peyak tä amel tä Samaria lheley len'okwiyayej! Onchuwet amehenpe m'ak tä lewoyaye. ¿Chihlatek ahäpe wichi tä nem kok'ayehen?

⁶ ¡Israel lhayis, häp w'asetaj peyak tä ihi Samaria khit'a Dios! Tälhet hin'o tä takwey lhenek, mat wasihila.

⁷ “Israel lhayis itihchä leyalh lhayis, wet tä wak'alh häpkhilek m'ak tä äytajche. Niwohit m'ak che isej lakäs, tsi y'ohihent'a. Wet tejlak wak'alh, tha honhat elh lheley äp lhamenla t'at che tuj.

⁸ Israel lhayis tet iwoye n'olhäk tä õtuj, noj t'at. Wichi iyhäj itech'aynej m'ak tä lajit lahaya.

⁹ Tsi häp tä lhamel ihoye Asiria, tet iwoye asno tä nhana honhatej tä ifwi'petso. Lhamel tiskanpe wichi iyhäj lech'otyaj, tet iwoye hin'o tä iwo t'ewayhtesa atsinhay tä lehumnhay.

¹⁰ Tha tej che iwopej t'ewayhata wichi iyhäj, ch'ääj äp ohutlawek lhamel häpkhilek otasnhen. Wet lhamel iteläythiyeja ayej m'ak tä äytajche tä Asirio lhayis kaniyat tä lewujyaj ihi iwohiyejela.

¹¹ “Israel lhayis yäm nitäkw n'otw'ayhtesw'etes tä yenwethä häpkhilek Dios itäyhthen lech'isukyajay. ¡Mat yen at lech'isukyajw'etesa!

¹² Tej tä olesayen wujpe ochufwenyaj, lhamel yene t'at m'ak tä w'enha lhamej.

¹³ Lhamel ihumin tä yen otw'ayhata itshäwet tä ilän, wet äp tuj t'at. Mat olham ohuminhit'a, tsi tek okäjejlhi lhamel. Ontichunhichela m'ak tä lhamel iwoye tä ni'isachehen, wet oyenla tesa lech'isukyajay tä oyachajiyela Egipto.

¹⁴ Israel yenchelhi lewukwey tä isis tä häpe leniyatyajw'etes, mat hip'ethetlä Elh tä lhenek. Judá lhayis yenchelhi wujpe honhates tä yen lelafweka tuntey. Tha owunhihomchela lhamel lhäy'e Israel kahupuy, häpkhilek nofwen.”