Oseas 13 - Biblia Wichi

Israel lewit'äyhyaj ihihila

¹ Täjp'ante wichi tä tälhe letes Efraín tahuyhenpej, iyhäj Israel lhayis lenowayhyaj ihi wet neytseyej lhämtes. Mat Efraín lhayis lewit'äyhyaj ihi, nemhit len'ohyaj ihi, häp len'okhayaj tä itiyej Ba'al tä tamenej.

² Wet kamaj tujlhache lech'isukyajay. Yenejchelhi lecheyälis häp chinhas, tach'anlhaye tä hin'ol tä yenchelhi, m'akpej at che itech'aynej wet äp ihumin t'at. Wet äp ne'tek õyachaje n'otw'ayhtes, wet äp y'isej tä ne'tek õttsufwelejlhi n'olhenek tä õ'tech'aynej w'asetaj.

³ Häp tä tamenej tä wichitso tehlat iwoye tutsetaj, wet iyas tä ifwala hip'e'pe, wet hup w'oley tä leyalh ichäjphä, wet tutsaj tä tälhche len'äyij.

⁴ Lhawuk yok: “Olham tä ohäpe Awuk Dios tälhe täjte lheyayhi Egipto. Letäfwenhiyejt'a elh dios tä w'enha lhamej, tajlhame olham tä ohäpe Afwayhthi.

⁵ Ot'uhte amehen tä lheyayhi honhat tä ts'anis.

⁶ Mat tä lew'enay tä äk naya wet wuj m'ak tä aisej, wet häp tä lep'ethet at n'ohlä wet alechäjwethä.

⁷ Häp tä tamenej tä owohla t'owalhaja amejen, olhaitech'aynhiyeja itshäwet tä fwitsaj tä iniwhi han'äyij.

⁸ Otehlat iwoye sulaj tä iwat leles. Che olhaichutyenla amejen, owohla lhipeya asanis. Otehlat iwoye t'owalhaj, ohämthichehena iley. Otehlat iwoye n'okotses tä nichutej elh at che häpe.

⁹ Oaitäyhthila, Israel lhayis, wet niwohit täjche tach'otla amehen.

¹⁰ ¿Chi tä ihi aka rey che aifwayhthen tä alep'altsenehte tä lhoyaykwe, W'en n'ohohen rey, lhäy'e leniyatfwas?

¹¹ Ochuwthayajte tä ow'en amhohen rey, wet äp ochuwthayajte tä oso amejen.

¹² “Israel olesayen t'at lech'isukyaj, ihi t'at lehi.

¹³ Lhamel tet iwoye han'äfwaj tä ihi lako kachowej, tha amukwe t'at, kamaj tajihot'a lew'et tä wak'alh che nichätlahchä.

¹⁴ Isit'ak ofwayhtej n'ot'olis. Isit'ak on'äyejo t'ilek. ¡Am tä ahäpe n'ot'ilek, chäj alhoho n'owit'äyhyaj! ¡Am tä ahäpe n'ot'olis, chäj alhoho n'otäyhyaj! Tsi nemla op'altsen wichina.”

¹⁵ Tejlat che Israel lhainech'aynhi, tha Lhawuk ichenhiyela leyalh tä tälhche tä ifwala tälhche, wet yafwuthiphäla t'at. Leyalh tä tälhe ts'anis äytajihila che yafwutphä, itshäjyenla, y'imhichela n'opekkay lhäy'e inät lesas tä i'pe honhat, tafwomhiyejawethä m'ak tä n'ot'amajchetes.

¹⁶ Samaria lheley letes ihi tsi hin'älit tä tatayhlä Lewuk Dios. Õ'länhihena lhamel tä ihi n'oka'tshayaj, wet leles õ'thathihichela honhat, wet laka atsinhay tä hich'otshanhen hikw'esichehena.