Oseas 14 - Biblia Wichi

Oseas lhaip'altsene Israel lhayis che tapile Lhawuk

¹ Israel lhayis, tapilayej Awuk Dios, amel tä hach'isukyajay tamen amejen tä awit'äyhyaj ihi.

² Tapilayeje Lhawuk häp alhyaj, oyaykwe: “Täyhat n'oyejen nilhokej m'ak tä ni'isachehen. Chumlä olhämtes häpkhilek oyachaj ame on'okhayajay.

³ Asiria nifwayhata olhamel, wet ot'ekhahiyet'a yel'atas tä n'oka'tshayajchal. Nemla oyen häpeya oka dios lhayis häp m'ayhay tä olhamel olhenek. Tsi ats'ilak t'at tä oalewuk wet lep'altsenhen wichi tä laj lech'otyaja.”

Lhawuk ifwenho lakäpfwayajay tä isen häp Israel

⁴ Lhawuk yok: “Ochesthiyeja lefwitseyaj, otihiyeja ohumnhayaj, tej tä kalhamelak letichunhayaj, tsi otiyej kanhihlä owäkw.

⁵ Olhayenla iyasa'pe Israel, wet lhamel tehlat iwoye hal'ä w'atshan tä tawoy, wet lefwettsil t'unhihichela, tehlat iwoye Líbano katayhi.

⁶ Lhachal lhaich'enhihila, lesilatyaj tehlat iwoye olivos wet lenij tehlat iwoye pänhichetek tä ihi Líbano.

⁷ Israel yachajihola tä õt'uyehen. Tehlat iwoye yachuyaj tä lhaichiyhelit, tawoyhila tehlat iwoye uva lhiley, wet letoyaj ihihila, tehlat iwoye hat'es tä tälhe Líbano.

⁸ Lhamel nemla lhay'aje n'ocheyälis. Olham t'at tä otetshan oka wichi wet ot'uyehen. Olham otet iwoye hal'ä tä w'atshan, wet oka wichi itälhthila n'oye lakäpfwayaj.”

Oseas lhämet tä lepes

⁹ Is che wichi tä ihan honhatejen lhäy'e iyhäj tä lehusey ihi ihanej osilätyajna: Lhawuk len'äyij häp tä is alhoho, wet häp tä wichi tä isen inukwe t'at, mat wichi tä ni'isahen tanhäphänwethä.