Oseas 11 - Biblia Wichi

Dios lehumnhayaj tä itiyej laka wichi tä äkleyhtses

¹ Lhawuk yok: “Täjte Israel lhayis kamaj tet iwoye n'atfwas, ohuminte, otonphähte tä ihi Egipto, otech'aynej t'at che oles.

² Tha tä oyachajlhaho tä ot'äne, wet nemhit w'et iwoye tä lhaitonte n'ohlä. Iwo t'ewayhtesa dios lhayis tä kamatachehen, wet yen n'okhayajayej lecheyälis häp incienso tä iwunhomche.

³ Mat olhamte tä ochunlä oka wichi Israel, wet äp ochufwenejte lew'ekyaj tä iwoye, mat lhamel nitäfwenhit'a n'oyej tä ot'uyehen.

⁴ Otonej lhame ohumnhayaj lhäy'e op'altsenyaj. Otott'ayne och'alos, otech'aynej n'atfwas tä lelemsas, wet ot'upeyejchä tä ochunnhen,

⁵ mat lhamel tapinhit'a n'oye. Häp tä tamenej tä yäpnhiyela Egipto, wet Asiria lhayenla niyatayej lhamel.

⁶ Õ'tihiyeja n'oka'tshayaj häp lew'etes wet õ'wasthihichela lelafwey tä tach'opwayhen. Nofwihena t'at oka wichi, häp m'ayhay tä yenwethä tä tamenej.

⁷ Oka wichi lajit whäya tä tatay n'ohlä. Lhamel t'änpe laka dios tä kamatache, mat tach'othiyet'a.

⁸ “Israel, ohanhiyejt'a oaiwoyneje che ole amejen, te oaiwomhit'a. Okalhihit'a che oaitech'aynej honhates tä lhey Adma lhäy'e Seboyim täjte owit'äyen. Ohusek ayen at lhakliya, op'altsenyaj iyej amhiche.

⁹ Olehathichela owäkw tä oti amejen, te oyachajihot'alak owasthi Israel. Tsi ohäpe Dios, ohäpkhit'a hin'o. Ohäpe Ot'amajchet wet oi'amejen, wet che onäm amehen, khit'a che oaitäyhthen.”

¹⁰ Wichi ihänla Lewuk Dios wet lham tanhätinhilhila, tehlat iwoye t'owalhaj, häpkhilek leles tachettichehen wet nekhen tä tälhe lhip tä ifwala y'uy wet lhaihutej.

¹¹ “Tehlat iwoye afwenchey tä iteläfwit tä tälhe Egipto, wet che tälhe Asiria tehlat iwoye hokwinhas, wet äp oyachajiholat lew'ette. Olham tä ohäpe Lewuk Dios olhämet t'at täjtso.”

Dios laka wichi lech'isukyaj

¹² Lhawuk yok: “Israel lhayis ilän n'oyej lhämtes tä kamatachehen wet iti n'oyej lakafweynhayajay. Wet Judá lhayis lhaitonte n'ohlä, tajlhamat lewuk tä takwey lhenek.