Oseas 6 - Biblia Wichi

¹ “Lhamel yohlakwe, Ache mäh n'äple Lhawuk. Lham tä n'aiwasthiche, mat n'aichesthihena. Iwo lhalätshaya, mat iwohla lechaya.

² Che pajfwaj inachajila n'amehen lhaw'atshancheyaj, wet n'aineyhthiphäla häpkhilek y'ehi tä tatache wet y'aläyhiche.

³ N'alhaikhajyench'oyek y'antäfwelej Lhawuk. Lhawuk nämla n'amehen tehlat iwoye ifwala, wet äp tehlat iwoye pelhay tä ipumyenpe honhat tä chelhchup lhäy'e tä ispeyak.”

Lhawuk nichulho wichi

⁴ Lhawuk yok: “¿Atsi m'ak tä owoyej amehen, Israel? ¿Atsi m'ak tä owoyej amehen, Judá? Häp amel ahumnhayaj tä leti n'oyej tet iwoye tutsetaj tä nech'e fwamlafwaj tä i'pe honhat. Äp tet iwoye iyas tä ifwalahlä, wet äp n'älpe honhat tha äp noj t'at.

⁵ Häp tä tamenej tä ochen amehen profetas, häpkhilek ailänejen olhämtes tä äyteschehen wet y'ithatlhi amejen ates. Tsi okalelhthayaj tehlat iwoye lep tä i'pe honhat, lhäy'ehila lhip tä n'äl.

⁶ M'ak tä owatlä häpe t'at che lehuminayn'o, lhäy'e tä letäfwelay n'oyej tä ohäpe aka Dios. Tek owatlä otw'ayhtes lhäy'e itshätäy tä lelänhen tä lhen han'okhayaja n'oyej.

⁷ “Mat oka wichi iten Adán lech'isukyajte. Lhamel iwohiyet'a olhämtes wet tek lhay'amkat n'oyej.

⁸ Galaad häpe hupuy tä m'ak tä ni'isa lewos, nilhok tä w'oyis iläfwelchehen tä ihi.

⁹ Sacerdotes nichätejlä anikoyis tä hiw'enlä elhpej tä inukwe n'äyij. Lhäy'e lhip tä ni'isa m'ak tä lhamel iwoye, y'aje tä ilänhen wichi tä ihi n'äyij tä tataye Sikem.

¹⁰ Ihi Israel m'ak tä ow'en tä hich'atej tä ni'isache: Oka wichi iwot lakeya wet lhaikänchi.

¹¹ Wet amel tä Judá lhayis, wak'alh tä owo lewhäya tä oti amejen otasnhayaj.