Oseas 4 - Biblia Wichi

Lhawuk ihunut m'ak tä iyej Israel lhayis

¹ Israel lhayis, lhek ch'ahuyaye Lhawuk lhämet tä yok: “Ohunut m'ak tä i'amejen, amel tä lheyayhi honhatna. Tsi ihichet'a m'ak tä is alhoho tä i'amejen, wet ihichet'a n'op'altsenyaj, wet äp katäfwela n'oyej tä ohäpe aka Dios.

² Amel let'isejpej lhip akalelhthayaj tä kamatache, lhäy'e tä w'et lhäm'atwethä. Äp a'anikoyis wet äp a'etantses, letäkwyen awuhuy, aneytsehyaj ihihit'a, wet äp lekänlhache akaläncheyyaj.

³ Wet häp tä honhat tesache wichi tä y'inhen. Tan'isej t'at itshätäy lhäy'e afwenchey, lhäy'e w'ahat tä y'inhen tä ihi inät.”

Lhawuk yen tesayej sacerdotes

⁴ Lhawuk yok: “Isit'a che iche elh che itiyej letes elh wok ifwone elh. Tsi amel tä ahäpehen sacerdotes, häp tä oti amejen ates.

⁵ Amel lhäy'e profetas lechäthichela katsi ifwala wok honajche, wet olham otäyhthila Israel tä ako.

⁶ Oka wichi nitäfwenhit'a n'oyej, häp tä tamenej tä noj t'at. Wet tä amel tä ahäpehen sacerdotes te letäfwenhit'a n'oyej, olehat amejen tä letach'ote ochumet. Wet tä amel nemhit letetshan ochufwenyaj tä ohäpe aka Dios, häp tä tehla olham nemla otetshan ales, pajla'tha nichäte lepes lheley.

⁷ “Tä lhäy'epej iyhäj sacerdotes, lhäy'epej lhip lech'isukyaj tä tatayej n'ohlä. Wet häp tä osohiyeja len'ohyajay tä iti lhamejen, häpkhilek on'äfwlhatwethä lhamel.

⁸ Lhamel iwo kotsayej oka wichi lech'isukyajay, wet häp tä hich'atlhayeje lhamel tä iwo lech'isukyajaya.

⁹ Otan'isthiyeja wichi häp sacerdotes. Oyenla letesa lakeyis tä iwoye, wet äp owohla lahaya lechumyaj tä ni'isa.

Israel lhayis lakeyis tä hich'atej tä ni'isa

¹⁰ “Lhamel t'ekhihena mat kamaj nichuyuhihena. Iwohla lakain'oyajaya mat lajit lelesa. Tsi lhamel ile n'oyej tä ohäpe Lewuk Dios wet lhayachaje lecheyälis.

¹¹ Hat'es itäyhat n'olechowej.

¹² Oka wichi tay'ätshene lecheyä tä hal'ä wet nichulhejot lep'eltshayaj. Tsi lhamel tet iwoye atsinha tä kain'oya, lakeyis tä iwoye inuhatchetshi lhamel, wet häp tä ile n'oyej tä ohäpe laka Dios.

¹³ Ihoye len'okhayajw'etes tä i'pe tachenhas yämthilek iwo t'ewayhtesa lecheyälis wet iwunho incienso tä ichufwi hal'äy lehupelis. Häp tä tamenej tä ales tsinhay iwo lakain'oyaja, wet äp atichey nits'ilkata elh tä iyej.

¹⁴ Oyenhit'a letesa ales tsinhay tä iwo lakain'oyaja, lhäy'e atichey tä nits'ilkata elh tä iyej. Tsi lhamel ihänlhi lakeyis hin'ol tä iwoye m'ak tä hich'atej tä ni'isa tä lhaip'ajtej atsinhay tä ihi n'on'okhayajw'etes tä yen chumyaja lakain'oyaj. Tä hin'ol iwoynejetso, wet fwetaj ikäjyenejlhi laka dios lhayis tä w'enha lhamej, wet y'isej tä iwo t'ewayhtesa. Mälhyej'attso tä wichi tä laj lechowhala nichätho lewit'äyhyaj.

¹⁵ “Tej tä amel tä Israel lhayis alekänchiyayej acheyälis, is che Judá lhayis niteya lewoye. Yej tiyäjo Gilgal, wet yej taw'ulhiphä N'omukwehyajw'et. Wet yej wo olheya Dios tä n'ilataj tä lewoye ämet che häpe.

¹⁶ Tsi Israel tet iwoye w'asetaj tä nitch'ahuyaye lewuk. Nemhit ohanej owoyneje che otihi honhat tä lhäk ihi che te iwoye tson'atas che ifwihen.

¹⁷ Lhamel lhayachaje lecheyälis tä w'et t'ekhayehen. ¡Tej t'atni!

¹⁸ Lew'okw tä iwit'äyen wet äp yachajlhaho lakain'oyaj. Laka hin'ol ihumin m'ak tä iwo len'äfwlhiya.

¹⁹ Leyalhtaj ichäjla lhamel, wet t'ewayhtes hin'äfwlhatlawethä.