Oseas 7 - Biblia Wichi

¹ “Che owatläk ochesat oka wichi Israel wet owo elha len'äyij, nech'e n'äl lhamel lech'isukyajay lhäy'e m'ak tä ni'isa tä iwoye. Tsi iwo lefwech'enhayaja, wet tiyäjchufwi wichi lew'etes wet t'etane lakhäy, wet inuye wichi tä i'alhoye wet isoyej m'ak tä iyej.

² Lhamel nitäfwelayej tä ohanej t'at nilhokej m'ak tä ni'isa tä iwoye. Ilafwlhi lhamejen lakeyis tä ni'isachehen tä nilhokej ifwalas tä ow'en t'at.”

Wichi yetneje lelänyaj laka niyatey

³ Lhawuk yok: “Wichi ikäntejwethä laka niyatey häp lhämtes lhäy'e m'ak tä iwoye. Mat t'akanyaj t'at, tsi tek matchehen lhämtes.

⁴ Nilhokej lhamel iwo keyayejen iyhäj tä fwetaj yen kaniyata. Lefwitseyaj tet iwoye n'onhonthi tä lewo ilhänche wet ileyej, wet ilhethi harina pajtha tawojoyhi. Tek iwatläk itetshan tsi lak'e t'at.

⁵ Häp ifwala tä niyat iwo lakäjyaja tä taje ifwalahte tiyäjo leniyatyaj, lech'otfwas iyäynej hat'es pajtha w'oknaj, wet lham lhaip'ajtej wichi tä aläkwyhantses.

⁶ Lechowhal tet iwoye n'onhonthi tä õknit'uyaye. Tä honatsi lewo imä t'at, mat lak'e t'at pajtha ifwalayej tä y'oho.

⁷ Nilhokej lhamel tet iwoye n'onhonthi tä y'oho, wet hip'ohen laka niyatey pajtha nofwen t'at, wet neyachet elh che iwo olheya.

Israel häpe wichi tä ileyej p'ante Lewuk Dios

⁸ “Israel lhayis lhailhahtej iyhäj tä kahäpeya lhamel. Lhamel tet iwoye woyo tä lhip elh n'oya.

⁹ Wichi tä w'enha lhamej ihämit Israel lakhajyhayaj, wet lhamel nitäfwelayej. Tej tä lew'oley ipelajchehen, tha äp nitäfwelayej.

¹⁰ Tä lhamel lhaichäjwethä, wet häp tä hin'älit tä letes ihi. Tej tä tetso thayej, lhamel tapinhit'a n'oye wet nit'uya n'okwe tä ohäpe Lewuk Dios.

¹¹ Lhamel tet iwoye hokwinaj tä nhana honhatej wet laj lechoweja. Ichunkat Egipto tä w'et t'alheje lech'otyaj, wet äp w'et ihoye Asiria.

¹² Tha che tiyäjla kanhi, otihlahlä oka hotanaj, otälhthiphäla tehlat iwoye afwenche tä tälh puleye. Che oläte lhamel tä hap'akwekhen, wet osakanhiyeja.

¹³ “¡Lewit'äyhyaj tälhiyela tä lhamel ile n'oyej! Letäyhyaj ichätyenla'pe lhamel tsi hin'älit tä tatay n'ohlä. Owatläk ofwayhthen, mat lhamel tatayej n'ohlä lhämtes tä kamatachehen.

¹⁴ Tej tä t'än n'och'oye tä i'pe lemäwet, mat nitälhaho lechowej. Che t'alhch'oye trigo lhäy'e hat'es, lhamel lhaisajwethä, tä hin'älit tä tatay n'ohlä.

¹⁵ Ochufwenhen naji wet okhajyenhen naji lethilis. Mat lhamel yetne m'ak tä ni'isa tä itayhat n'ohlä.

¹⁶ Lhamel yäplej tä t'ekhaye takwey lhenhay tä w'et m'ayhay t'at. Lhamel tet iwoye lutsej tä tats'ufwiho tä lotek niwetaye m'ak tä õtiyäjej. Tsi lhämtes isichehent'a, laka niyatey nofwiyeja, wet häpkhilek Egipto lheley itihiyeja leläkwyhanyaj.”