Oseas 5 - Biblia Wichi

Israel lhaikänchi

¹ “¡Sacerdotes, lhek ch'ahuyaye olhämetna! ¡Lhäy'e Israel lhayis, lhäy'e n'oniyatyaj wuhuy, is che letach'ahuwethä tsi amel ates ihiche! Tä lehoyaye Mispa lhäy'e tachenaj tä Tabor tä len'okwiyayej acheyälis, wet tet iwoyek lhähäyayhi niyäkw, tet iwoyek lheyayhiche hotanajch'oye.

² Wet tä lehoyaye Sitim, tet iwoyek lhenlhi amhohen chowej tä pitoj. Häp tä tamenej tä otihla amejen otasnhayaj.

³ Ontäfwelej Israel wet y'aje m'ak tä lhamel iwoyepej. Iwo keyayej iyhäj tä ka'olhama wet lhaikänchi.”

⁴ Tä lhamel iwoye m'ak tä ni'isa, ikalhihit'ak tapile laka Dios. Tsi lhamel tet iwoye atsinha tä kain'oya, wet häp tä tamenej tä nitäfwelayej Lewuk Dios.

⁵ Tä lhamel lhaichäjwethä, wet häp tä hin'älit tä letes ihi. Tä lhamel iwoye m'ak tä ni'isa, tet iwoyek tanhäphänwethä, wet Judá lhayis tan'iswekej lech'isukyajay.

⁶ Lhamel fwetajlat t'ukwe Lewuk Dios, ichäjla leläy tson'atas lhäy'e w'asetas yämthilek ilänhen wet hiw'enho tä yen n'okhayajayej. Mat nilhokhiyet'ala tsi pajche lhaitontehlä lhamel.

⁷ Nemhit lhay'amkatej Lewuk Dios, tsi leles w'enha lhamej lajcha. Wet häp tä che iwel'a nech'e n'äle, laka honhates nofwila t'at.

Israel lhäy'e Judá tataywek

⁸ ¡Afwutache tson'ataj ch'u tä n'oka'tshayajcha tä ihi Gabaa! ¡Is che pitsaje tä tumho Ramá! ¡Yej ch'amkatej N'omukwehyajw'et, häpkhilek Benjamín lhayis nich'amajayej!

⁹ Olham ofwenho wichi tä Israel häp m'ak tä ihiyeja lhamel. Tsi kalelhäj t'at, äytajichela che nichäte ifwala tä õ'tihiyeja n'otasnhayaj.

¹⁰ Lhawuk yok: “Häp wichi tä Judá lhayis lewuhuy tet iwoye hin'ol tä y'ayhattshi tuntey tä pajche õ'tihi línea tä lepes laka honhat. ¡Tha op'ohiyeja'pe owäkw lhamel, tehlat iwoye tewok tä t'ulhpe honhat!

¹¹ Israel nemhit ihanej iwoyehen, tsi n'okalelhthayaj t'äsche'pe lhamel, häp tä lhamel lhayachaje dios lhayis tä kamatachehen.

¹² Häp tä olhaitech'aynhiyeja mohot tä tuj Israel wet oyets'äjlawethä wichi tä Judá lhayis.

¹³ “Che Israel lhaiw'en tä t'inhayaj ihi wet Judá hiw'enla lelätshay, Israel ihohiyela Asiria häpkhilek t'alheje lech'otyaj häp niyat tä lewujyaj ihi. Tha tejlak tetso thayej, ihanhiyejt'ala iwoyneje che ichestejen t'inhayaj wok ichestejen lelätshay.

¹⁴ Tet iwoye t'owalhaj tä inuye m'ak, tehlattso che onuye Israel lhäy'e Judá. Olhamlak owo lhipeya, che oleyej, wet ochäjitshila wet niwohit täjche isohla n'oyej.

¹⁵ “Oyäpnhiyelat lhip tä oyen w'eta, pajla'tha lhamel nitäfwenhiyeja lech'isukyajay tä iwoye wet t'uhla n'okwe. Tsi che lelhakli ihi, wet t'uhla n'okwe.”