Oseas 1 - Biblia Wichi

¹ Häp täja Lhawuk lesilätyaj tä ichutthaynej Oseas, Beeri lhäs, täjp'ante Uzías, Jotam, Acaz, lhäy'e Ezequías tä niyatejenpej Judá, wet äp Jeroboam tä Joás lhäs niyatej Israel.

Oseas lech'efwa tä kain'oya, lhäy'e leles

² Nech'e Lhawuk iwo tesa tä ifwenho lesilätyaj Oseas, ne'tek iwo silätayej wichi. Wet tahuyej Oseas wet yok: –Häp wichi tä ihi honhatna nemhit ihuminn'o wet lhaitonte n'ohlä. Wet häp tä one'tek lewo hach'efwaya, chuma atsinha tä kain'oya, wo alesahlä, häpkhilek häpe lakain'owos.

³ Wet häp tä Oseas tachuma atsinha tä lhey Gomer tä Diblaim lhäse. Tä waplu, wet iwo lhäsa,

⁴ wet Lhawuk ifwenho Oseas tä yok: –En lheya Jezreel han'äfwaj. Tsi täjte ihi Jezreel, wet rey Jehú ilänhen wuj wichi. Wet häp tä pajiyejt'ala wet olham oyenla tesa lham lhäy'e leles tä lepes lheley, wet äp onofwthila n'oniyatyaj tä ihi Israel.

⁵ Ifwalatso owasthihila laka nifwotaj che ihi Jezreel lakalech'o.

⁶ Tä paj wet Gomer yachajo tä hich'otshan, tä nichätchä nech'e atsinha. Wet Lhawuk ifwenho Oseas, yok: –En lheya Ka'op'altseneka. Tsi olham nemla op'altsen Israel lhayis wet äp n'am täyhthila letes.

⁷ Tha matla Judá lhayis häpkhilek op'altsenhen. Olham ohäpe laka Dios tä Lewuk wet äp ofwayhthila, mat häpkhit'ala n'oka'tshayaj, lhäy'e n'olutses, lhäy'e n'ofwajnhates, lhäy'e yel'atas, lhäy'e wichi tä ifwichehchä.

⁸ Tä Ka'op'altseneka ileyej tä tip, Gomer yachajo tä hich'otshan, tä nichätchä äp hin'o.

⁹ Wet Dios tahuyej Oseas, yok: –En lheya Ka'okawichiya. Tsi häp tä amel nemhit ahäpe oka wichi wet äp nemhit ohäpe aka Dios.

Dios inech'aynhihila Israel lhayis

¹⁰ Ihichela ifwalas tä Israel leles tehlat iwoye holo tä iwhäye tewok. Niwohit täjche y'ithat wok iwo kaw'awlhanhatayej. Wet Dios nemla yok, “Amel nemhit ahäpe oka wichi”, mat yohlak, “Amel ahape Dios tä n'ilataj leles t'at.”

¹¹ Wet Judá lhayis lhäy'e Israel lhayis nemla lhaiw'enhathen. Lhaip'ajthilawek wet häpkhilek yämla tefwaji lhamel laka niyat. Wet äp tälhihola honhat tä kalew'eta wet yäpnhiyela lhamel laka honhat. Ifwalatso lewujyaj ihihila Jezreel.