Oseas 12 - Biblia Wichi

¹ Israel lhayis nilhokej m'ak tä iwoye lajit lahaya, tsi iläyejen at leyalh. Y'ayhatlhatshi t'at lhämtes tä kamatachehen lhäy'e lech'atkanyajay. Iwoyeje Asiria niyatyaj häp lhämtes tä ischehen yämthilek lhayen puhfwasa, wet ichene t'ewayhtes tä aceite häp Egipto.”

² Lhawuk itiyej letes Judá lhayis wet itasnhila Israel. Yenla letesa lakeyis tä iwoye, wet äp iwohla lahaya lechumyaj tä ni'isa.

³ Tä kamaj nichätahchä, letes Jacob pajchet wak'alh t'akanyaj tä iwohiyejela lechila. Tä thaläkw p'ante wet äp täkleyejlhi Dios,

⁴ täkleyejlhi ángel tä häpe Dios wet ikalhi. Wet lhafwyhayaj ihi tä iwo chalayejlhi. Wet täjp'ante ihi Betel, wet Dios ihoye t'at wet Jacob yämhoplhi.

⁵ ¡Matche, Lhawuk Dios tä laj letumfwaya, häp tä lhey t'at!

⁶ Tä mälhyejtso, Israel lhayis, amel tä ahäpehen Jacob leles tä lepes lheley, humin Awuk Dios, ekhaye t'at häp lham, wet woyaye m'ak tä is alhoho.

⁷ Lhawuk yok: “Israel lhayis iten Canaán lhayis lakeyis. Lakaw'awlhanhatchal häpkhit'a m'ak tä matche, tsi ihumin tä iwo t'akanyaja.

⁸ Lhamel yok, Matche tä wuj m'ak tä in'oyejen, wuj okäywet tä ohut lhamejen. Niwohit täjche ihanej iwoyneje che tahuy n'oyej tä yok, Chinaj t'äj tä i'amej häpkhit'a achumet laha.

⁹ “Olham tä ohäpe Awuk Dios tälhe täjte lheyayhi Egipto, yachajiholak oyen awukweya wesas lhipey, tehlat iwoye täjte oho amehen tä lheyayhi honhat tä ts'anis.

¹⁰ Otahuyejte profetas wet oy'isejte lhip lew'enhay, wet äp otälhte lhamel olhämtes tä otech'aynej m'ayhay tä ochufwenej wichi.

¹¹ Ihi Galaad dios lhayis tä laj lahaya, dios lhayis tä kamatachehen. Ihi Gilgal tä wichi yen n'okhayajayej w'asetas tä ilänhen. Mat t'ewayhtesw'etes tet iwoye tuntey tä õ'iskonhen tä iwhäye yachuyajw'etes.”

¹² Jacob ilethane p'ante honhat tä Aram. Tä ihi t'uyehen tson'atas häpkhilek nilhoke atsinha tä lech'efwa.

¹³ Profeta t'at tä Lhawuk ne'tek itonphä Israel lhayis tä ihi p'ante Egipto, wet äp profeta t'at tä t'uye p'ante lhamel.

¹⁴ Israel lhayis iwäkwyhayen Lhawuk, häp tä tamenej tä Lhawuk lewäkw ihi. Häp tä tamenej tä Lhawuk yachajiyela n'olänyajay, wet iwohla lahayayej leläkwyhanyajay tä itiyej.